ەلباسى سەربيا رەسپۋبليكاسىنىڭ پرەزيدەنتى توميسلاۆ نيكوليچپەن كەزدەستى
Akorda.kz-ءتىڭ حابارلاۋىنشا, كەزدەسۋ بارىسىندا ەكى ەلدىڭ ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ءوزارا ءىس-قيمىل ماسەلەلەرى تالقىلاندى. سونداي-اق, ەكى ەل كوشباسشىلارى حالىقارالىق كۇن ءتارتىبى جونىندە پىكىر الماستى.
بۇدان بولەك, نۇرسۇلتان نازارباەۆ پەن توميسلاۆ نيكوليچ سەربيا پرەزيدەنتىنىڭ قازاقستانعا بىلتىرعى ساپارى اياسىندا قول جەتكىزىلگەن ۋاعدالاستىقتىڭ ىسكە اسىرىلۋ بارىسىن تالقىلادى.
مەملەكەت باسشىسى سەربيا ەلىمىزدىڭ ماڭىزدى سەرىكتەسىنىڭ ءبىرى بولىپ سانالاتىنىن جانە بۇگىندە ەكى ەل اراسىندا ءتۇرلى ەكونوميكالىق جانە ساياسي سالالار بويىنشا تولىق ءوزارا تۇسىنىستىكتىڭ ورىن الىپ وتىرعانىن اتاپ ءوتتى.
«بۇگىنگى كەزدەسۋىمىز قازاقستان تاۋەلسىزدىگىنىڭ 25 جىلدىعىن جانە سەربيامەن ديپلوماتيالىق قارىم-قاتىناس ورناۋىنىڭ 20 جىلدىعىن اتاپ وتەتىن كەزەڭمەن تۇسپا-تۇس كەلىپ وتىر. بۇل كەزدەسۋ تاۋار اينالىمىن ۇلعايتۋعا, ەكونوميكالىق جانە ساياسي ىنتىماقتاستىقتى جانداندىرۋعا سەپتىگىن تيگىزەدى دەپ ۇمىتتەنەمىن. ءبىز اۋىل شارۋاشىلىعى, مەتاللۋرگيا, قۇرىلىس, مەديتسينا جانە فارماتسەۆتيكا سالالارىندا ىنتىماقتاسۋعا نيەتتىمىز. قازاقستان مەن سەربيانىڭ ەكونوميكاسى ءبىر-ءبىرىن ءوزارا تولىقتىرا تۇسەدى. سەرىكتەستىك ەكى تاراپقا دا پايداسىن تيگىزەتىن بولادى», – دەدى ەلباسى.
قازاقستان پرەزيدەنتى ەكسپو-2017 حالىقارالىق مامانداندىرىلعان كورمەسىن وتكىزۋ قۇقىعىنا داۋىس بەرۋ جانە بۇۇ قاۋىپسىزدىك كەڭەسىنىڭ تۇراقتى ەمەس مۇشەسىنە سايلاۋ كەزىندە ەلىمىزدى قولداعانى ءۇشىن سەربيا كوشباسشىسىنا العىس ايتتى.
سەربيا پرەزيدەنتى بۇگىندە استانا مەن بەلگراد ءتۇرلى سالاداعى ءوزارا ءىس-قيمىل ءۇشىن زور الەۋەتكە يە ەكەندىگىن اتاپ ءوتتى.
«ءبىز سەربيا رەسپۋبليكاسىنىڭ ەگەمەندىگى مەن اۋماقتىق تۇتاستىعىنا قاتىستى بەكەم ۇستانىمىڭىز, سونداي-اق يۋنەسكو-نىڭ دۇنيەجۇزىلىك مۇرالار تىزىمىندەگى ءبىزدىڭ ەلدىڭ مادەني نىساندارىن ساقتاۋ ىسىنە قولداۋ كورسەتكەنىڭىز ءۇشىن سىزگە ريزاشىلىق بىلدىرەمىز», – دەدى ت.نيكوليچ.
كەزدەسۋ بارىسىندا نۇرسۇلتان نازارباەۆ مەملەكەتتەر اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن سەربيا پرەزيدەنتىن I دارەجەلى «دوستىق» وردەنىمەن ماراپاتتادى.
ايدار ورىسباەۆ