وتكەن ايدا اتىراۋ وبلىسىنا جۇمىس ساپارى بارىسىندا «سامۇرىق-قازىنا» اق-تىڭ باسقارما توراعاسى ومىرزاق شوكەەۆ «ۇلتتىق يندۋستريالىق مۇناي-حيميا پاركى» ارناۋلى ەكونوميكالىق ايماعىندا ينۆەستيتسيالىق جوبالاردى جۇزەگە اسىرۋ بارىسىمەن تانىسقان بولاتىن. اتاپ ايتقاندا, قور باسشىسى «Polymer Production» جشس پايدالانۋعا بەرگەن زاۋىتتى ارالاعان ەدى. وسى ورايدا ول قانداي زاۋىت جانە نەندەي ونىمدەر شىعارماق دەگەن ساۋالدىڭ تۋىنداۋى دا ورىندى.
اتالمىش جوبا پوليمەر ءونىمدەرىنىڭ بىرقاتار تۇرلەرىن ءوندىرۋدى قاراستىرادى. مۇندا جىلىنا 14 738 توننا بياكسيالدى باعىتتاعى پوليپروپيلەندى (ببپپ) قابىق, جىلىنا 4 125 توننا پوليەتيلەن قابىعى جانە جىلىنا 48 ملن دانا پوليپروپيلەن قابى شىعارىلماق. ببپپ قابىعى قازاقستاندا العاش رەت ءوندىرىلىپ وتىر. قابىق اۋىل شارۋاشىلىعىندا, قۇرىلىس سالاسىندا, ازىق-ت ۇلىك وندىرىسىندە, بولشەك ساۋدادا قولدانىلادى. جوبانىڭ قۇنى 90 ملن اقش دوللارىنا جۋىق.
حالىقتىڭ قولدانۋىنا ارنالعان وندىرىستەردىڭ اۋقىمىن كەڭەيتۋدە اتىراۋ وبلىسىنداعى بىرىكتىرىلگەن گاز-حيميا كەشەنىنىڭ قۇرىلىسى ەلەۋلى وقيعا بولماق. جوبا تەڭىز كەن ورنىنداعى شيكىزاتتى تەرەڭ وڭدەۋگە باعىتتالعان. قۇنى – 2,6 ملرد اقش دوللارى. ناتيجەسىندە قازاقستاندا پوليپروپيلەن ءوندىرىسى جولعا قويىلماق. بۇل امبەباپ ماتەريالدى ەلەكترتەحنيكا, ماشينا قۇراستىرۋ, ونەركاسىپتىك جانە كوممەرتسيالىق قۇرىلىس سالالارىندا كەڭىنەن قولدانۋعا بولادى.
اتالعان وندىرىستەردىڭ اۋقىمدىلىعى مەن كاپيتال سىيىمدىلىعىن ەسكەرە وتىرىپ, نەسيە قاراجاتىن تارتۋ كوزدەلۋدە. بۇل ورايدا ءتيىستى ينفراقۇرىلىمنىڭ قامتاماسىز ەتىلۋى شەتەلدىك ينۆەستورلار مەن نەسيە بەرۋشىلەر تاراپىنان باستى تالاپ بولىپ تابىلادى.
ارناۋلى ەكونوميكالىق ايماقتىڭ وندىرىستىك ينفراقۇرىلىمىن قالىپتاستىرۋ ماقساتىندا جاڭا نىساندار سالۋ جوسپارلانعان. ولار قۋاتتىلىعى 310 مۆت گاز-تۋربينالى ەلەكتر ستانساسى, تەحنيكالىق گازداردى ءوندىرۋ كەشەنى, سۋدى ازىرلەۋ مەن تازالاۋ كەشەنى.
ال جالپى زاۋىتتىڭ ينفراقۇرىلىمىن قالىپتاستىرۋ ءۇشىن كەدەندىك تەكسەرۋ ايماعى بار باقىلاۋ-وتكىزۋ ءمودۋلى, قاتتى تۇرمىستىق شىعىنداردىڭ پوليگونى, ءورت ءسوندىرۋ دەپوسى, جوندەۋ-قۇرىلىس تسەحى, ساقتاۋ قويماسى, الاڭ ءىشىندەگى سۋ, گاز, ەلەكتر, جىلۋ جەلىلەرى بار نىساندار بوي كوتەرمەك.
ينفراقۇرىلىم نىساندارىنىڭ ورتالىقتاندىرىلعان قۇرىلىسى جانە پايدالانىلۋى ەسەبىنەن كۇردەلى شىعىنداردى وتەۋگە, مودۋلدىك قۇرىلىستى ءىسكە اسىرۋعا, مۇناي-حيميا جوبالارىنىڭ تيىمدىلىگىن كوتەرۋگە مۇمكىندىك تۋادى.
قور باسشىسى ساپار بارىسىندا, سونىمەن قاتار پوليەتيلەن, بۋتاديەن جانە سينتەتيكالىق كاۋچۋك وندىرۋگە باعىتتالعان جوبالاردىڭ الداعى دامۋ جوسپارلارىن تالقىلادى. بارلىق جوبالاردى «بىرىككەن حيميالىق كومپانيا» جشس جۇزەگە اسىرادى. اتقارىلعان جۇمىستاردىڭ ارقاسىندا ەلدىڭ باتىسىندا قۇرىلىس جۇرگىزۋ كەزىندە 9 مىڭنان استام جۇمىس ورنى قۇرىلادى, ال نىساندار پايدالانۋعا تاپسىرىلعاننان كەيىن 2 مىڭعا جۋىق ادام ەڭبەكپەن قامتىلماق.
مەرەكە تاڭاتاروۆ