ادام ءومىرى سان تاراۋ جولداردان وتەدى. سول جولداردىڭ ەڭ باستىسى – ادامنىڭ ومىرىنە قۋات بەرەتىن ەڭبەك جولى ەكەنى ءسوزسىز. ارامىزدا بار عۇمىرىن ءبىر عانا سالانى ورىستەتۋگە ارناپ, ءبىر عانا دارا جولدى تاڭدايتىن ادامدار ءجۇر. ءوندىرىستىڭ قايناعان ورتاسىندا شىنىققان جاندار جايلى اڭگىمە ءتىپتى, ەرەكشە. ەلىمىزدىڭ ەنەرگەتيكا سالاسىنداعى ەڭ ءىرى كاسىپورىننىڭ ءبىرى – ەۋرازيالىق توپ (ERG) قۇرامىنداعى «ەۋرازيالىق ەنەرگەتيكالىق كورپوراتسياسى» اق باسشىسى ابدۋازيم رۋستامباەۆ جايلى مىنە, ءدال سولاي دەۋىمىزگە ابدەن بولادى.
ابدۋازيم ابۋدعاني ۇلىنىڭ وندىرىستەگى, ەنەرگەتيكا سالاسىنداعى ەڭبەك جولى سوناۋ 1996 جىلى پاۆلودار وبلىسىنداعى اقسۋ جىلۋ ەلەكتر ستانساسىنىڭ باس ديرەكتورى بولۋىمەن ەرەكشەلەنەدى. ارادا ءۇش جىلدان كەيىن «ەۋرازيالىق ەنەرگەتيكالىق كورپوراتسياسى» اق پرەزيدەنتى قىزمەتىنە تاعايىندالادى.
– 1996 جىلى اقسۋعا كەلگەن كەزىمدە, كاسىپورىنداعى جاعداي مۇشكىل بولاتىن. ستانساداعى №2 ەنەرگوبلوك تولىقتاي توقتاپ تۇرعان ەدى. ويتكەنى, ونى قالپىنا كەلتىرۋگە, كۇردەلى جوندەۋگە قارجى جوق. ال كاسىپورىن جۇمىسشىلارى كوڭىل كۇيلەرى تومەن, جاعداي قالاي بولار ەكەن دەگەن ۋايىممەن ءجۇردى. تسەحتاردىڭ ءىشى بوس قالعان, وتە قيىن جاعداي ەدى. ارينە, مۇنىڭ ءبارىن دە ءوز كوزىڭمەن كورۋ وڭاي ەمەس. قيىن بولدى, بىراق, جۇمىسشىلارىمىز كاسىبىن تاستاپ كەتكەن جوق. ايلار بويى ەڭبەكاقى الماسا دا, ءبارىبىر جۇمىسقا كەلدى. ولار كاسىپورىننىڭ توقتاپ قالمايتىنىنا سەنىممەن قارادى. مۇندا جۇمىس ىستەۋگە ءۇش ايعا ۋاقىتشا دەپ جىبەرگەن ەدى. سودان كەيىن باسشىلىققا باسقا ادام كەلەدى دەپ ۋادە بەرگەن. بىراق, تاعدىر, ەڭبەك جولى دەگەن وسى ەكەن. ءبىز ەڭبەك ۇجىمىمەن بىرگە بارلىق قيىندىقتى ەڭسەردىك, جاقسى كۇندەر كەلەتىنىنە سەندىك. ال قازىر, العاش كەلگەننەن بۇگىنگى كۇنگە دەيىن كاسىپورىن جانە ەڭبەك ادامدارى ءوز تۋعانىڭداي بولىپ كەتەدى ەكەن, – دەپ ەسكە الادى ا.رۋستامباەۆ.
