«قازاقستان» تەلەراديوكورپوراتسياسىنىڭ جاڭا ماۋسىمى ەل تاۋەلسىزدىگىنىڭ 25 جىلدىعىنا ارنالادى
اپتا باسىنداعى ايشىقتى وقيعانىڭ ءبىرى – ۇلتتىق ارنانىڭ جاڭا تەلەماۋسىمىنىڭ تۇساۋكەسەرلىك «بۇل – مەنىڭ قازاقستانىم!» اتتى كەشى بولدى. الماتىداعى بارشا زيالى قاۋىمنىڭ باسىن قوسقان سالتاناتتى جيىندا «قازاقستان» تەلەراديوكورپوراتسياسى بۇل ماۋسىم ەل تاۋەلسىزدىگىنىڭ 25 جىلدىعىنا ارنالاتىندىعىن اتاپ كورسەتتى.
ءبىر جاعىنان كورەرمەندەرمەن قاۋىشۋ, ەكىنشى جاعىنان تالعامپاز ورتانى شىعارماشىلىق باستامالارمەن تانىستىرۋ سيپاتىندا وتكەن كەش ۇلتتىق ارنانىڭ وتكەنى مەن بۇگىنىن سارالاپ, تاماشا ۇسىنىستار, اقىل-كەڭەستەردەن دە كەندە بولعان جوق.
كەشكە «قازاقستان» رترك» اق باسقارما ءتورايىمى نۇرجان مۇحامەدجانوۆا قاتىسىپ, زيالىلارمەن ديدارلاسىپ, جاڭا ماۋسىمنىڭ جاي-جاپسارى تۋرالى كەڭىنەن باياندادى.
مەملەكەت ءومىرىنىڭ ايناسى ىسپەتتەس ۇلتتىق تەلەارنا كومانداسىنا ۇلتتىق عىلىم اكادەمياسىنىڭ اكادەميگى, پروفەسسور, تورەگەلدى شارمانوۆ, قازاقستاننىڭ حالىق ءارتىسى ءسابيت ورازباەۆ, وليمپيادا چەمپيونى جاقسىلىق ءۇشكەمپىروۆ, قازاقستان جازۋشىلار وداعى توراعاسىنىڭ ورىنباسارى مارالتاي رايىمبەك ۇلى ءسوز سويلەپ, ءوز سالالارىنا قاتىستى ۇسىنىقتى ويلارىن ورتاعا سالدى.
قاراپ وتىرساق, ۇلتتىق ارنا – ۇلت تۇلعالارىنىڭ دا ءجۇرىپ وتكەن جولىنىڭ عۇمىرناماسى. قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, ءانشى-كومپوزيتور ەسكەندىر حاسانعاليەۆ مادەني باعدارلامالارعا قاتىستى پىكىرىن ايتىپ, ءوزى وسى ارنادا 46 جىل اۋەلەتكەن «اتامەكەن» ءانىن شىرقادى.
كەش بارىسىندا تەلەارنا جەتەكشىسى ن.مۇحامەدجانوۆا «قازاقستان» ۇلتتىق ارناسىنىڭ 2016-2017 جىلدارعا ارنالعان تۇساۋكەسەرىن وتكىزۋ – كورپوراتسيا ءۇشىن ءبىر جاعىنان ۇلكەن جاۋاپكەرشىلىك بولسا, ەكىنشى جاعىنان مەرەيلى مىندەت ەكەنىن ايتتى.
