سەربيانىڭ اۋە كەڭىستىگىنە كىرگەن قازاقستان پرەزيدەنتىنىڭ ۇشاعىن كوشباسشىعا كورسەتىلەتىن ءراسىم بويىنشا ءتورت اسكەري جويعىش ۇشاق قارسى الىپ, اۋەجايعا دەيىن قاناتتاسا ۇشىپ باردى. ال بەلگراد اۋەجايىندا مەملەكەت باسشىسىن سەربيا پرەزيدەنتى توميسلاۆ نيكوليچ كۇتىپ الدى.
نۇرسۇلتان نازارباەۆ سەربياعا رەسمي ساپارى اياسىندا وسى ەلدىڭ پرەزيدەنتىمەن شاعىن جانە كەڭەيتىلگەن قۇرامدا كەلىسسوزدەر وتكىزەدى دەپ جوسپارلانعان. ونىڭ قورىتىندىسى بويىنشا بىرقاتار ەكىجاقتى قۇجاتتارعا قول قويۋ كوزدەلگەن. بۇدان بولەك, قازاقستان پرەزيدەنتىنىڭ سەربيا پرەمەر-ءمينيسترى الەكساندر ۆۋچيچپەن, سەربيا پاتريارحى يرينەيمەن كەزدەسۋى, سونداي-اق بەلگراد قالاسىندا جامبىل جاباەۆتىڭ ەسكەرتكىشىن اشۋ سالتاناتتى راسىمىنە قاتىسۋى جوسپارلانىپ وتىر.
ارنۇر اسقار, "ەگەمەن قازاقستان"