ايتسا, ايتقانداي-اق, ۇلكەن سەنىم الدامادى. كورپوراتسيا بيىل ەكى بىردەي مەرەيتويدى قارسى الۋدا. بۇل ارينە, ەڭ الدىمەن ەل تاۋەلسىزدىگىنىڭ 25 جىلدىعى, ال ەكىنشىسى – كورپوراتسيانىڭ قۇرىلعانىنا 20 جىل تولادى. كومپانيانىڭ قۇرىلۋ كەزەڭى سوناۋ 96-شى جىلى ەلىمىزدىڭ ەڭسە تىكتەپ, دامۋ جولىنا تۇسكەن كەزەڭىمەن سايكەس كەلدى. سودان بەرى كاسىپورىندى 20 جىل بويى باسقارعان ابدۋازيم رۋستامباەۆ ءومىرىن وندىرىسكە ارناپ, الىپ كاسىپورىننىڭ قالىپتاسىپ, وركەندەۋىنە ولشەۋسىز ۇلەس قوستى. ماسەلەن, اقسۋ ەلەكتر ستانساسى بيىلعى جارتى جىلدا 7 ملرد كيلوۆاتت-ساعاتتان استام ەلەكتر قۋاتىن وندىرسە, «شىعىس» كومىر كەنىشىندە 7,7 ملن تونناعا جۋىق كومىر قازىپ الىنىپتى. بۇل كومپانيانىڭ دامۋىنا ۇلەس قوسىپ كەلە جاتقان ا.رۋستامباەۆتان باستاپ بۇكىل ۇجىم جۇمىسىنىڭ ناتيجەسى. بۇگىندە كاسىپورىندا 6 مىڭنان استام ادام ەڭبەك ەتۋدە. سوندىقتان دا كاسىپورىندا جۇمىسشى, كەنشى اۋلەتتەرىنىڭ ساقتالۋىنا ەرەكشە ءمان بەرىلەدى. جۇمىسشىلاردىڭ بالالارىن وقىتىپ, وندىرىستە شىڭداۋ ءداستۇرى بەرىك قالىپتاسقان.
ارينە, كاسىپورىندى جانداندىرىپ, قيىنداقتان الىپ شىعۋ استە وڭاي بولمادى. ابدۋازيم رۋستامباەۆ بارلىق جۇمىس جۇيەسىن ەڭ الدىمەن تارتىپتەن باستادى. قاڭىراپ قالعان ءوندىرىستى قالىپقا كەلتىرىپ, اياعىنان تىك تۇرعىزۋ وڭايعا تۇسكەن جوق. جۇمىسشىلاردىڭ الەۋمەتتىك جاعدايلارى دا نازاردان تىس قالمادى. سونىڭ ناتيجەسىندە ىرعاقتى قيمىلعا كوشتى.
كاسىپورىن باسشىسى ستانسانىڭ قۋاتى مەن سەنىمدىلىگىن ارتتىرۋعا كوپ كۇش-جىگەر جۇمسادى. جاڭعىرتۋ جۇمىستارى جۇرگىزىلىپ, ونىمدىلىك ارتا ءتۇستى. تۇتىنۋشىلاردى ەلەكترمەن قامتاماسىز ەتۋ قارقىنى ەسەلەپ ءوستى. ەلىمىزدەگى ەلەكتر ەنەرگياسىن وندىرەتىن ءىرى كاسىپورىننىڭ قالىپتى جۇمىس ىستەۋى – ستانسانى قايتا جاڭعىرتۋدىڭ ۇزاق مەرزىمدى باعدارلاماسىن ورىنداۋدىڭ ناتيجەسى ەكەندىگى ءسوزسىز. تەحنولوگيالىق ۇدەرىستەردى اۆتوماتتاندىرۋ جانە وسى زامانعى تەحنيكانى ەنگىزۋ كاسىپورىندا وندىرىلەتىن ەلەكتر ەنەرگياسىنىڭ وزىندىك قۇنىن تومەندەتۋمەن بىرگە, ەنەرگەتيكالىق نارىقتا ويداعىداي باسەكەگە تۇسۋگە مۇمكىندىك بەردى. نەگىزىندە «ەۋرازيالىق ەنەرگەتيكالىق كورپوراتسياسى» اق قۇرامىنا اقسۋ ەلەكتر ستانساسى مەن «شىعىس» كومىر كەنىشى (ەكىباستۇز) كىرەدى.
