ريو-دە-جانەيرودا ءوتىپ جاتقان وليمپيالىق ويىنداردىڭ بوكسشىلار باسەكەسى بۇگىن تۇندە ءۇش فينالدىق جەكپە-جەك وينالۋىمەن ءوزىنىڭ مارەسىنە جەتتى. ونداعى العاشقى ەكى ۇرىستا وزبەك بوكسشىلارى رينگكە شىعىپ, ەكەۋى دە جەڭىسكە جەتتى.
الدىمەن 52 كيلوعا دەيىنگى سالماقتا شاحوبيدين زويروۆ رەسەيلىك ميشا الوياندى 3:0 ەتىپ ۇتتى. جەكپە-جەكتىڭ ءبىرىنشى راۋندىندا الويان باسىم بولعانىمەن, كەلەسى ەكى راۋندتا تىزگىندى قارسىلاسىنا بەرىپ قويدى.
64 كيلوعا دەيىنگى سالماقتاعى فازليددين گايبنازاروۆ تا تەگى كۋبالىق ازەربايجان وكىلى لورەنتسو كوللازو سوتومايورمەن شايقاسىنىڭ باسىندا 0:3 بولىپ جەڭىلىپ جاتتى. كەلەسى ەكى راۋندتا 2:1 ەتىپ العا شىققان وعان قورىتىندىدا جەڭىس تە بەرىلدى.
ءسويتىپ, بۇعان دەيىن 49 كيلوعا دەيىنگى سالماقتاعى حاسانبوي دۋسماتوۆتىڭ التىن مەدالىمەن بىرگە وزبەكستان بوكسشىلارى ەڭ جوعارى ناگرادا سانىن ۇشەۋگە جەتكىزىپ, كۋبادان باسىپ وزدى.
ەڭ سوڭعى 91 كيلودان اۋىر سالماقتا فرانتسيالىق دجەيمس توني ۆيكتور يوكو مەن بريتانيالىق دجوي دجويس التىن مەدال ءۇشىن تالاستى. وندا فرانتسۋز بوكسشىسىنىڭ دەسى باسىم شىقتى.
بوكسشىلاردىڭ كوماندالىق ەسەبىندە 3 التىن, 2 كۇمىس, 2 قولا مەدال جەڭىپ العان وزبەكستان قۇراماسى ءبىرىنشى ورىنعا شىقتى. ەكىنشى ورىنداعى كۋبادا 3 التىن, 3 قولا مەدال بار. ءۇشىنشى ورىنعا 1 التىن, 2 كۇمىس, 1 قولا مەدالمەن قازاقستان بوكسشىلارى ورنالاستى. ال ءتورتىنشى-بەسىنشى ورىندارعا 1 التىن, 1 كۇمىس, 2 قولا مەدالدى رەسەي جانە فرانتسيا كوماندالارى قاتار جايعاستى. التىنشى ورىندى 1 عانا التىن مەدالگە قول ارتقان برازيليا جاماعاتى ەنشىلەدى.
وسىمەن ويىنداردىڭ بوكس ءتۋرنيرى ءوزىنىڭ مارەسىنە جەتتى.
دامير قوجامقۇل