قىركۇيەك ايى – جازعى دەمالىستار اياقتالىپ, قىزۋ جۇمىستىڭ قاينايتىن شاعى. تابيعاتتىڭ دا جەمىسىن بەرە باستايتىن جومارت كەزى. ەلىمىز وسى ماڭىزدى ماۋسىمعا جاعىمدى جاڭالىقتارىمەن قادام باستى. ادامزات تاريحىنداعى ايتۋلى وقيعالاردىڭ ءبىرى – سەمەي يادرولىق سىناق پوليگونى جابىلۋىنىڭ 25 جىلدىعى اتاپ ءوتىلدى. شارتاراپتان جينالعان بەدەلدى ساياساتكەرلەر مەن ساراپشىلار ەلباسى نۇرسۇلتان نازارباەۆتىڭ وسىناۋ ەرەكشە ەرلىگىنە زور ىقىلاس ءبىلدىردى. ادەتتەگىدەي اتا زاڭ مەرەكەسى تويلاندى. ال بۇگىن قوس پالاتالى پارلامەنت جاڭا جۇمىس ماۋسىمىنا كىرىستى. جاز بويى ەل ارالاپ, سايلاۋشىلارمەن جۇزدەسىپ قايتقان پارلامەنت دەپۋتاتتارى تىڭ كۇشپەن ساياسي ومىرگە ارالاستى. العاشقى قوڭىراۋ سوعىلىپ, جاڭا وقۋ جىلى باستالدى. ت ۇلىمشاعى جەلبىرەگەن تالاي ءبۇلدىرشىن مەكتەپ تابالدىرىعىن اتتادى. جاز بويى تاڭداۋ جاساپ, ماماندىق تۇگەندەگەن تالاپكەرلەر دە جوعارى وقۋ ورىندارىنا قادام باستى.
وسىنداي ايتۋلى كۇنى ەل گازەتى «ەگەمەن قازاقستان» دا تاۋەلسىزدىكتىڭ تورقالى تويىنا تارتۋ ىسپەتتى جاڭارعان ديزاينمەن باسىلىپ, وقىرمانعا جول تارتىپ وتىر. عاسىرلىق مەجەسىنە جاقىنداعان قازاق ءباسپاسوزى قاراشاڭىراعىنداعى زامان تالابىنا ساي جاڭالىقپەن بىرگە باسىلىمنىڭ تۇڭعىش باس رەداكتورى حالەل ەسەنباەۆ, ودان كەيىن ءار جىلداردا باسشىلىق ەتكەن بەرنياز كۇلەەۆ, سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, تۇرار رىسقۇلوۆ قاتارلى ارىستار تۇرەن سالعان ءداستۇرلى جولدى ۇزبەي, ساباقتاستىقتى ساقتاۋدى ماقسات ەتتىك.
الاش تۇسىندا اراب قارپىمەن جارىق كورگەن باسىلىم, كەڭەستىك كەزەڭدە الدىمەن لاتىن, سوسىن كيريلل قارىپتەرىنە كوشىپ, ماكەتىن جاڭارتقانى بەلگىلى. تاۋەلسىزدىكتىڭ ەلەڭ-الاڭىندا باس باسىلىم مەملەكەت باسشىسىنىڭ قامقورلىعىمەن تار جول, تايعاق كەشۋلەردەن سۇرىنبەي ءوتىپ, ءوزىنىڭ جاڭا كەزەڭىنە قادام باستى. شەرحان مۇرتازا, ءابىش كەكىلباي ۇلى سىندى تەگەۋرىندى تۇلعالار باسقارعان گازەت – «ەگەمەندى قازاقستان», كەيىنىرەك «ەگەمەن قازاقستان» بولىپ وزگەرىپ, كەزەكتى رەت جاڭا سيپاتتا جارىق كورە باستادى.
بۇگىندە ماركەتينگ زاڭدىلىعىندا بەلگىلى ءبىر ناتيجەگە قول جەتكىزۋ ءۇشىن رەبرەندينگ جاساۋ قالىپتاسقان ءۇردىس. «ەگەمەن قازاقستان» گازەتىندەگى كەشەندى وزگەرىستەر دە سونداي ماقساتتان تۋىنداپ وتىر. ايتا كەتۋ كەرەك, گازەتتەگى جاڭالىقتار تامىز ايىندا اقپارات جانە كوممۋنيكاتسيالار مينيسترلىگىنىڭ باستاماسىمەن قابىلدانعان ستراتەگيالىق دامۋ تۇجىرىمداماسى بويىنشا جۇزەگە اسىرىلۋدا.
وسىعان بايلانىستى بۇگىننەن باستاپ «ەگەمەن قازاقستان» گازەتىنىڭ استاناداعى تارالىمى ءتۇرلى-ءتۇستى بولىپ شىعا باستادى. ال وزگە وڭىرلەردە پوليگرافيالىق كاسىپورىنداردىڭ مۇمكىندىگىنە قاراي تولىق تۇستىگە جاڭا جىلدان باستاپ كوشىرىلەتىن بولادى. باسىلىمدى گازەت تاراتۋ جەلىلەرى ارقىلى كۇندەلىكتى بولشەك ساۋداعا شىعارۋ دا جوسپارلانىپ وتىر.
ەل گازەتىنىڭ سىرتقى سيپاتىمەن قاتار, مازمۇندىق قۇرىلىمى دا بىرقاتار جاڭالىقتارمەن تولىقتى. ءباسپاسوز تاجىريبەلەرى ەسكەرىلە وتىرىپ, سالالار بويىنشا تاقىرىپتىق بەتتەر اشىلدى. ءار بەتتىڭ تۇراقتى باعاندارىندا ەسىمدەرى ەلگە بەلگىلى ازاماتتار مەن بىلىكتى ساراپشىلار ورامدى ويلارىن ورتاعا سالىپ, پايىمدى پىكىرلەرىمەن بولىسەدى. سونىمەن قاتار, قازاقستاننىڭ حالىقارالىق بەدەلىنىڭ ارتۋىنا, ەلىمىزدىڭ بۇۇ قاۋىپسىزدىك كەڭەسىنىڭ مۇشەلىگىنە سايلانۋىنا, كەلەر جىلى ەكسپو كورمەسىنىڭ وتۋىنە جانە تاعى باسقا ەلباسى باستاماسىمەن جۇزەگە اسا باستاعان ىرگەلى جوبالارعا وراي جاھانداعى جاڭالىقتارعا بايلانىستى ساراپتامالىق ماقالالارعا كوبىرەك ورىن بەرىلە باستايدى.
گازەتتىڭ باستى قازىناسى – وقىرمانى. سوندىقتان مارتەبەلى وقىرمانمەن بايلانىستى نىعايتا ءتۇسۋ باستى نازاردا بولادى. ەل گازەتى «ەگەمەن» سىزدەردەن حات-حابارلارىڭىزدى, پايىمدى پىكىرلەر مەن ۇتىمدى ۇسىنىستارىڭىزدى كۇتەدى.
دارحان قىدىءرالى,
«ەگەمەن قازاقستان» رەسپۋبليكالىق گازەتى» اق باسقارما توراعاسى