جاسىراتىنى جوق, سەمەي پوليگونىن ەشكىم اشىق ايتا المايتىن. كەڭەس زامانىندا سەمەي پوليگونى ۇلت دەرتىنىڭ جاسىرىن وشاعى بولدى. ەلىمىز تاۋەلسىزدىككە قول جەتكىزگەن كەزدە عانا بۇل ماسەلە قوعامدىق دەڭگەيدە كوتەرىلىپ, الەم ەلدەرىنىڭ نازارىن اۋداردى. ەلوردادا وتكەن «يادرولىق قارۋسىز الەم قۇرۋ» اتتى حالىقارالىق كونفەرەنتسيا وسىنىڭ ايعاعى.
ەلباسىمىز «الەم. ءححى عاسىر» مانيفەسى جالپى ادامزات الدىنداعى قاۋىپتى اشىق ايتىپ, جەتەكشى دەرجاۆالار اراسىنداعى تەكەتىرەستىڭ جاھاندىق سوعىسقا ۇلاسۋىنان قاۋىپتەنەتىنىن, مەملەكەت باسشىسى رەتىندە الاڭدايتىنىن الەم نازارىنا سالدى.
ازۋى ايدى بىلەگەن قانقۇيلى داۋىردەن دە ءوتىپ, ەڭسەسىن كوتەرىپ, ەسىن جيعان قازاق ەلىنىڭ باستان كەشكەنى بۇل جيىندا دا بۇكپەسىز ايتىلدى. جيىرما بەس جىل بۇرىن جەر بەتىنەن جويىلىپ كەتۋدىڭ از-اق الدىندا قالعان قاراشا جۇرتتىڭ قاسىرەتى مەن جانايقايىنا قۇلاق اسقىسى كەلمەگەندەردىڭ ءبىر ءسات ويلانىپ, كىدىرىپ قالۋىنا تۋرا كەلگەندەي. ەستىگەنىن ايتۋعا, كورگەنىن جاريالاۋعا بولمايتىن شىدەرلىگە جان ءبىتىپ, الەم قاۋىمداستىعىنىڭ الدىندا وي تاستالدى. جەتى باستى ايداھارعا جان بىتىرگىسى كەلەتىن ادامزات ويىنىڭ ۇشقىر قيالى ءبىر ءسات دەمىن جۇتىپ, كۇناسىز قۇربانداردىڭ كوز جاسىنان باس تارتۋدى دا قالايتىن كۇن تۋار.
نازىم حيكمەت: «سەن جانباساڭ لاپىلداپ, ول جانباسا لاپىلداپ, ءبىز جانباساق لاپىلداپ, اسپان قالاي اشىلماق», دەپتى. مىڭ ءولىپ, مىڭ تىرىلگەن قازاق جۇرتىنىڭ اسپانى اشىلىپ, ماڭگىلىك ەلگە جول باستايتىن كۇن تۋدى.
روزا مۇقانوۆا,
قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ
استانا