الماتىنىڭ 1000 جىلدىعىنا تارتۋ جاسادى
تامىز اياقتالار تۇستا جەتىسۋ ولكەسىنىڭ كورىكتى جەرلەرىندە 12 ەلدەن كەلگەن, 30-عا تارتا قىلقالام شەبەرى مەن 60-تان استام فوتوسۋرەتشى باس قوسىپ, « ۇلى دالا بوياۋلارى» اتتى حالىقارالىق سيمپوزيۋمدى باستاپ بەرگەن-ءدى. الماتىلىقتار سول سۋرەتشىلەردىڭ قولىنان شىققان عاجايىپ ونەر تۋىندىلارىن تاماشالايتىن كۇن دە كەلىپ جەتتى. سونىمەن, مەگاپوليستەگى «مەگا» ويىن-ساۋىق ورتالىعىندا پلەنەرلىك جۇمىستاردىڭ كورمەسى ءوتتى.
انىعىراعى بۇل سيمپوزيۋم 26 تامىز كۇنى باستاۋ العان بولاتىن. سيمپوزيۋم بارىسىندا سۋرەتشىلەر مەن فوتوسۋرەتشىلەر «كولساي كولدەرى» مەملەكەتتىك ۇلتتىق تابيعي پاركىندە, شارىن شاتقالىندا, «تاڭبالى تاس» قورىعىندا, ۇشقوڭىردا, الاتاۋ بوكتەرىندە, الماتى قالاسى مەن الماتى وبلىسىنىڭ كورىكتى جەرلەرىندە بولىپ, ۇلى دالا – قازاق ەلىنىڭ اسەم جەرلەرى مەن تابيعاتىن, تاۋى مەن دالاسىن سۋرەتكە ءتۇسىرىپ, عاجاپ كورىنىسىن ءار قىرىنان سالدى.
رەسەي, قىتاي, كورەيا, پولشا, ارمەنيا, قىرعىزستان, ۆەنگريا, فينليانديا سياقتى شەت مەملەكەتتەردەن كەلگەن سۋرەتشىلەر ۇلتتىق قورىقتاردىڭ تاريحىمەن, وسىمدىكتەرى جانە جانۋارلار دۇنيەسىمەن دە تانىسىپ, ساياحات جاساپ قايتتى.
كورمەنىڭ اشىلۋىندا اتالمىش شارانىڭ ۇيىمداستىرۋشىسى, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆا: «بۇگىنگى كورمەدە شەتەلدىك سۋرەتشىلەرمەن قاتار, قازاقستاندىق سۋرەتشىلەردىڭ دە تىڭ تۋىندىلارى قويىلىپ وتىر. قازاق دالاسىنىڭ اسەم بەينەسىن, كوركەمدىگى مەن كەرەمەتتىلىگىن كەنەپكە تۇسىرگەن ناعىز تالانتتار – قىلقالام شەبەرلەرىنىڭ سۋرەتتەرى تاريحقا قوسىلعان ۇلەس جانە الماتى قالاسىنىڭ 1000 جىلدىعىنا ۇلكەن تارتۋ بولماق!», دەدى.
وسى ارادا كورمەنى تەگىن ۇيىمداستىرۋعا «Astana Group» كومپانياسىنىڭ پرەزيدەنتى, بەلگىلى كاسىپكەر نۇرلان سماعۇلوۆ پەن «قازاقستان حالىق بانكى» اق ديرەكتورلار كەڭەسىنىڭ ءتوراعاسى الەكساندر پاۆلوۆ مۇرىندىق بولعانىن ايتا كەتكەن ءجون.
«مەن قاشان دا بەينەلەۋ, سۋرەت ونەرىن قادىرلەيمىن, ارقاشاندا قولدايمىن. الماتىنىڭ 1000 جىلدىعىنا ورايلاستىرىلىپ وتىرعان بۇل شاراعا ءبىز دە اتسالىسقانىمىزعا قۋانىشتىمىز. بىرىنەن ءبىرى ەرەكشەلەنەتىن سۋرەتتەردىڭ بارلىعى كوڭىلىمنەن شىقتى, ەرەكشە اسەر الدىم», دەگەن كاسىپكەر-كوللەكتسيونەر نۇرلان سماعۇلوۆ سۋرەتشىلەردىڭ تۋىندىلارىن ويىن-ساۋىق ورتالىعىندا ساتىلىمعا قويۋدى ۇسىندى.
ءبىر اپتاعا جالعاساتىن كورمەگە كەلۋشىلەر سۋرەتشىلەردىڭ تۋىندىلارىن تاماشالاپ قانا قويماي, ساتىپ الۋعا دا مۇمكىندىك الا الادى. كورمەگە پلەنەردە سالىنعان سۋرەتتەرمەن قاتار, قىلقالام شەبەرلەرىنىڭ بوياۋى كەپپەگەن تۋىندىلارى دا قويىلدى. فوتوسۋرەتشىلەر دە ءوز ەلدەرىنەن الا كەلگەن تاڭداۋلى دەگەن ءوز سۋرەتتەرىن ونەرسۇيەر قاۋىم نازارىنا ۇسىندى.
شارا سوڭىندا سيمپوزيۋمعا قاتىسقان سۋرەتشىلەر سەرتيفيكاتتارمەن جانە ارنايى ديپومدارمەن ماراپاتتالدى.
ايناش ەسالي,
«ەگەمەن قازاقستان»
الماتى