«ماڭگىلىك ەل جاستارى – يندۋسترياعا!» جوباسى شەڭبەرىندە قابىلدانعان «سەرپىن-2050» باعدارلاماسى وبلىستا ويداعىداي ورىندالىپ كەلەدى. جاستاردى جان-جاقتى قولداۋعا ارنالعان باعدارلاما قولدانىسقا ەنگەلى وڭتۇستىك وڭىرلەردەن كەلگەن ءبىر مىڭعا جۋىق تالاپكەر جوعارى جانە ارناۋلى وقۋ ورىندارىندا ءبىلىم الىپ ءجۇر. ىنتالى جاستار بولسا, زامان تالابىنا ساي ماماندىق الىپ شىققاننان كەيىن تەرىسكەيدە قالىپ, جۇمىس ىستەۋدى باستى ماقسات ەتىپ وتىر.
– العاشقى لەك پەتروپاۆل تەمىرجول كولىگى كوللەدجىنە ورنىققان بولاتىن. سودان بەرى ولاردىڭ قاتارى تولىعىپ, سەرپىندى كۇشكە يە بولدى. ستۋدەنتتەردىڭ باسىم بولىگىنىڭ كوپ بالالى وتباسىلاردان شىققانى ەسكەرىلىپ, الەۋمەتتىك قولداۋ ماقساتىمەن مەملەكەت تاراپىنان ارنايى قاراجات ءبولىنگەن. وندا جاتاقحانادا تۇرۋ, ءۇش مەزگىل تاماقتانۋ, ءبىرجولعى كيىنۋ, شاكىرتاقى تولەۋ ماسەلەلەرى قامتىلعان. بۇدان بولەك م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە كۇنگەيدەن ارمان قۋىپ كەلگەن جۇزدەگەن تالاپتى جاستار بار, – دەدى سويلەسكەنىمىزدە وبلىستىق ءبىلىم باسقارماسى كاسىپتىك-تەحنيكالىق ءبىلىم بەرۋ جانە كادرلار دايارلاۋ ءبولىمىنىڭ باسشىسى الما قۇسايىنوۆا.
جۋىردا ەڭ جوعارى ۇپاي جيناۋ ارقىلى تەگىن وقۋ قۇقىنا يە بولعان ۇمىتكەرلەر جوعارى جانە ارناۋلى وقۋ ورىندارىنا سالتاناتتى جاعدايدا قابىلداندى. ەلباسىنىڭ «سەندەر – بولاشاققا دەگەن ۇكىلى ءۇمىتىمىزدىڭ تىرەگىسىڭدەر. ءبىزدىڭ بۇگىنگى اتقارىپ جاتقان قىرۋار شارۋالارىمىز تەك سەندەر ءۇشىن جاسالۋدا. سەندەر تاۋەلسىز قازاق ەلىنىڭ پەرزەنتتەرىسىڭدەر. تاۋەلسىز ەلدە تۋىپ, تاۋەلسىز ەلدە تاربيە الدىڭدار. سەندەردىڭ ازات ويلارىڭ مەن كەمەل بىلىمدەرىڭ – ەلىمىزدى قازىر بىزگە كوز جەتپەس الىستا, قول جەتپەس قياندا كورىنەتىن تىڭ ماقساتتارعا اپاراتىن قۇدىرەتتى كۇش» دەگەن قاناتتى سوزدەرىن تۋ ەتكەن ولار جاقسى وقىپ, ساپالى ءبىلىم الىپ, الدىڭعى لەكتەن كورىنۋدى باستى ماقسات سانايدى. سولاردىڭ ءبىرى قاراشاش جەڭىس «سەرپىن» باعدارلاماسى ارقاسىندا گرانت ۇتىپ الىپ, م.جۇماباەۆ اتىنداعى گۋمانيتارلىق كوللەدجدىڭ ستۋدەنتى اتاندى. بولاشاقتا الەۋمەتتىك قىزمەتكەر بولۋدى ارماندايدى.
پەتروپاۆل قۇرىلىس-ەكونوميكالىق, تەمىرجول كولىگى, ج.قيزاتوۆ اتىنداعى ەسىل اۋىل شارۋاشىلىق, سولتۇستىك قازاقستان كاسىپتىك-پەداگوگيكالىق كوللەدجدەرىنە سۇرانىس مول. اتالعان ءبىلىم ۇيىمدارىندا وقۋ-ماتەريالدىق بازا جاقسى جابدىقتالعان. ءبىلىم بەرۋدىڭ دۋالدى تەحنولوگياسى قولدانىلادى. ءبىر سوزبەن ايتقاندا, ءبىلىم بەرۋ ستاندارتتارى تالاپقا ساي. الما مۇحامەدقاليقىزىنىڭ ايتۋىنشا, اتالمىش باعدارلاما بويىنشا ماماندىق الىپ شىققان تۇلەكتەردىڭ كەدەرگىسىز جۇمىسقا تۇرۋى مەكەمە-كاسىپورىندارمەن ەكىجاقتى ىنتىماقتاستىق كەلىسىم-شارت نەگىزىندە جۇزەگە اساتىن بولادى.
«ماڭگىلىك ەل جاستارى – يندۋسترياعا!» مەملەكەتتىك باعدارلاماسى جۇمىس كۇشى از تەرىسكەيدە كادر جەتىسپەۋشىلىگىن ازايتۋدى, دەموگرافيالىق احۋالدى رەتتەۋدى دىتتەيتىنىن ەسكەرسەك, جىل وتكەن سايىن سەرپىندىكتەر سەرپىلىسىنىڭ ارتىپ كەلە جاتقانى قۋانتادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى