بۇگىنگى تاڭدا قازاقستان الىس شەتەلدەن جىلىنا 150 مىڭ توننا المانى يمپورتتايدى. الايدا, وتاندىق ءوندىرىس ەلدەگى سۇرانىستىڭ 30 پايىزىن عانا وتەيدى. وتكەن جىلداردىڭ تاجىريبەسى مەن زاماناۋي تەحنولوگيالاردى پايدالانىپ, قازاقستاننىڭ باعباندىعى جاڭا دامۋ دەڭگەيىنە كوتەرىلىپ, ەلىمىزدىڭ اۋىل شارۋاشىلىق سالاسىنداعى لوكوموتيۆتەردىڭ بىرىنە اينالۋ مۇمكىندىگى بار. تاراز قالاسىندا وتاندىق باعباندىقتى دامىتۋ ماسەلەلەرىنە ارنالعان عىلىمي-پراكتيكالىق سەمينارعا قاتىسۋشىلار وسىنداي پىكىر ايتتى.
قاتىسۋشىلار اۋىل شارۋاشىلىعىن قارجىلاي قولداۋ قورى قارجىلاندىرعان «شايقورىق باۋى» اوك الما باعىمەن تانىستى. جوبا اعىمداعى جىلدىڭ 3 ماۋسىمىندا ىسكە قوسىلدى. باۋدىڭ جالپى اۋدانى – 77 گەكتار, ونىڭ 50 گەكتارىندا گولدەن دەليشەس, ايدارەد, گالا تۇقىمدى الما كوشەتتەرى ەگىلدى. باۋ جىلىنا 3 مىڭ تونناعا دەيىن الما بەرە الادى.
– بۇگىندە جامبىل جانە وڭتۇستىك قازاقستان وبلىستارىندا 6 جوبا جۇزەگە اسىرىلۋدا. ولاردىڭ جالپى الاڭى – 350 گەكتار, جالپى قارجىلاندىرۋ سوماسى – 4 ملرد 480 ملن تەڭگە, – دەيدى «اۋىل شارۋاشىلىعىن قارجىلاي قولداۋ قورى» اق باسقارما توراعاسى جاندار وماروۆ.
ورالحان ءداۋىت