«تاۋەلسىزدىكتىڭ 25 جىلدىق تويى قارساڭىندا مەرەكەلىك ماۋسىمداعى ؟باعدارلامالار مەن تەلەتۋىندىلاردى تانىستىرۋدى ازاتتىققا بەسىك بولعان ارۋ قالادان باستاعاندى دۇرىس سانادىق. جانە تاياۋ كۇندەرى الماتى ءوزىنىڭ 1000 جىلدىق تويىن وتكىزەدى. ون عاسىر بويى تاريحتان ويىپ تۇرىپ ورىن العان قالانىڭ قۋانىشىنا ۇلەس قوسۋدى ءوزىمىزدىڭ ازاماتتىق پارىزىمىز دەپ بىلەمىز. ۇشىنشىدەن, سوناۋ 1958 جىلى تەلەۆيزيا سالاسىنا بەسىك بولعان دا وسى قالا. سوڭعى جىلدارى ءبىزدىڭ كورپوراتسيا تۇراقتى تۇردە استانادا جۇمىس ىستەپ جاتقانىمەن, الماتى ءبىزدىڭ ۇجىم ءۇشىن ۇشقان ۇيا, تۇلەتكەن ىستىق مەكەن سانالادى. تاعى ءبىر سەبەپتى ايتا كەتەيىن, ءبىزدىڭ ەلباسىنىڭ تىكەلەي تاپسىرماسى بويىنشا بارلىق حاباردى مەملەكەتتىك تىلدە تاراتىپ كەلە جاتقانىمىزعا بيىل 1 قىركۇيەكتە 5 جىل تولدى. ۇلتتىڭ زيالى قاۋىمىنىڭ قايماعى الماتىدا توپتاسقان سوڭ ءبىز قازاق تىلىندەگى جاڭا جانە جاڭارعان باعدارلامالارىمىز بەن ەندى ءتۇسىرىلىپ بىتكەن تەلەسەريالدارىمىزدى وزدەرىڭىزدىڭ اق باتالارىڭىزبەن باستاعاندى ءجون كوردىك», – دەدى نۇرجان جالاۋقىزى.
باسقارما ءتورايىمى تەلەارنا ءونىمدەرىنە دە توقتالدى: «تەلەۆيزيانىڭ حابارلارى بەرىلۋىنە قاراي كۇندەلىكتى, اپتالىق جانە ءبىر جولعى بولىپ بولىنەتىنىن بىلەسىزدەر. ءبىزدىڭ كۇندەلىكتى بەرىلەتىن باعدارلامالارىمىز «تاڭشولپانمەن» باستالىپ, «تۇنگى ستۋديادا نۇرلان قويانباەۆپەن» اياقتالادى.
ونىڭ اراسىندا «بىرگە تاڭدايمىز!» بەن «ايەل باقىتى», «ايتۋعا وڭاي...» باعدارلامالارى جانە بىرنەشە رەت جاڭالىقتار توپتاماسى قايتالانادى. بۇل باعدارلامالار جاڭا ماۋسىمدا جالعاسادى. كورەرمەنگە بيلىكتى نەعۇرلىم جاقىنداتۋ بيىلعى جىلدىڭ باستى ۇستانىمى بولماق. بۇعان اپتا سايىن شىعاتىن «سەرپىلىس», «قوعامدىق كەڭەس» جانە «سۇحبات» باعدارلامالارى دالەل بولادى. ەلباسى ەل الدىنا قويعان بەس ينستيتۋتتىق رەفورمانى جۇزەگە اسىرۋ بويىنشا قازىر بارلىق ايماقتاردا قوعامدىق كەڭەستەر جۇمىس ىستەيدى. مۇندا تالقىلانعان تاقىرىپتار ءبىزدىڭ اپتالىق «قوعامدىق كەڭەس» اتتى جاڭا باعدارلامامىزدىڭ وزەگىنە اينالادى. ال اركىم ءوز كوكەيىندە جۇرگەن ساۋالعا تۋرا جاۋاپ الۋى ءۇشىن وسى ايدان باستاپ «سۇحبات» اتتى تىكەلەي ەفيردە وتەتىن باعدارلاما اشىپ جاتىرمىز. جاڭا ماۋسىمدا تالانتتى اقىن قالقامان سارين جۇرگىزەتىن «وي-تولعاۋ» باعدارلاماسى ەفيرگە شىعادى», – دەدى ن.مۇحامەدجانوۆا.
