مۇناي-گاز كەشەنى قىزمەتكەرلەرىنىڭ مەرەكەسىندە «قازمۇنايگاز» ۇلتتىق كومپانياسى» اكتسيونەرلىك قوعامىنىڭ تاۋەلسىزدىكتىڭ 25 جىلدىعىنا ارناعان ءبىرىنشى سپارتاكياداسى بولىپ ءوتتى.
سەرگەكتىك پەن شاپشاڭدىققا جەتەلەيتىن سالتاناتتى شارا استانا قالاسىنىڭ 5 سپورتتىق كەشەنىندە ۇيىمداستىرىلدى. سپارتاكيادانىڭ اشىلۋ سالتاناتىندا ءسوز سويلەگەن «قازمۇنايگاز» ۇلتتىق كومپانياسى» اكتسيونەرلىك قوعامىنىڭ پرەزيدەنتى (باسقارما توراعاسى) ساۋات مىڭباەۆ جارىسقا قاتىسۋشىلارعا ساتتىلىك تىلەپ, سپورتتىق شارانىڭ ماڭىزدىلىعىنا توقتالدى. «سپورتتىق شارالار «قازمۇنايگاز» كومپانيالار توبى ومىرىنە باياعىدان بەرىك توقتالادى. سپورتپەن بەلسەندى تۇردە اينالىساتىن قمگ-نىڭ جيىرما مىڭنان استام جۇمىسشىسى اراسىندا جوعارى دەڭگەيدەگى سپورت شەبەرلەرى مەن سپورت شەبەرلىگىنە ۇمىتكەرلەر از ەمەس. كوپتەگەن سەرىكتەس كومپانيالاردا جىل سايىنعى سپارتاكيادالار وتكىزىلىپ ءجۇر. مۇنداي كورپوراتيۆتى شارالاردى قولداۋ – قمگ باسشىلىعىنىڭ قاعيدالىق ۇستانىمى», – دەدى ول.
جارىسقا قاتىسۋشىلار شاعىن فۋتبول, ۆولەيبول, باسكەتبول, جۇگىرۋ, ۇستەل تەننيسى, بيليارد, دويبى, شاحمات جانە توعىزقۇمالاق سياقتى سپورتتىڭ 9 ءتۇرى بويىنشا باق سىناستى. ايتپاقشى, ءدۇبىرلى دوداعا «قازمۇنايگاز» كومپانيالار توبىنىڭ 30 ۇيىمىنان 500-دەي ادام قاتىستى. ولاردىڭ قاتارىندا قمگ كومپانيالار توبىنىڭ «قازمۇنايگاز» بارلاۋ ءوندىرۋ» اق, «قازترانسويل» اق, «قازترانسگاز» اق, «قازمۇنايگاز» وڭدەۋ جانە ماركەتينگ» اق, «ماڭعىستاۋمۇنايگاز» اق سياقتى ۇيىمدارى مەن دەربەس مەكەمەلەر بولدى.
بۇگىندە سالاماتتى ءومىر سالتىن ناسيحاتتاۋ, سپورت پەن دەنە تاربيەسىنە ادامداردى تارتۋ, سەرىكتەس ۇيىمدار قىزمەتكەرلەرى اراسىندا كوممۋنيكاتسيالىق بايلانىس ورناتۋ ماقساتىندا «قازمۇنايگاز» ۇلتتىق كومپانياسى جىلىنا ەكى مارتە سپارتاكيادا وتكىزۋدى قولعا الىپ وتىر. مۇنىڭ دالەلى – وسى ۇيىمداستىرىلىپ وتىرعان سپورتشىلار باسەكەسى.
ايتا كەتەيىك, بيىلعى جىلدىڭ ناۋرىز جانە شىلدە ايلارىندا اتالعان ۇلتتىق كومپانيا 10 توپتىڭ باسىن بىرىكتىرىپ, سپورتتىق ويىندار جارىسىنىڭ العاشقى كەزەڭىن وتكىزدى. وعان «قازمۇنايگاز» بارلاۋ-ءوندىرۋدىڭ بيزنەسى, مۇناي تاسىمالى جانە گاز ماركەتينگى, وڭدەۋ جانە مۇناي ماركەتينگى, مۇناي سەرۆيسى, بۇرعىلاۋ جانە سەرۆيستىك جوبالار باعىتىنداعى 50-دەي ۇيىمنان 2 مىڭ 500 قىزمەتكەر قاتىسىپ, ءبىرىنشى تۋردان سۇرىنبەي وتكەن كوماندالار سپارتاكيادانىڭ ەكىنشى كەزەڭىنە جولداما الدى. ەندى مىنە, ساقا سپورتشىلار سپارتاكيادا تورىندە ساپ تۇزەپ تۇر. ايتپاقشى, سپارتاكياداعا قاتىسقان سپورتشىلار ەرلەر مەن ايەلدەر بولىپ ءبولىنىپ, جەكە جانە كوماندالىق قۇرامدا ونەر كورسەتتى.
