مەملەكەت باسشىسى قورعانىس مينيسترلىگىنىڭ باسشىلىق قۇرامىمەن كەزدەستى (فوتو)

كەزدەسۋ بارىسىندا نۇرسۇلتان نازارباەۆ ساكەن جاسۇزاقوۆتىڭ قورعانىس ءمينيسترى لاۋازىمىنا تاعايىندالعانى تۋرالى ايتىپ, قازىرگى سىن-قاتەرلەردىڭ الدىن الۋ جانە ونى جويۋ ىسىندەگى اسكەردىڭ ايرىقشا ءرولىن اتاپ ءوتتى دەپ حابارلايدى ەگەمەن-اقپارات اقوردانىڭ ءباسپاسوز قىزمەتىنە سىلتەمە جاساپ. – كەلەسى جىلى قازاقستان قارۋلى كۇشتەرىنىڭ قۇرىلعانىنا 25 جىل تولادى, بۇل ەلىمىزدىڭ تاريحىنداعى ماڭىزدى بەلەس بولىپ سانالادى. اسكەر – ەگەمەندىكتىڭ باستى كەپىلى. وڭىردە جانە الەمدە قالىپتاسقان قازىرگىدەي كۇردەلى كەزەڭدە قارۋلى كۇشتەردىڭ ءرولى ارتىپ كەلەدى. حالىقارالىق تەرروريزمنىڭ قاۋىپ-قاتەرلەرى, گيبريدتى سوعىستار, بەلەڭ الىپ كەلە جاتقان قارۋلانۋ باسەكەسى ۇلتتىق قاۋىپسىزدىك ماسەلەلەرىنە باسا كوڭىل بولۋگە ماجبۇرلەپ وتىر, – دەدى قازاقستان پرەزيدەنتى. ەلباسى ايرىقشا نازار اۋدارۋدى قاجەت ەتەتىن بىرقاتار باسىم باعىتتى اتاپ ءوتتى. – اسكەري ءتارتىپتى جەتىلدىرۋ, اسكەري قىزمەتشىلەردى الەۋمەتتىك قامسىزداندىرۋ جانە قازاقستان اسكەرىنىڭ جاۋىنگەرلىك دايارلىعىن جوعارى دەڭگەيدە ۇستاۋ جونىندەگى جۇمىستاردى جالعاستىرۋ قاجەت. قارۋلى كۇشتەردى زاماناۋي قارۋ-جاراقپەن جانە تەحنيكامەن جاراقتاندىرا وتىرىپ, اسكەري دايىندىق ماسەلەلەرىن ودان دا ساپالى دەڭگەيگە جەتكىزۋ كەرەك. ول ءۇشىن بارلىق قاجەتتى قاراجات بولىنەتىن بولادى. ءبىز ءوزىمىزدىڭ دامىعان اسكەري-تەحنيكالىق ونەركاسىبىمىزدى قالىپتاستىرۋعا ءتيىسپىز. وسىعان بايلانىستى, ءتيىستى قۇرىلىمدى ارنايى كورپوراتسياعا نەمەسە اسكەري-ونەركاسىپتىك كەشەن جونىندەگى مينيسترلىككە اينالدىرۋ ماسەلەسى قاراستىرىلاتىن بولادى, – دەدى مەملەكەت باسشىسى. نۇرسۇلتان نازارباەۆ تاعى ءبىر ماڭىزدى ماسەلە اسكەري قىزمەتشىلەردىڭ جاڭا بۋىنىن قالىپتاستىرۋ ەكەنىن ايتتى. – سول ءۇشىن ءتيىستى وقۋ ورىندارى, ۋنيۆەرسيتەتتەر اشىلدى. ەندى اسكەري قىزمەتشىلەردى دايارلاۋ ساپاسىن ارتتىرۋمەن اينالىسۋ كەرەك, – دەدى قازاقستان پرەزيدەنتى. جاڭا قورعانىس ءمينيسترى س.جاسۇزاقوۆتى تانىستىرعان مەملەكەت باسشىسى  ونىڭ مول تاجىريبەسى مەن كاسىبي ماشىعى بار ەكەنىن اتاپ ءوتتى. سونداي-اق نۇرسۇلتان نازارباەۆ ي.تاسماعامبەتوۆكە اتقارعان جۇمىسى ءۇشىن ريزاشىلىق ءبىلدىرىپ, ەلدىڭ پرەمەر-ءمينيسترىنىڭ ورىنباسارى لاۋازىمىنا تاعايىندالۋىمەن قۇتتىقتادى. سوڭىندا قازاقستان پرەزيدەنتى قاتىسۋشىلارعا ەلدىڭ قورعانىس قابىلەتىن نىعايتۋ, قازاقستان ارمياسىنىڭ جاۋىنگەرلىك دايارلىعىن ارتتىرۋ ىسىندە تابىس تىلەدى. ەگەمەن-اقپارات