«بىرەۋ تويىپ سەكىرەدى, بىرەۋ توڭىپ سەكىرەدى» دەمەكشى ءزارۋ جاندارعا دەمەۋشىلىك كومەك كورسەتۋدىڭ ءوزى قالتالىلاردىڭ قاس-قاباعىنا قاراپ قالعان مىنا زاماندا قايىرىمدىلىق اكتسيالارىن وتكىزۋ از قامتاماسىز ەتىلگەن الەۋمەتتىك سالالارعا قارجى تابۋدىڭ ءبىر كوزىنە اينالىپ وتىر. مىنە, وسىنداي قايىرىمدىلىق شاراسى جاقىندا ششۋچينسك-بۋراباي شيپاجاي ايماعىندا وتكىزىلدى. «CHARITY TOUR DE BURABAY 2016» دەگەن بىرەگەي برەندپەن وتكەن ءتورتىنشى قايىرىمدىلىق ۆەلوشەرۋىن قالىپتاسقان ءداستۇر بويىنشا وليمپيادا چەمپيونى, قازاقستان رەسپۋبليكاسىنا ەڭبەك سىڭىرگەن سپورت شەبەرى, «ASTANA PRO TEAM» كومانداسىنىڭ باس مەنەدجەرى الەكساندر ۆينوكۋروۆ باستاپ شىقتى.
قايىرىمدىلىق ۆەلوشەرۋىن اقمولا وبلىسى اكىمدىگى, «Rixos Borovoe» قوناق ءۇيى جانە كاسىپكەر بولات وتەمۇراتوۆتىڭ «اسىل ميراس» قايىرىمدىلىق قورى بىرلەسىپ ءتورتىنشى رەت قاتارىنان ۇيىمداستىرىپ وتىر. وعان بارلىعى 500-دەن اسا ادام قاتىستى, ونىڭ ىشىندە بەلگىلى سپورتشىلار, وتاندىق جانە شەتەلدىك ءىرى كومپانيالاردىڭ توپ-مەنەدجەرلەرى مەن قىزمەتكەرلەرى, ءتۇرلى مەملەكەتتىك قۇرىلىمداردىڭ باسشىلارى بار. سپورت پەن قايىرىمدىلىقتى ۇيلەستىرگەن بۇل مەرەكەگە بارلىعى 1500-دەن اسا ادام كەلدى. ۆەلوشەرۋ شيپاجاي اۋماعىنداعى جالپى ۇزىندىعى شامامەن 30 شاقىرىمعا سوزىلعان تابيعاتى سۇلۋ تراسسا بويىمەن ءوتتى.
«اسىل ميراس» قايىرىمدىلىق قورىنىڭ ديرەكتورى م.ايتماعامبەتوۆتىڭ ايتۋىنشا, الدىڭعى جىلدارى وتكىزىلگەن ۆەلوشەرۋلەردىڭ قورىتىندىسىندا 203 ميلليون تەڭگە قارجى جينالىپ, اقمولا جانە قىزىلوردا وبلىستارىنىڭ الەۋمەتتىك مەكەمەلەرىنە بەرىلگەن. ماسەلەن, 2015 جىلى وتكىزىلگەن قايىرىمدىلىق ۆەلوشەرۋدىڭ ناتيجەسىندە ششۋچە سابيلەر ۇيىنە, اقمولا وبلىسىنىڭ مۇگەدەك بالالارعا ارنالعان ينتەرناتىنا, قىزىلوردا وبلىستىق جۇقپالى اۋرۋلار اۋرۋحاناسىنا جانە قىزىلوردا وبلىسىنىڭ مۇگەدەك بالالارعا ارنالعان №2 وڭالتۋ ورتالىعىنا 105 ملن تەڭگەدەن استام جالپى سوماعا كومەك كورسەتىلگەن. 2013 جىلى ۇيىمداستىرۋشىلار ناۋقان اياسىندا 11,5 ملن تەڭگە جيناي العان بولسا, 2014 جىلى بۇل سوما 87 ملن تەڭگەگە دەيىن جەتتى.
بيىلعى «Charity Tour de Burabay-2016» ۆەلوشەرۋىن ۇيىمداستىرۋشىلار كوكشەتاۋ قالاسىنداعى اقمولا وبلىستىق بالالار اۋرۋحاناسىنا ارناپ قاجەتتى مەديتسينالىق جابدىقتار ساتىپ الۋ ءۇشىن 20 ملن تەڭگەگە قارجى جيناۋدى كوزدەگەن بولاتىن. الايدا, ناۋقان كەزىندە جينالعان قارجى كولەمى كۇتكەننەن اسىپ ءتۇسىپ, 100 ملن تەڭگەدەن استام قارجى جينالدى.
