تەاتر جاڭالىقتارىنان قۇلاعى تۇرىك جۇرەتىن جاندار م.اۋەزوۆ اتىنداعى قازاق مەملەكەتتىك اكادەميالىق دراما تەاترى ءوزىنىڭ 90 جىلدىعى اياسىندا كوكتەمدە جەتىسۋ وڭىرىنە ونەر ساپارىمەن بارىپ, تالدىقورعان جانە تەكەلى قالالارىنان تابىستى ورالعانىن ۇمىتا قويعان جوق.
تەاتر وسى ءۇردىستى جالعاستىرىپ, الداعى ۋاقىتتا ماڭعىستاۋ وبلىسىنا گاسترولگە اتتانعالى وتىر.
سونىمەن اتالمىش تەاتر 22-26 قىركۇيەك كۇندەرى جاڭاوزەن قالاسىنا, 28 قىركۇيەك پەن 7 قازان ارالىعىندا اقتاۋ قالاسىنا قاراي جول تارتپاق. بۇل جولى دا تەاتر ۇجىمىن تەاتردىڭ كوركەمدىك جەتەكشىسى, كسرو حالىق ءارتىسى ءاسانالى ءاشىموۆ پەن تەاتر ديرەكتورى, قازاقستاننىڭ ەڭبەك سىڭىرگەن قايراتكەرى ەرلان ءبىلال باستاپ بارادى.
تاۋەلسىزدىكتىڭ 25 جىلدىعى قارساڭىندا باتىس وڭىرگە باعىت العان اۋەزوۆ تەاترى جاڭاوزەن, اقتاۋ قالالارىنداعى كورەرمەندەرىنە ارناپ 7 بىردەي سپەكتاكل اپارا جاتىر.
ءبىرىن ءبىرى قايتالامايتىن تاماشا قويىلىمداردىڭ تاقىرىبى دا, كوتەرەتىن ماسەلەسى دە ءار الۋان.
تەاتر ۇجىمى ۇلى اقىننىڭ تاعدىر تالايىنان سىر شەرتەتىن «اباي» تراگەدياسى, قازاق قىزىنىڭ قايسارلىعىن پاش ەتەتىن تۇتقىنداعى ارۋ – «تاڭسۇلۋ» ءافساناسى, قاتارداعى قۇلدان مىسىردىڭ بيلەۋشىسىنە كوتەرىلگەن دەشتى قىپشاق ۇلانى سۇلتان از-زاحير بەيبارىستىڭ ءومىرى سۋرەتتەلەتىن «بەيبارىس سۇلتان» تاريحي دراماسى, تاۋەلسىزدىكتىڭ ەلەڭ-الاڭى مەن ەلدىڭ ەرتەڭى تۋرالى تولعايتىن «قىز مۇڭى» دراماسى, باۋىر ەتى بالاسى ءۇشىن قۇربان بولعان انا مەن نامىستان تەنتىرەپ كەتكەن وتاعاسىنىڭ جان كۇيزەلىسى ارقاۋ بولعان «تەندەرگە تۇسكەن كەلىنشەك» دراماسى, باقىتتى كەزدەسۋلەرى بايانسىز قوشتاسۋلارعا ۇلاسقالى تۇرعان جاستاردىڭ سەزىمدەرى تۋرالى سىر شەرتەتىن «قوشتاسقىم كەلمەيدى...» دراماسى, تۇركى ءدۇنيەسىنىڭ ورتاق تۇلعاسى قوجاناسىر جايلى «قوجاناسىر ءتىرى ەكەن...» مۋزىكالىق كومەدياسى شالعايداعى كورەرمەندەر كوڭىلىنەن شىعاتىنىنا سەنەدى.
پەسالار جاڭاوزەن قالاسىندا «مۇنايشى» مادەنيەت ۇيىندە, اقتاۋ قالاسىندا ماڭعىستاۋ وبلىستىق ن.ءجانتورين اتىنداعى قازاق مۋزىكالىق دراما تەاترىنىڭ عيماراتىندا قويىلادى. سپەكتاكلدەردە قازاقستاننىڭ ەڭبەك سىڭىرگەن ءارتىسى ايدوس بەكتەمىر, قازاقستاننىڭ حالىق ءارتىسى گۇلنار جاقىپوۆا, قازاقستاننىڭ ەڭبەك سىڭىرگەن قايراتكەرلەرى بەكجان تۇرىس, ازات سەيتمەتوۆ, اسىلبەك بورانباي, ءداريا ءجۇسىپ, ازامات ساتىبالدى سىندى كورەرمەن قاۋىمعا تەاتر جانە تەلەەكران ارقىلى تانىلىپ جۇرگەن بەلدى ارتىستەر مەن قازاق تەاتر ونەرىنىڭ مايتالماندارى باستاعان كوشكە جاڭادان قوسىلعان جاس بۋىن وكىلدەرى ونەر كورسەتپەك.
ايناش ەسالي,
«ەگەمەن قازاقستان»
الماتى