مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن «ءتىل الەمى» اتتى جاڭا پورتال جانە ونوماستيكا سالاسىنا ارنالعان – «اtau.kz», ورفوگرافياعا ارنالعان – «ەmle.kz», سونداي-اق تەرمينولوگيا بويىنشا «termincom.kz» سايتتارى ىسكە قوسىلدى.
استاناداعى ۇلتتىق اكادەميالىق كىتاپحانادا وتكەن اتالعان ۆەب-رەسۋرستاردىڭ تۇساۋكەسەر راسىمىنە پارلامەنت دەپۋتاتتارى مەن قوعام قايراتكەرلەرى, ءتىل ماماندارى, جۋرناليستەر قاتىستى.
جاڭا پورتالداردىڭ كومەگىنە قازاقستان تۇرعىندارىنان بولەك, قىتايدا, موڭعوليادا, وزبەكستاندا, تۇرىكمەنستاندا, تۇركيادا جانە ەۋروپا ەلدەرىندە تۇراتىن دياسپورا وكىلدەرى دە جۇگىنە الادى.
تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى قۋانىش اسىلوۆتىڭ ايتۋىنشا, ءتىلدى ناسيحاتتاۋ ەشقاشان ماڭىزىن جويمايتىن تاقىرىپ. «بۇل جوبا اياسىندا سىزدەر مەملەكەتتىك ءتىل, سونداي-اق ەلىمىزدە تۇراتىن ەتنوس تىلدەرى تۋرالى جاڭالىقتارمەن, ءتىل ۇيرەنۋگە ارنالعان ەڭبەكتەرمەن, ەلىمىزدەگى تىلدىك احۋالمەن, تىلگە قاتىستى وي-پىكىرلەرمەن, اۋديو جانە بەينە ماتەريالدارمەن, جالپى العاندا, ەلىمىزدەگى تىلدەردىڭ تىنىس-تىرشىلىگىمەن بارىنشا تولىعىراق تانىسا الاسىزدار» دەيدى ول.
ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق-ۇيلەستىرۋ ادىستەمەلىك ورتالىعىنىڭ ديرەكتورى ەربول تىلەشوۆتىڭ ايتۋىنشا, پورتالدى اشۋداعى نەگىزگى ماقسات 2011-2020 جىلدارداعى ءتىلدەردى دامىتۋ ستراتەگياسىن جۇزەگە اسىرۋ بولىپ تابىلادى.
القالى جيىنعا قاتىسقان ءتىل جاناشىرلارى بۇل باستامانىڭ مەملەكەتتىك ءتىلدىڭ قولدانۋ اياسىن كەڭەيتە تۇسۋدەگى ماڭىزىنا توقتالىپ, پورتال جۇمىسىنا تابىس تىلەدى.
«ەگەمەن-اقپارات»