ينۆەستيتسيالار جانە دامۋ مينيسترلىگىنىڭ مالىمەتىنشە, قازاقستاندىق جاس گەولوگتار كومانداسى 20-27 تامىز ارالىعىندا جاپونيادا وتكەن IESO – 2016 جەر تۋرالى حالىقارالىق عىلىمي وليمپياداسىنان جۇلدەمەن ورالدى.
وليمپياداعا ەلىمىزدىڭ اتىنان 4 وقۋشى قاتىسقان. استانا قالاسى №4 گيمنازيا-مەكتەبىنىڭ 10-سىنىپ وقۋشىسى ءاليا جاعىپاروۆا جەكە سىناقتا قولا مەدالعا قول جەتكىزدى, سونداي-اق حالىقارالىق كوماندا قۇرامىندا جەر تۋرالى عىلىمدار جونىندەگى جوبادا بىرىنشى ورىنعا يە بولدى.
نازارباەۆ زياتكەرلىك مەكتەبىنىڭ 10-سىنىپ وقۋشىسى بايمۋرزينا ءاديا ITFI (حالىقارالىق كوماندالىق دالالىق زەرتتەۋ) سايىسىندا ۇزدىك اتاندى.
سونىمەن قاتار, نازارباەۆ زياتكەرلىك مەكتەبىنىڭ 10-سىنىپ وقۋشىلارى ايمۋحامبەتوۆا ءازيزا مەن تولەگەنوۆا ارۋجان دا بارلىق سايىستارعا بەلسەندى قاتىسىپ, ەلىمىزدى لايىقتى دەڭگەيدە تانىتا الدى.
«جاس گەولوگ» كورپوراتيۆتىك قورىنىڭ ديرەكتورى جانات يسمايلوۆانىڭ ايتۋىنشا, قازاقستان كوماندانىڭ ۇلتتىق كوستيۋممەن ونەر كورسەتۋى وليمپيادانىڭ جابىلۋ سالتاناتىنا ارنالعان گالا-كونتسەرتكە ەرەكشە كورىك بەردى. سونداي-اق, وليمپيادا اياسىندا قاتىسۋشىلار مەن قوناقتاردى ەكسپو 2017 كورمەسىنە شاقىرۋ رەتىندە ءبىزدىڭ قوناقجاي ەلىمىز تۋرالى بەينەروليك كورسەتىلدى.
ايدار ورىسباەۆ