بۇگىن ەلباسى نۇرسۇلتان نازارباەۆ سەربيا رەسپۋبليكاسىنا رەسمي ساپارمەن بارادى. وسىعان وراي, كەشە قازاقستاننىڭ ماجارستان مەن سەربياداعى ەلشىسى نۇرباح رۇستەموۆ سەربيا پرەزيدەنتى توميسلاۆ نيكوليچپەن جانە وسى ەلدىڭ پرەمەر-ءمينيسترى الەكساندر ۆۋچيچپەن كەزدەستى.
كەزدەسۋ بارىسىندا پرەزيدەنت توميسلاۆ نيكوليچ بىلتىر تامىز ايىندا استاناعا جاساعان ساپارىن جىلىلىقپەن ەسكە الدى. ول قازاقستان باسشىسىن سەربيادا «حالىقارالىق اۋقىمدا تانىلعان الەمدىك كوشباسشى» رەتىندە تانيتىنىن جانە ونىڭ بەلگرادقا كەلۋىن اسىعا كۇتىپ وتىرعاندارىن ايتتى.
ال سەربيا پرەمەر-ءمينيسترى الەكساندر ۆۋچيچپەن كەزدەسۋ بارىسىندا قازاقستان مەن سەربيانىڭ ەكىجاقتى قارىم-قاتىناستارىنىڭ قازىرگى جاعدايى مەن كەلەشەگى تالقىلاندى. سونداي-اق, بۇل ساپار ەكى ەل اراسىنداعى ەكونوميكالىق سالاداعى ىنتىماقتاستىقتىڭ دامۋىنا ەلەۋلى سەرپىن بەرەتىنى اتاپ ءوتىلدى.
ايدار ورىسباەۆ,
«ەگەمەن قازاقستان»