ەندى, جينالعان قارجى قىزىلوردا وبلىسىنداعى ەڭ ءىرى جانە وبلىس ورتالىعىنان شالعاي جاتقان ارال اۋدانىنىڭ ورتالىق اۋرۋحاناسىندا شالا تۋىلعان نارەستەلەرگە ارنالعان كولىك كيۋۆەزىن جابدىقتاۋعا جۇمسالاتىن بولادى. وسىنىڭ ارقاسىندا جاڭا تۋعان نارەستەلەردى, اسىرەسە, شالا تۋىلعان سابيلەردى سىرتقى ورتانىڭ اسەرىنەن جاقسى قورعاپ, وبلىستىق پەريناتالدىق ورتالىققا جەتكىزۋ كەزىندە ءسابيدىڭ ءومىرىن امان ساقتاپ, ءارى قارايعى دامۋىنا جاعداي جاسايتىن قاجەتتى ميكرووتانى جاساۋعا مۇمكىندىك پايدا بولماق. ءوز كەزەگىندە بولات وتەمۇراتوۆتىڭ «اسىل ميراس» قايىرىمدىلىق قورىنىڭ, قازاقستان تەننيس فەدەراتسياسىنىڭ, سونداي-اق, وتاندىق جانە حالىقارالىق بەلگىلى كومپانيالاردىڭ اتىنان لوتتار قويىلعان قايىرىمدىلىق اۋكتسيونى قارجى جيناۋعا ەلەۋلى ۇلەسىن قوستى دەۋگە بولادى.
ماسەلەن, قازاقستاندىق بوكسشى, ورتا سالماقتاعى وليمپيادا چەمپيونى گەننادي گولوۆكيننىڭ قولعابى ەڭ تانىمال لوتتاردىڭ بىرىنە اينالىپ, ول ءۇشىن بىرنەشە ادام تالاستى. ناتيجەسىندە, قازاقستان ماقتانىشىنىڭ قولعابى اۋكتسيون كەزىندە 8 ملن تەڭگەگە ساتىلدى.
«ASTANA PRO TEAM» كومانداسى بىردەن ءۇش لوتتى, اتاپ ايتقاندا, فابيو ارۋ جاتتىققان وليمپيادالىق ۆەلوسيپەدتى, يسپانياداعى «ۆۋەلتا-2016» ۆەلوجارىسىنىڭ اقتىق كەزەڭىنە بارۋعا ارنالعان 3 كۇندىك ساپاردى جانە ۆينچەنتسو ءنيباليدىڭ دجيرو د’يتاليا جارىسىندا جەڭىسكە جەتكەن كەزدە كيگەن دجەرسيىن باسساۋداعا ۇسىندى. ۆينچەنتسو ءنيباليدىڭ جەڭىستى كيىمى 1 ملن 450 مىڭ تەڭگەگە ساتىلعان بولسا, قايىرىمدىلىق اۋكتسيوننىڭ قاتىسۋشىلارى 200 مەترلىك قاشىقتىققا براسس تاسىلىمەن ءجۇزۋ بويىنشا 2016 جىلدىڭ وليمپيادا چەمپيونى اتانعان دميتري ءبالانديننىڭ قولتاڭباسى قويىلعان فۋتبولكا دا تۋرا وسىنداي باعاعا باعالاندى.
مۇمكىندىگى شەكتەۋلى بالالار سالعان سۋرەتتەر اۋكتسيونداعى لوتتاردىڭ ىشىندە ەڭ جوعارى باعاعا ساتىلىپ, ءۇش سۋرەت ءۇشىن 11 ملن تەڭگە ۇسىنىلدى. اۋكتسيون قورىتىندىسى بويىنشا بارلىعى 49 ملن 850 مىڭ تەڭگە جينالىپ, قايىرىمدىلىق جارمەڭكەسى كەزىندەگى ساۋدادان تۇسكەن قارجىنى, كورپوراتيۆتىك جانە جەكەلەگەن تۇلعالاردىڭ جارنالارىن قوسقاندا, بۇل سوما 100 ملن تەڭگەگە دەيىن جەتتى. جينالعان بۇكىل قارجى قايىرىمدىلىق ماقساتتا جۇمسالاتىن بولادى.
قايىرىمدىلىق شاراسىنا اتاقتى سپورتشىلار, اتاپ ايتقاندا, ريوداعى وليمپيادا جەڭىمپازدارى مەن جۇلدەگەرلەرى دانيار ەلەۋسىنوۆ (بوكس), ۆاسيلي لەۆيت (بوكس), گيۋزەل مانيۋروۆا (ايەلدەر كۇرەسى) قاتىستى.
ۇلان سانجار