قازىر فۋتبولدان قازاقستان پرەمەر-ليگاسىنىڭ ناعىز قىزعان شاعى. اسىرەسە, چەمپيوندىقتان باستى ۇمىتكەرلەر – «استانا» مەن «قايراتتىڭ» اراسىنداعى تەكەتىرەس جانكۇيەرلەردىڭ دەلەبەسىن ودان ءارى قوزدىرىپ تۇر. سونداي-اق, كوپشىلىك ءبىرىنشى اينالىمنان كەيىن-اق پرەمەر-ليگادان «شىعارىپ تاستاعان» ورالدىڭ «اقجايىعى» دا تۋر سايىن تۇلەپ, جارىستىڭ كورىگىن قىزدىرۋدا. وتكەن دەمالىس كۇندەرى وينالعان
26-تۋر ويىندارى وسىنداي تارتىستى ساتتەرگە تولى بولدى.
تۋردىڭ ورتالىق كەزدەسۋى ەلوردادا جەرگىلىكتى «استانا» مەن «قايرات» كوماندالارى اراسىندا ءوتتى. وتاندىق جانكۇيەرلەر ەرەكشە نازار اۋدارعان بۇل ويىندا ستانيمير ستويلوۆتىڭ كومانداسىنىڭ بابى كەلىسپەدى. ال العاشى مينۋتتاردان باستاپ تىزگىندى قولعا العان الماتىلىقتار 5-مينۋتتا-اق اسەۆەدونىڭ كومەگىمەن ەسەپ اشىپ ۇلگەردى.
ەكىنشى تايمدا دا قارقىنىنان تايماعان الماتىلىقتار اينالدىرعان التى مينۋتتىڭ ىشىندە ەكى گول سوعىپ كەتتى. الدىمەن, 62-مينۋتتا كوماندا كاپيتانى باۋىرجان يسلامحان مەرگەندىگىمەن كوزگە تۇسسە, 68-مينۋتتا چەمپيوناتتىڭ سۇرمەرگەنى جەرار گوۋ قانجىعاسىن مايلادى. ءوز جانكۇيەرلەرى الدىندا نامىسقا تىرىسقان «استانا» ويىنشىلارى 71-مينۋتتا دجوردجە دەسپوتوۆيچتىڭ گولىمەن ەسەپ ايىرماسىن قىسقارتقان بولاتىن. ارادا 5 مينۋت وتكەندە, «قايرات» ساپىنداعى رەسەيلىك لەگيونەر اندرەي ارشاۆين ناتيجەلى سوققى جاساپ, ويىننىڭ نۇكتەسىن قويدى.
وسىلايشا, 4:1 ەسەبىمەن جەڭىسكە جەتكەن «قايرات» «استانامەن» اراداعى ۇپاي ايىرماشىلىعىن 4-كە دەيىن قىسقارتىپ, چەمپيوندىقتان ءالى دە ءۇمىتتى ەكەنىن اڭعارتتى.
ەۋروكۋبوكتىك باسەكەلەردە باق سىناۋعا مۇمكىندىك بەرەتىن ءۇشىنشى ورىننان ءۇمىتتى پاۆلوداردىڭ «ەرتىسى» بۇل تۋردا ءوز الاڭىندا شىمكەنتتىڭ «ورداباسىن» قابىلداپ, 1:2 ەسەبىمەن ەسە جىبەردى. ال كوكشەتاۋدا جەرگىلىكتى «وقجەتپەس» «اقتوبەدەن» ويسىراي جەڭىلدى (0:3).
پرەمەر-ليگاداعى ورىندارىن ساقتاپ قالۋ ءۇشىن «جان بەرىپ, جان الىسىپ» جاتقان ەكىنشى التىلىقتىڭ كوماندالارى دا ايتارلىقتاي تارتىستى كەزدەسۋلەر وتكىزۋدە. اسىرەسە, كوش سوڭىندا كەلە جاتقان ورالدىڭ «اقجايىعى» ءتورتىنشى تۋر قاتارىنان جەڭىسكە جەتىپ, مىقتىلار ساپىندا قالۋ ءمۇمكىندىگىن ساقتاپ قالدى. بۇل جولى «اقجايىق» ءوز الاڭىندا قوستانايدىڭ «توبىلىنان» باسىم ءتۇستى (1:0).