ۇلتتىق اكادەميالىق كىتاپحانادا قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى, حالىقارالىق جوعارى مەكتەپتەر عىلىمي اكادەمياسىنىڭ قۇرمەتتى اكادەميگى, فيلولوگيا عىلىمدارىنىڭ دوكتورى, پروفەسسور تۇرسىنبەك كاكىشەۆتىڭ جەكە كىتاپحاناسى – «عالىم» زالى اشىلدى. وسى شارا اياسىندا «ماعجان – ساكەن» كىتابىنىڭ تۇساۋى كەسىلدى.
ىزگىلىككە تولى ءىس-شاراعا مادەنيەت جانە سپورت ءمينيسترى ارىستانبەك مۇحامەدي ۇلى, پارلامەنت سەناتى مەن ءماجىلىسىنىڭ دەپۋتاتتارى, ەلىمىزدىڭ زيالى قاۋىم وكىلدەرى قاتىسىپ, عالىم جايلى ەستەلىكتەرىمەن ءبولىستى.
وتكەن جىلى ومىردەن وزعان عالىمنىڭ جەكە كىتاپحاناسىندا گۋمانيتارلىق عىلىمدار بويىنشا بەس مىڭعا جۋىق كىتاپ, سونداي-اق بەلگىلى جازۋشىلار ساكەن سەيفۋللين, ءسابيت مۇقانوۆتىڭ ءومىرى مەن قىزمەتىنە قاتىستى قۇندى مۇراعاتتىق قۇجاتتار بار. عالىمنىڭ قولجازبالارى مەن باسقا دا ماتەريالدارىنان قۇرالعان 83 پاپكا قۇجات كىتاپحاناعا تارتۋ ەتىلدى.
تۇرسىنبەك كاكىشەۆتىڭ جەكە كىتاپحاناسىنىڭ تابىستالۋى – ۇلتتىق اكادەميالىق كىتاپحانانىڭ تاعىلىمعا تولى ءداستۇرىنىڭ جالعاسى, كىتاپحانا قورىن بايىتا تۇسۋدەگى ماڭىزدى قادام دەۋگە بولادى. تۇرسىنبەك كاكىشەۆتىڭ جەكە كىتاپحاناسىنىڭ اشىلۋىنا عالىمنىڭ جۇبايى, فيلولوگيا عىلىمدارىنىڭ دوكتورى, پروفەسسور كۇلاش سادىققىزى احمەت مۇرىندىق بولدى.
راۋان قايدار,
«ەگەمەن قازاقستان»