دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتى مينيسترلىكتىڭ وسى جىلدىڭ سەگىز ايىندا دەنساۋلىق ساقتاۋ ماسەلەلەرى بويىنشا اتقارعان قىزمەتى جايلى حابارلادى.
اتاپ ايتقاندا, رەسپۋبليكالىق سانيتارلىق اۆياتسيا بريگادالارى 1408 ۇشىرىلىم جاساپ, 1740 مەديتسينالىق قىزمەت كورسەتكەن. ونىڭ ىشىندە 1365 ناۋقاس تاسىمالدانىپ, 289-ىنا كەڭەس بەرىلگەن جانە 86 وتا جاسالعان.
تاسىمالدانعان ناۋقاستاردىڭ 70 پايىزى وبلىستىق جانە قالالىق مەديتسينالىق ۇيىمدارعا, 30 پايىزى استانا جانە الماتى قالالارىنداعى رەسپۋبليكالىق ورتالىقتارعا جاتقىزىلعان.
اتالعان مەرزىم ىشىندە شەتەلدىك ەمحانالار مەن مەديتسينالىق ۇيىمدارداعى ەلىمىزدىڭ ازاماتتارىنا استانا جانە الماتى قالالارىندا ەمدەۋ شارالارىن جالعاستىرۋ ءۇشىن پۋسان (وڭتۇستىك كورەيا), تسۆەيبريۋكەن (گەرمانيا), انتاليا (تۇركيا), پراگا (چەحيا) بىشكەك (قىرعىزستان), ءماسكەۋ (رەسەي) قالالارىنان 7 ۇشىرىلىم جاسالعان.
سونىمەن بىرگە, 2016 جىلدىڭ 8 ايىندا سانيتارلىق اۆياتسيانىڭ موبيلدىك بريگادالارى ءارتۇرلى جاراقات العان 425 پاتسيەنتكە, ونىڭ ىشىندە جول-كولىك اپاتىنان زارداپ شەككەن 180 ادامعا مەديتسينالىق قىزمەت كورسەتكەن.
رەسپۋبليكالىق سانيتارلىق اۆياتسيا ورتالىعىنىڭ جۇمىس ىستەۋ مەرزىمىندە اسا ءبىلىكتى ماماندار تاراپىنان جوعارى مامانداندىرىلعان مەديتسينالىق كومەكتىڭ شۇعىل ءارى ۋاقتىلى كورسەتىلۋى ناتيجەسىندە مىڭداعان ادامنىڭ ءومىرىن ساقتاۋعا مۇمكىندىك بولعان.
«ەگەمەن-اقپارات»