جەكسەنبى كۇنى الىستاعى ايىرتاۋ بوكتەرىندە جاتقان جانۇزاق اۋىلىنىڭ تۇرعىندارىن قۋانتقان وقيعاعا كۋا بولدىق. الاقانداي اۋىلدا پارلامەنت ءماجىلىسىنىڭ دەپۋتاتى بەرىك دۇيسەمبينوۆتىڭ تىكەلەي جەتەكشىلىگىمەن سالىنعان جاساندى فۋتبول الاڭى سالتاناتتى تۇردە پايدالانۋعا بەرىلدى. ايتا كەتۋ كەرەك, جاڭا نىسان «اق جول» دەموكراتيالىق پارتياسىنىڭ پارلامەنتتىك فراكتسياسىنىڭ قولداۋىمەن سالىندى.
مۇندا سپورت الاڭىنا ارنالعان بارلىق تەحنيكالىق تالاپ ەسكەرىلگەن. «اقجولدىق» دەپۋتاتتاردىڭ قارجىسىنا تۇرعىزىلعان زاماناۋي نىساننىڭ كولەمى 50/25 مەترگە تەڭ. جاساندى گازونمەن جابىلعان جاسىل الاڭدا اسىر سالعان اۋىل بۇلدىرشىندەرىنىڭ قۋانىشىندا شەك جوق. ءبىز بارعاندا جاڭا كەشەندە اۋىل كوماندالارى اراسىندا فۋتبولدان تۋرنير ءوتىپ جاتىر ەكەن.
– سپورتشىلارىمىز وليمپيادا ويىندارى مەن الەمدىك جارىستاردا ۇزدىك ناتيجەلەر كورسەتىپ ءجۇر. سپورت – ەلىمىزدىڭ مارتەبەسى, جاستارىمىزعا ۇلگى. سوندىقتان, مەملەكەت باسشىسى نۇرسۇلتان نازارباەۆ ايتقانداي, ءار قازاقستاندىق سالاماتتى ءومىر سالتىن ۇستانىپ, سپورتپەن شۇعىلدانۋى ءتيىس. دەگەنمەن, بۇقارالىق سپورت تۇرلەرىنىڭ ءوزى قاراپايىم تۇرعىندارعا قولجەتىمدى بولا بەرمەيدى. سوندىقتان بۇل فۋتبول الاڭى – ءبىزدىڭ اۋىل بالالارى مەن جاسوسپىرىمدەر سپورتىن دامىتۋعا قوسقان ۇلەسىمىز بولماق, – دەدى بەرىك ءدۇيسەمبينوۆ.
اتالعان شاراعا ءماجىلىس دەپۋتاتتارى ازات پەرۋاشەۆ, كەڭەس ابساتيروۆ پەن بولات وتەپباەۆ, ارمان سقابىل ۇلى, راحات التاي سىندى پارتيا مۇشەلەرى جانە اۋدان جۇرتشىلىعى قاتىستى.
دۋمان اناش,
«ەگەمەن قازاقستان»
شىعىس قازاقستان وبلىسى,
ۇلان اۋدانى