«استانا وپەرا» مەملەكەتتىك وپەرا جانە بالەت تەاترىندا ءىىى حالىقارالىق بالەت ارتىستەرىنىڭ بايقاۋى باستالدى.
حالىقارالىق بايقاۋ مادەنيەت مينيسترلىگىنىڭ قولداۋىمەن بۇعان دەيىن ەكى رەت وتكىزىلگەنى بەلگىلى. ونىڭ ءبىرى 2006 جىلى, ەكىنشىسى 2009 جىلى ۇيىمداستىرىلعان. ەندى اراعا جەتى جىل سالىپ, ءۇشىنشى حالىقارالىق بايقاۋ شىمىلدىعىن اشتى. ونىڭ قۇرىلتايشىسى ءارى ۇيىمداستىرۋشىسى – سوڭعى جىلدارى ەلىمىزدىڭ حورەوگرافيا ونەرىن دامىتۋعا زور ۇلەس قوسىپ كەلە جاتقان «بالەت پەن ۇلتتىق ءبيدى دامىتۋ جانە قولداۋ قورى». ال باس سەرىكتەسى قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قورى بولىپ وتىر.
بايقاۋدىڭ اشىلۋىنا مادەنيەت جانە سپورت ءمينيسترى ارىستانبەك مۇحامەدي ۇلى قاتىستى. ول مەملەكەتتىك حاتشى گۇلشارا ابدىقالىقوۆانىڭ قازاقستان مەن رەسەيدەن, ورتالىق ازيا مەن ەۋروپادان, جاپونيادان كەلگەن 17-25 جاس ارالىعىنداعى جاس ارتىستەرگە تابىس تىلەگەن قۇتتىقتاۋ حاتىن وقىپ بەردى. قۇتتىقتاۋدا مادەنيەت ۇلتتىڭ رۋحاني بولمىسى, جانى, اقىل-پاراساتى ەكەنى ايتىلعان. سونداي-اق, حالىقارالىق ماڭىزدى بايقاۋلاردىڭ جاس بيشىلەردىڭ ونەرىن كاسىبي شىڭداۋعا ىقپال ەتەتىنى, ەلىمىزدى وركەنيەت بيىگىنە جەتەلەيتىنى باياندالعان.
بايقاۋدىڭ جۇلدە قورىندا ايەلدەر مەن ەرلەر اراسىندا (جەكە-دارا) گران-پري, ءبىرىنشى, ەكىنشى, ءۇشىنشى ورىندار سىيلىقتارى جانە بىرنەشە ىنتالاندىرۋ جۇلدەسى بار. ولار ۇزدىك دۋەت, «ۇكىلى ءۇمىت», زاماناۋي حورەوگرافيانى ۇزدىك ورىنداۋشى اتالىمدارى بويىنشا بەرىلەدى. سونداي-اق, «پەتيپ مۇراسىنىڭ قورى» مەن براتيسلاۆا ۇلتتىق تەاترى (سلوۆاكيا) دا بايقاۋعا ارنايى سىيلىق تاعايىنداپ وتىر. وسى سىيلىقتىڭ يەگەرى 2016-2017 جىلدارى براتيسلاۆا تەاترىنىڭ ساحناسىندا ماريۋس پەتيپتىڭ «كورسار» بالەتىنىڭ ايەل نەمەسە ەر ادام پارتياسىنىڭ باستى ءرولىن ورىنداۋ ءمۇمكىندىگىنە يە بولادى.
ايتا كەتەيىك, بايقاۋدىڭ قازىلار القاسىنا قازىرگى بالەتتىڭ بەلدى تۇلعالارى ەنىپ وتىر. ولار – ماجارستان ۇلتتىق بالەتىنىڭ ديرەكتورى, كەرەمەت ءبيشى ءارى حورەوگراف تاماس زوليموزي, بەيجىڭ بي اكادەمياسىنىڭ پروفەسسورى, قىتاي ۇلتتىق بي قاۋىمداستىعى بالەت كوميتەتىنىڭ اتقارۋشى ۆيتسە-پرەزيدەنتى سياو سۋحۋا, دارىندى حورەوگراف, ايگىلى بالەتمەيستەر يرجي كيلياننىڭ اسسيستەنتى ستەفان جەرومسكي, يتاليالىق بالەتمەيستەر لۋيدجي بونينو, «Dance Open» حالىقارالىق بالەت فەستيۆالىنىڭ نەگىزىن قالاۋشى ۆاسيلي مەدۆەدەۆ, بالەت كونكۋرستارى حالىقارالىق فەدەراتسياسىنىڭ باس ديرەكتورى سەرگەي ۋسانوۆ. ال قازىلار القاسىنىڭ ءتورايىمى – قازاق ۇلتتىق حورەوگرافيا اكادەمياسىنىڭ رەكتورى التىناي اسىلمۇراتوۆا.
ايگۇل سەيىلوۆا,
«ەگەمەن قازاقستان»