حالىقارالىق تۇركى اكادەمياسىنىڭ ۇيىمداستىرۋىمەن «تيان-شاننان وتۋكەنگە دەيىن: ۇلى دالا حالىقتارىنىڭ تاريحي-مادەني قازىنالارى» دەپ اتالعان عىلىمي-تانىمدىق ەكسپەديتسيا جۇمىسىن باستادى. جاقىندا عانا ءوزارا ىنتىماقتاستىق تۋرالى مەموراندۋمعا قول قويعان "ەگەمەن قازاقستان» گازەتى مەن «قازاقستان» تەلەارناسى وسى شاراعا بىرلەسكەن اقپاراتتىق قولداۋ كورسەتەتىن بولادى.
بۇل ساپار بارىسىندا ازەربايجاننان, رەسەيدەن, تۇركيادان, قىرعىزستاننان كەلگەن عالىمدار مەن باق وكىلدەرى موڭعولياداعى تاريحي ورىندارعا ارنايى بارادى. اتاپ ايتقاندا, كۇلتەگىن, تونىكوك, بىلگەقاعان كەشەندەرى سىندى تۇركى حالىقتارىنا ورتاق تاريحي-مادەني جادىگەرلەرمەن تانىسادى. جالپى تۇركىتانۋ باعىتىندا اتقارىلىپ جاتقان عىلىمي جۇمىستار مەن ىزدەنىستەردى سارالاپ, دوڭگەلەك ۇستەل ماجىلىستەرى مەن كونفەرەنتسيالار وتكىزەدى.