بۇگىن ءتۇن ورتاسى اۋا ريو-دە-جانەيروداعى «ماراكانا» ستاديونىندا پاراليمپيالىق ويىنداردىڭ سالتاناتتى جاعدايداعى اشىلۋ ءراسىمى بولدى. مۇندا دا قاتىسۋشى سپورتشىلار دەلەگاتسياسىنىڭ وكىلدەرى شەرۋلەتىپ ءجۇردى. قازاقستان تۋىن سۋدا ءجۇزۋشى ءانۋار احمەتوۆ كوتەرىپ ءوتتى.
وسىناۋ اتاقتى سپورت ارەناسىندا مۇنىڭ الدىندا XXXI جازعى وليمپيالىق ويىنداردىڭ اشىلۋ جانە جابىلۋ سالتاناتى بولىپ وتكەن ەدى. ەندى پاراليمپياداشىلار دا سول ساڭلاقتار شىققان جارىس جولدارىندا كۇش سىناسادى. ولار سايىستىڭ 22 تۇرىنەن 528 مەدال جيىنتىعىن ساراپقا سالادى. باعدارلامادا اكادەميالىق ەسكەك ەسۋ, وتىرىپ باسكەتبول, ۆولەيبول, رەگبي جانە تەننيس ويناۋ, اربا ۇستىندە سەمسەرلەسۋ, بوچچە, ۆەلوسپورت, اتپەن ءجۇرۋ, گولبول, دزيۋدو, جەڭىل اتلەتيكا, ۇستەل تەننيسى, جەلكەن سپورتى, پاۋەرليفتينگ, سۋدا ءجۇزۋ, مىلتىق اتۋ, ساداق اتۋ, بەس ادامدىق فۋتبول, جەتى ادامدىق فۋتبول سياقتى سپورت تۇرلەرى بار. بۇلاردان باسقا, وسى جولى العاش رەت بايداركا مەن كانوەدا ەسكەك ەسۋ, ترياتلون سايىستارى دا باعدارلاماعا ەنىپ وتىر.
ريودا وتانىمىزدىڭ نامىسىن جۇزۋشىلەر ءانۋار احمەتوۆ (استانا), رومان اگالاكوۆ (وڭتۇستىك قازاقستان), ءزۇلفيا عابيدۋللينا (جامبىل), ناتاليا زۆياگينتسەۆا (قاراعاندى), پاۋەرليفتينگىشىلەر ۆاديم دۋكارت (اقمولا), گۇلبانۋ ابدىحالىقوۆا (الماتى), راۋشان قويشىباەۆا (الماتى وبلىسى), دزيۋدوشىلار ءانۋار ساريەۆ (اتىراۋ),ورىنباسار قۇرالباي (وڭتۇستىك قازاقستان), جەڭىل اتلەتتەر امانات قالقاەۆ (الماتى), ساداقشى الەكساندر مەدۆەدەۆ (پاۆلودار) قورعايدى.
پاراليمپيادا باسەكەلەرى 8 قىركۇيەكتە باستالىپ, 18-ىندە اياقتالادى.