بەلگراد قالاسىندا ەلباسى نۇرسۇلتان نازارباەۆتىڭ سەربياعا رەسمي ساپارى قارساڭىندا ەكى ەلدىڭ ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ ءبىرىنشى وتىرىسى ءوتتى.
جيىندا ساۋدا جانە ينۆەستيتسيالار, گەولوگيا جانە اۋىل شارۋاشىلىعى, قورشاعان ورتانى قورعاۋ, ءبىلىم, قۇرىلىس جانە ءتۋريزمدى دامىتۋ ماسەلەلەرى تالقىلاندى.
پلەنارلىق سەسسياعا ۇلتتىق ەكونوميكا ءمينيسترى قۋاندىق بيشىمباەۆ پەن سەربيانىڭ ەكونوميكا ءمينيسترى گوران كنەجەۆيچ قاتىستى.
بيشىمباەۆ ءوز سوزىندە بىلتىر ەكى ەلدىڭ تاۋار اينالىمى 55,8 ملن. اقش دوللارىن قۇراعانىن, الايدا, بۇل كورسەتكىشتىڭ قولدا بار الەۋەتكە سايكەس ەمەستىگىن اتاپ ءوتتى. سونىمەن بىرگە ول 31 مامىردا ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى سەربيا ەلىمەن ەركىن ساۋدا تۋرالى كەلىسىم بويىنشا كەلىسسوزدەر باستاۋ تۋرالى شەشىم قابىلداعانىن ەسكە سالدى. «بۇل كەلىسىم قازاقستان مەن سەربيانىڭ ساۋدا-ەكونوميكالىق قارىم-قاتىناستارىن جاڭا دەڭگەيگە شىعارۋعا مۇمكىندىك بەرەدى», دەدى ول.
كەزدەسۋدە اۋىل شارۋاشىلىعى سالاسىنداعى ىنتىماقتاستىق ماسەلەسى كەڭىنەن تالقىلاندى. قازاقستان تاراپى وسىمدىك شارۋاشىلىعى مەن مال شارۋاشىلىعى سالاسىندا ءوزارا ءىس-قيمىلدى دامىتۋعا مۇددەلى ەكەنىن مالىمدەدى. «ءبىز استىق پەن تابيعي تازا ەتتى ەكسپورتتاۋعا دايىنبىز», دەدى قۋاندىق بيشىمباەۆ. سونداي-اق, ول ەكى ەلدىڭ ۇزدىك جوعارى وقۋ ورىندارىنىڭ تاجىريبە الماسۋ كەرەكتىگىن ايتىپ, ءبىلىم جانە عىلىم سالاسىندا شەشىلمەگەن ماسەلەلەرگە نازار اۋداردى. وسى ورايدا مينيستر ەكى ەل عالىمدارىنىڭ تاجىريبە الماسۋ ءۇشىن تىعىز قارىم-قاتىناس ورناتىپ, ءوزارا ساپارلار ۇيىمداستىرۋعا بولاتىنىن ايتتى.
وسىدان كەيىن ول «استانا» حالىقارالىق قارجى ورتالىعىندا ينۆەستورلار ءۇشىن جاسالاتىن جاعدايلار تۋرالى ايتىپ بەردى. «قازاقستان تاۋەلسىزدىگىن العان كەزدەن بەرى ينۆەستورلار ءۇشىن بارلىق جاعدايلار جاساپ جاتىر. ءبىز سەربيا قۇرىلىس كومپانيالارىن «نۇرلى جول» مەملەكەتتىك باعدارلاماسى بويىنشا ىسكە اسىرىلاتىن جوبالارعا قاتىسۋعا شاقىرامىز», دەدى قۋاندىق بيشىمباەۆ.
وتىرىستا سەربيا تاراپى قازاقستاننىڭ كاسىپكەرلەرىن ەنەرگەتيكا جانە تاۋ-كەن ونەركاسىبى, قۇرىلىس جانە قۇرىلىس ماتەريالدارى ونەركاسىبى, ماشينا جاساۋ, قولونەر, اۋىل شارۋاشىلىعى, حيميا جانە فارماتسەۆتيكا ونەركاسىبى سالاسىنداعى بيزنەس ورتامەن جاقىنىراق تانىسۋعا شاقىردى.
كەزدەسۋدە سەربيانىڭ قۇرىلىس جانە جوبالاۋ كومپانيالارى قازاقستانداعى تۇرعىن ءۇي-قۇرىلىس باعدارلاماسىنا, جول جوندەۋ, اۋەجاي قۇرىلىسى مەن قۇرىلىس ونىمدەرىن جەتكىزۋ جۇمىستارىنا قىزىعۋشىلىق ءبىلدىردى.
جيىن سوڭىندا تاراپتار ەكى ەلدىڭ اراسىنداعى ىنتىماقتاستىق جونىندەگى ىسكەرلىك كەڭەس قۇرۋ تۋرالى شەشىم قابىلدادى. ول قازاقستان مەن سەربيانىڭ بيزنەسى اراسىندا ءوزارا ءىس-قيمىلدى ۇيلەستىرەتىن ورگان بولادى. ەندى ەكى ەلدىڭ ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ ەكىنشى وتىرىسى استانادا وتەدى.
داستان كەنجالين