ءۇندىستان پرەمەر-ءمينيسترى نارەندرا موديدىڭ مونوگراممامەن ورنەكتەلگەن كوستيۋمى ەڭ قىمبات كوستيۋم رەتىندە گيننەستىڭ رەكوردتار كىتابىنا ەندى, دەپ جازدى «حيندۋ» گازەتى. ءۇندىستان پرەمەرى سولتۇستىك ءۇندىستان ءسان ۇلگىسىنىڭ داستۇرىندە تىگىلگەن بۇل كوستيۋمدى بىلتىر وتكەن اقش پرەزيدەنتىمەن كەزدەسۋىنە وراي ادەيى تىكتىرگەن جانە سول كەزدە ءبىر-اق رەت كيگەن ەكەن. سودان كەيىن كوستيۋمدى قايىرىمدىلىق اۋكتسيونىنا قويىپ, ودان تۇسكەن قاراجاتتى ۇندىستەر ءۇشىن قاسيەتتى سانالاتىن گانگ وزەنىن تازارتۋ باعدارلاماسىن جۇزەگە اسىراتىن قورعا اۋدارعان. ءۇندىستان ءباسپاسوز وكىلدەرىنىڭ اقپارى بويىنشا, نارەندرا موديدىڭ شامامەن ميلليون رۋپيگە تىكتىرگەن كوستيۋمى اۋكتسيوندا 43 ملن. رۋپيگە ساتىلعان. بۇل بۇگىنگى باعاممەن ساناعاندا شامامەن 643 مىڭ اقش دوللارىن قۇرايدى. ايدار ورىسباەۆ