فۋتبول
سپارتاكيادانىڭ العاشقى ويىنى شاعىن فۋتبولمەن باستالدى. سەرىكتەس كومپانيالاردان سايلانىپ كەلگەن 11 كوماندا جاسىل الاڭدا ادەمى ويىن ورنەگىن كورسەتتى. فينالدىق ويىن «قازترانسويل» اق پەن «اتىراۋ مۇناي وڭدەۋ زاۋىتى» جشس اراسىندا ءوتىپ, ناتيجەسىندە 4:2 ەسەبىمەن مۇناي تاسىمالداۋشىلار جەڭىسكە جەتتى.
باسكەتبول
باسكەتبولشىلار باسەكەسىنە «قازگەرمۇناي بك» جشس, «ءوبت عزي» جشس, «ماڭعىستاۋمۇنايگاز» اق, «وزەنمۇنايگاز» اق, «قاراجانباسمۇناي» اق, «قازترانسويل» اق, «ءاتىراۋموز» جشس سىندى مەكەمەلەردەن 7 كوماندا قاتىسىپ, «ا» جانە «ب» توبى بويىنشا ءبولىنىپ وينادى.
ۆولەيبول
ۆولەيبولدان ەرلەر اراسىنداعى كوماندالاردىڭ ويىنى تارتىستى وتۋىمەن ەرەكشەلەندى. العاشقى كۇنى جالپى كوماندالاردىڭ 7 ويىنى عانا ءوتتى. ءبىرىنشى كەزدەسۋدەن-اق ۇزدىك كوماندالار بايقالدى. ۆولەيبول باسەكەسىندە «قازترانسويل» سپورتشىلارى ءبىرىنشى ورىندى جەڭىپ الدى.
جەڭىل اتلەتيكا
جەڭىل اتلەتتەر جارىسىنداعى ايەلدەر اراسىندا 100 مەترگە جۇگىرۋدەن «قمگ ءبو» كومانداسىنان ءسابينا ويراتقىزى توپ جاردى. ەكىنشى ورىندا – «قمگ-سەرۆيس» كومانداسىنىڭ مۇشەسى شولپان اڭساريەۆا. «وزەنمۇنايگاز» كومانداسىنىڭ وكىلى گۇلجان مىڭجانوۆا ءۇشىنشى ورىنعا تابان تىرەدى. وسى قاشىقتىقتا ەرلەر اراسىندا «0SC» جشس كومانداسىنىڭ سپورتشىسى ساپارمۇرات نۇرمۇحانبەتوۆ ءبىرىنشى ورىندى جەڭىپ السا, «قازترانسويل» اق-تان دميتري بۋتكوۆ ەكىنشى, «قازترانسگاز» وكىلى عابيدەن نۇرقاسىموۆ ءۇشىنشى ورىنداردى يەلەندى. ال ارالاس كوماندالار اراسىنداعى ەستافەتادان ەڭ ۇزدىك كوماندا «قمگ ونىمدەرى» اق بولىپ تانىلدى. بۇل توپتىڭ سپورتشىلارى 54.47 سەكۋند ۋاقىت كورسەتىپ, ءبىرىنشى ورىنعا, «قازترانسويل» اق 55.90 سەكۋند ۋاقىتپەن ەكىنشى, جاڭاوزەندىكتەر («وزەنمۇنايگاز» اق) 56.01 سەكۋند ناتيجەمەن ءۇشىنشى ورىنعا جايعاستى.
شاحمات
تاقتاداعى تايتالاس قورىتىندىسى بويىنشا 10 مۇمكىندىكتەن 9,5 بالل جيناعان «قازترانسويل» كومانداسىنىڭ وكىلى ۆالەري اللاياروۆ ەرلەر اراسىنداعى ءتۋرنيردىڭ جەڭىمپازى اتاندى. ەكىنشى ورىنعا «قمگ ونىمدەرى» كومانداسىنان ادىلەت ادىلبەكوۆ, ءۇشىنشى تۇعىرعا «وزەنمۇنايگاز» كومانداسىنىڭ سپورتشىسى يسلامبەك بەرجاليەۆ جايعاستى.
قىزدار اراسىنداعى جارىستا قمگ كومانداسىنىڭ مۇشەسى ديليارا يسماديەۆا 10 مۇمكىندىكتەن 8,32 بالل جيناپ, الدىنا جان سالمادى «قمگ ونىمدەرى» كومانداسىنان ايگەرىم الپىسباەۆا ەكىنشى, «قازترانسويل» كومانداسىنان ايناگۇل ءبىتىشوۆا ءۇشىنشى ورىندى جەڭىپ الدى.
ۇستەل تەننيسى
ۇستەل تەننيسىنەن سپورتشىلار باسەكەسى نازارباەۆ ۋنيۆەرسيتەتتىڭ سپورت كەشەنىندە ۇيىمداستىرىلدى. دوداعا قاتىسۋشىلار بۇل جارىسقا بارىنشا تىڭعىلىقتى دايىندىقپەن كەلگەندەرىن كورسەتىپ, ءبىر-ءبىرىن ۇتۋعا ۇمتىلىپ باقتى. شەبەرلىكتەرىن كورسەتىپ, تەننيستىڭ ءتۇرلى سىناعىنان وتكەن كانىگى سپورتشىلار سەكىلدى سايىس كورىگىن قىزدىردى.
بيليارد
سپارتاكيادانىڭ تاعى ءبىر سپورتتىق شاراسى تاستاياق ۇستاعان تارلاندار اراسىندا ءوتتى. ياعني, بيليارد باسەكەسىندە «قازترانسويل» اق پەن «قازاقتۇرىكمۇناي» جشس كوماندالارى باس بايگە ءۇشىن اقتىق سىندا تالاسقا تۇسسە, ءۇشىنشى ورىن ءۇشىن «وزەنمۇنايگاز» اق پەن «اقتاۋنەفتەسەرۆيس» جشس باق سىناستى.
ەكى كۇن بويى جەكەلەي جانە توپتىق قۇراممەن تارتىسقا تۇسكەن سپورتشىلار باسەكەسىنىڭ سوڭعى ءتۇيىنى قويىلدى. جالاۋىن جەلبىرەتكەن سپارتاكيادانىڭ جابىلۋ سالتاناتى دا كەلىپ جەتتى.
«تارلان-استانا» سپورت كەشەنىندە شارانىڭ قورىتىندى كەشى ءوتتى. ماراپاتتاۋ ساتىندە «قازمۇنايگاز» ۇك» اق ۆيتسە-پرەزيدەنتى سەرىك ابدەنوۆ سپورتشىلارعا بەلسەندى ومىرلىك ۇستانىمدارى ءۇشىن العىس ايتىپ, جەڭىستى جولدار تىلەدى.
«جەڭىس بار جەردە جەڭىلىس تە بار. سىزدەر وسى سپارتاكيادا كەزىندە تاماشا ويىن كورسەتىپ, جەڭىسكە جەتۋ ءۇشىن شىن شەبەرلىكتەرىڭىزدى كورسەتتىڭىزدەر. بارلىقتارىڭىز دا جاقسى سپورتشىسىزدار. مەن سىزدەردى تاۋەلسىزدىك مەرەكەسىمەن جانە مۇنايشىلار كۇنىمەن قۇتتىقتايمىن! «قازمۇنايگاز» ۇك» اق باسشىلىعى قاشاندا سالاماتتى ءومىر سالتىن بەرىك ۇستانعان سپورتشىلاردىڭ باسىن بىرىكتىرىپ, سپارتاكيادا وتكىزىپ تۇرۋدى داستۇرگە اينالدىرىپ كەلەدى. كەلەسى جىلى دا وسىنداي سپارتاكيادا وتكىزىلەتىن بولادى. تاعى دا جەڭىستەرىڭىز قۇتتى بولسىن, سپورتشىلار!» – دەدى سەرىك ابدەنوۆ.
مۇنان سوڭ ۇزدىك كوماندالار مەن سپورتشىلاردى ماراپاتتاۋ ءراسىمى ءوتىپ, سوڭىندا «قازمۇنايگاز» قىزمەتكەرلەرىنىڭ كوركەمونەرپازدارى مەرەكەلىك كونتسەرت قويدى.
تالعات رايىمبەك,
«ەگەمەن قازاقستان»