جەكە جوبالارعا دا توقتالعان باسقارما ءتورايىمى: «تەلەۆيزيانى سىناعاندار كوبىنەسە «بۇلار شەتەل جۇلدىزدارىنا تابىنعىش» دەپ جاتادى. «قازاقستان» ۇلتتىق ارناسى ءوز ءتورىن تەك ۇلتىمىزدىڭ ونەرلى, تالانتتى تۇلعالارىنا ۇسىنادى. بيىلعى ماۋسىمدا « ۇلى دالا بالاسى» اتتى جوبا تابىستى ءجۇرىپ جاتىر. وندا ءانشى تورەعالي تورەالى قازاقستاننىڭ ءبىرنەشە ايماعىندا بولىپ, ەل ءومىرىنىڭ جاقسىلىققا قاراي وزگەرگەنىنە كۋا بولدى. ەل تاۋەلسىزدىگىنىڭ 25 جىلدىعىنا ارنالعان بۇل ارنايى جوبامىزدىڭ رەيتينگى وتە جوعارى. ۇلتتىق ونەرگە دەگەن قامقورلىقتىڭ جانە ءبىر كورىنىسى جاقىن كۇندەرى ەكرانعا جول تارتاتىن «مۋزارت LIVE» جوباسى. ونداعان جىل بويى بارشاڭىزدى ءانمەن تەربەگەن اتالمىش توپتىڭ ءمۇشەلەرى ەندى بۇكىل قازاق دالاسىنان وزدەرى سياقتى تالانتتى جاستاردى ىزدەيدى», – دەدى.
سونداي-اق, بىرنەشە جىلدان بەرى ۇلتتىق ارنا وتاندىق تەلەسەريالدار ءتۇسىرۋدى قولعا العانى بەلگىلى. كورەرمەن جىلى قابىلداعان «سىرعالىم», «قاراشاڭىراق», «كوك تارلاندارى», «اياۋلى ارمان», «اپكە» سىندى سەريالدار ابدەن تانىس. تەلەارنا ۇستىمىزدەگى جىلدىڭ باسىندا اقىن جامبىل جاباەۆ تۋرالى ءتورت ءبولىمدى دەرەكتى دە كوركەم فيلم تۇسىرگەن. ونىڭ ءبىر جارىم ساعاتتىق نۇسقاسى كينوتەاترلاردا كورسەتىلدى.
«قازاقستاننىڭ تاۋەلسىزدىك جىلدارىندا ءجۇرىپ وتكەن جولى ەشكىمنىڭ ويىنان شىقپاۋى كەرەك. وسىنى ەسكەرە وتىرىپ, ءبىز كوپ سەريالى «ايمان-شولپان» تەلەحيكاياسىن تۇسىردىك. الداعى كۇندەرى ەفيرگە شىعاتىن تاعى ءبىر سەريال «شەكارا شەبىندە» دەپ اتالادى. مىنە, مەرەيلى دە مەرەكەلى جىلى سىزدەردىڭ الدارىڭىزعا ۇسىناتىن ونىمدەرىمىزدىڭ ءبىر بولىگى وسىنداي. «بۇل – مەنىڭ قازاقستانىم!» دەپ بارشامىز ماقتانىپ جۇرەيىك!» – دەپ ءسوزىن اياقتاعان باسقارما ءتورايىمىنىڭ ءسوزىن تۇلعالى ازاماتتار تاماشا وي-پىكىرلەرگە ۇلاستىردى.
«ءبىز 100 پايىز مەملەكەتتىك تىلدە حابار تاراتاتىن وسىنداي ۇلتتىق ارنانى ارمانداعانبىز!», – دەدى مەملەكەتتىك سىيلىقتىڭ لاۋرەاتى, جازۋشى دۋلات يسابەكوۆ.
ايتا كەتۋ كەرەك, جاڭا تەلەماۋسىم كەشى بارىسىندا قازاقستاننىڭ ەڭبەك سىڭىرگەن ارتىستەرى جانە «قۇرمانعازى» وركەسترى مەن «حاسساق» ەتنوفولكلورلىق توبى ونەر كورسەتتى. تانىمال ونەر ادامدارى اننەن شاشۋ شاشتى.
ايناش ەسالي,
«ەگەمەن قازاقستان»
الماتى