يتاليانىڭ ايگىلى وپەرا ءانشىسى دانيەلا دەسسي سەنبى كۇنى برەشيا قالاسىنداعى كلينيكادا جاسى 60-قا قاراعان شاعىندا قايتىس بولدى. بۇل تۋرالى جۋرناليستەرگە انشىمەن سوڭعى 15 جىل بويى بىرگە ءومىر ءسۇرىپ, تۆورچەستۆولىق بايلانىستا بولعان تەنور فابيو ارميلياتو جەتكىزدى.
ليريكالىق-درامالىق سوپرانو داۋىستى دەسسي كومپوزيتورلار ماسكانيدىڭ, پۋچچيني مەن لەونكاۆاللونىڭ وپەرالىق پارتيالارىن الەمدەگى ەڭ ۇزدىك ورىنداۋشىلاردىڭ بىرىنەن سانالىپ كەلدى. ول كەرەمەت داۋسى بولۋىمەن بىرگە, اكتەرلىك تالانتى جاعىنان دا ەرەكشە بولىپ كورىنەتىن.
دەسسي 1957 جىلعى 14 مامىردا گەنۋيا قالاسىندا تۋعان. ول توعىز جاسىنان باستاپ-اق ءوزىنىڭ وپەرا ءانشىسى بولاتىنىن جاقسى ءبىلدى. ءانشى ءبىرىنشى ۇلكەن سىيلىعىن 1980 جىلى يتاليانىڭ Rai مەملەكەتتىك تەلەۆيدەنيەسى ۇيىمداستىرعان حالىقارالىق كونكۋرستا جەڭىپ الدى.
ءانشىنىڭ رەپەرتۋارىندا موتسارتتان ۆەرديگە, مونتەۆەرليدەن پروكوفەۆكە دەيىنگى ۇلى كومپوزيتورلاردىڭ 60-تان استام وپەرالارى بولدى. ول الەمنىڭ ەڭ ۇزدىك وپەرالىق تەاترلارىمەن بىرلەسە جۇمىس جاسادى. بۇلاردىڭ قاتارىندا ميلاننىڭ «لا سكالا», نيۋ-يوركتىڭ «مەتروپوليتەن-وپەرا», بەرليندەگى «نەمىس وپەراسى» تەاترلارى بار.
مۇرات ايتقوجا
https://youtu.be/X4cCF6tN_Qs