فۋتزال. كولۋمبيادا باستالعان الەم چەمپيوناتىندا ە ىرىكتەۋ توبىنا تۇسكەن قازاقستان قۇراماسى 13 قىركۇيەك كۇنى ءوتكەن 1-تۋردا ارگەنتيناعا 0:1 ەسەبىمەن ەسە بەرىپ قويدى. ويىن تاعدىرىن شەشكەن جالعىز گولدى 20-مينۋتتا الاميرو ۆاپوراكي سالدى. ەندى ءبىزدىڭ جەرلەستەرىمىز 16 قىركۇيەكتە كوستا-ريكا, 19 قىركۇيەكتە سولومون ارالدارى كوماندالارىمەن كەزدەسەدى.
شاحمات. باكۋدە 2 قىركۇيەكتە باستالعان دۇنيەجۇزىلىك وليمپيادادا وسى كەزگە دەيىن 10 تۋردىڭ ويىندارى وينالدى. قازىر ەرلەر قۇرامالارى اراسىندا اقش, ۋكراينا, رەسەي, ايەلدەر كوماندالارى اراسىندا قىتاي, رەسەي, پولشا كوش باستاپ تۇر. ءبىزدىڭ جىگىتتەر – 41-ءشى, قىزدار 27-ءشى ورىندارعا ورنالاستى. سوڭعى تۋردا ەرلەرىمىز موڭعوليانى 3:1, قىزدارىمىز يسپاندىقتاردى 2,5:1,5 ەتىپ ۇتتى. جەكەلەي ەسەپتە ەرلەردەن مۇرتاز قاجىعاليەۆ (81-ورىن), ازامات وتەعاليەۆ (83), قىزداردان شولپان جىلقايداروۆا (110), جانسايا ابدىمالىك (135) جانە گۇلميرا داۋلەتوۆا (143) ۇزدىكتەردىڭ العاشقى 150-لىگىندە كەلەدى.
جەڭىل اتلەتيكا. قازاقستاندىق ولگا رىپاكوۆا بريۋسسەلدە وتكەن «بريلليانت ليگاسىنىڭ» قورىتىندى كەزەڭىندە ءۇش قارعىپ سەكىرۋدەن كۇمىس مەدالعا قول جەتكىزدى. ول 14,41 مەترلىك كورسەتكىش كورسەتتى. التىن مەدال تاعى دا كولۋمبيالىق كاتەرين يبارگۋەننىڭ ەنشىسىندە كەتتى. ول 14,66 مەترگە سەكىردى. ال ءۇشىنشى ورىنعا 14,16 مەتردى باعىندىرعان گرەك قىزى پاراسكەۆي پاپاحريستۋ ورنالاستى.
حوككەي. استانانىڭ «بارىسى» تىزگىنىن بەلورۋس مامانى ەدۋارد زانكوۆەتس ۇستاعاننان كەيىنگى ءبىرىنشى ماتچىن 9 قىركۇيەكتە ءوز الاڭىندا حانتى-مانسىنىڭ «يۋگراسىن» 3:2 ەسەبىمەن جەڭدى. بىراق 11 قىركۇيەكتە ەكاتەرينبۋرگتىڭ «ءاۆتوموبيليسىن» قابىلداپ, 3:4 ەسەبىمەن ۇتىلىپ قالدى.
كوشپەلىلەر ويىندارى. جارىستىڭ بۇل ءتۇرىنىڭ قورىتىندى ناتيجەلەرىنە وزگەرىستەر ەندى. ونى ويىننىڭ سوڭعى كۇنى مارەگە جەتكەن تۇرىكمەن كۇرەسى اكەلدى. كوماندالىق ەسەپتە 27 التىن, 26 كۇمىس جانە 30 قولا مەدالى بار قىرعىزستان ءبىرىنشى ورىندا قالسا, ەكىنشى ساتىعا 15 التىن, 2 كۇمىس جانە 6 قولا مەدال العان تۇرىكمەنستان كوتەرىلدى. ءۇشىنشى ورىن 14 التىن, 10 كۇمىس جانە 16 قولا مەدالدى رەسەي قۇراماسىنا بۇيىردى. قازاقستان كومانداسى 13 التىن, 15 كۇمىس جانە 15 قولا مەدالمەن ءتورتىنشى ورىنعا جىلجىپ كەتتى.