بۇگىنگى تاڭدا ا. رۋستامباەۆ باسقاراتىن كورپوراتسيا مەملەكەتتىك ۇدەمەلى يندۋستريالىق-يننوۆاتسيالىق باعدارلامانىڭ بەلسەندى قاتىسۋشىسى. سوڭعى جىلدارى ەەك وندىرىستىك كورسەتكىشتەردى ءوسىرۋ ءۇشىن بارلىق شارالاردى, اتاپ ايتقاندا ساپالى مەنەدجمەنت جۇيەسىن جۇرگىزۋدە. جاڭعىرتۋ باعدارلاماسى 2001 جىلدان بەرى كەزەڭ-كەزەڭىمەن جۇزەگە اسىپ كەلەدى. مىسالى, ستانساداعى №2 ەنەرگوبلوكتى قايتا قالپىنا كەلتىرۋ جوباسىنىڭ قۇنى 250 ملن. دوللاردى قۇرادى. ال ستانسادا ەنەرگوبلوكتاردى قايتا قۇرىلىمداۋ كورپوراتسيانىڭ اۋقىمدى ينۆەستيتسيالىق باعدارلامالىق جوباسى. قازىر №1, 2, 3, 4, 6 ەنەرگوبلوكتاردا جاڭعىرتۋ جۇمىستارى اياقتالدى. ناتيجەسىندە ەنەرگيا ءوندىرۋ قۋاتى ارتتى. مىسالى, 2013 جىلى پايدالانۋعا بەرىلگەن №6 ەنەرگوبلوكتىڭ قۋاتى 25 مۆت-عا ۇلعايدى. بۇل ەنەرگيا پاۆلودار قالاسى سياقتى اۋماقتى جارىقتاندىرۋعا جەتكىلىكتى.
«ەەك» اق 2006 جىلدان باستاپ تۇرعىن ءۇي باعدارلاماسىن جۇزەگە اسىرىپ كەلەدى. سونىڭ ارقاسىندا جاس ماماندار جاڭا پاتەرلەرگە كىردى. ەكىباستۇز جانە اقسۋ قالالارىندا قىزمەتكەرلەرگە ارنالىپ ەكى تۇرعىن ءۇي سالىندى. باعدارلاما ىسكە قوسىلعاننان بەرى 648 قىزمەتكەر مەن ولاردىڭ وتباسىلارى باسپانا ماسەلەسىن جاقسارتتى. تۇرعىن ءۇي باعدارلاماسىنىڭ شەڭبەرىندە 2017 جىلى اقسۋ جانە ەكىباستۇز قالالارىندا 70 پاتەرلىك ەكى ءۇيدى تاپسىرۋ جوسپارلانعان.
كورپوراتسيادا جاستاردى جوعارى وقۋ ورىندارىندا وقىتۋ تاجىريبەسى قالىپتاسقان. وقۋ بىتىرگەن سوڭ ولار كومپانياعا جۇمىسقا ورنالاسادى. وسى باعىتتا كورپوراتسيا قىزمەتكەرلەرى بالالارىن ەلىمىزدىڭ, رەسەيدىڭ, باسقا دا شەتەلدەردىڭ جوعارى وقۋ ورىندارىندا وقىتا الادى. بارلىق شىعىنداردى كاسىپورىن ءوز موينىنا العان. ابدۋازيم رۋستامباەۆتىڭ ايتۋىنشا, ەنەرگەتيك بولۋ وڭاي ەمەس. ەنەرگيا, كومىر ءوندىرۋ وتە كۇردەلى. سوندىقتان دا وسى ماماندىقتى تاڭداعان جاستارعا بارىنشا جاعداي جاساۋ قاجەت. ەنەرگەتيكالىق نارىقتاعى قۋاتتىڭ 17 پايىزىن, ال كومىردىڭ 20 پايىزىن وندىرەتىن الىپ كاسىپورىن وسىلايشا رەسپۋبليكانىڭ ونەركاسىپتىك الەۋەتىن قالىپتاستىرىپ, وتاندىق ەكونوميكانى وركەندەتۋگە ۇلەسىن قوسۋدا.
ءومىر جولى سان تاراۋ. جالپى ەڭبەك جولى قيىندىعىمەن, قىزىعىمەن ءماندى ەمەس پە. ابدۋازيم رۋستامباەۆتىڭ دا وسى كاسىپورىندى باسقارعانىنا بيىل جيىرما جىل تولدى. وسى كەزەڭ ىشىندەگى جەمىستى جۇمىسى لايىقتى باعالاندى. ول «ەرەن ەڭبەگى ءۇشىن» مەدالىمەن, «قۇرمەت» وردەنىمەن ماراپاتتالىپ, تاعى دا باسقا سىي-سياپاتتاردى يەلەندى. بىلىكتى باسشى الەۋەتى مىقتى ۇجىم قالىپتاستىرىپ, وزگەلەرگە ونەگە تانىتتى. تۇيىندەپ ايتقاندا, ول قازاقستاننىڭ ەنەرگەتيكا سالاسىنىڭ ورىستەۋىنە ولشەۋسىز ۇلەس قوستى. ا.رۋستامباەۆ سونىسىمەن ماقتانا الادى.
فاريدا بىقاي,
«ەگەمەن قازاقستان»
پاۆلودار وبلىسى,
اقسۋ قالاسى