زىلتەمىرشى زايچيكوۆ

جەرلەستەرىنىڭ زور قۇرمەتىنە بولەندى تولاعاي تۋعان جەرىنە كەلدى. سىن ساتىندە وزىنە جۇكتەلگەن جاۋ­اپ­­كەرشىلىكتى تىزەسى دىرىلدەمەي كو­تەرىپ, ريو وليمپياداسىنىڭ قولا جۇلدەسىن قانجىعاسىنا بايلاپ كەلگەن الەكساندر زايچيكوۆتى سىر بويىنىڭ حالقى ىستىق ىقىلاسپەن قارسى الدى. ۇشاقتان ءتۇسىپ, جۇر­تىنىڭ قۇشاعىنا كۇمپ بەرگەن باتىر ۇلدىڭ قۋانىشى كوزىنەن كورىنىپ تۇردى. قىزىلوردالىق جاستار مەن قاراپايىم تۇرعىندار الەكساندردىڭ قۇرمەتىنە اۋەجايعا جينالىپ, ىستىق ىقىلاستارىنا بولەدى. مۇنان سوڭ ريو وليمپياداسىنىڭ جۇلدەگەرىن وبلىس اكىمى قىرىمبەك كوشەرباەۆ قۇتتىقتاپ, جىلى لەبىزىن جەتكىزدى. – وليمپيادادا سەن تەك زىلتەمىردى كوتەرىپ قانا قويعان جوقسىڭ, بۇكىل قازاقستاندىقتاردىڭ رۋحىن اس­قاقتاتتىڭ. الەكساندردىڭ كەلەسى مەدالى التىن بولاتىنىنا سەنەمىن. ءبىز الەكساندردىڭ الداعى جارىستارعا, اسىرەسە, توكيودا وتەتىن وليمپياداعا دايىندىعى ءۇشىن بارلىق جاعدايدى جاساۋعا دايىنبىز. سونىمەن قاتار, باتىر ۇلدى تاربيەلەپ وسىرگەن اناسىنا زور العىس ايتامىز,– دەدى قىرىم­بەك ەلەۋ ۇلى. ايماق باسشىسى قىرىمبەك كوشەر­باەۆ الداعى ۋاقىتتا زىلتەمىر­شىلەردى دايىنداۋ ءۇشىن قىزىلوردادا حالىقارالىق تالاپتارعا ساي اۋىر اتلەتيكا ورتالىعى سالىناتى­نىن جەتكىزدى. «مەن بارلىق قازاق­ستاندىقتارعا, اسىرەسە, جەرلەستەرىمە ۇلكەن العىسىمدى ايتامىن. ريو­دا ءجۇرىپ, ولاردىڭ قولداۋىن سەزىن­دىم. قىزىلوردالىقتار تاڭعى 4-تە جينالىپ, مەنىڭ ونەرىمدى تاماشالاعاندارىن بىلەمىن. سىزدەر­دىڭ قولداۋلارىڭىز ماعان كۇش بەردى»,  دەيدى الەكساندردىڭ ءوزى. الەكساندردىڭ اناسى مەن باپ­كەرى دە بارشا قولداۋ كورسەتكەن قازاقستاندىقتارعا, جەرلەستەرىنە العىستارىن ايتتى. مۇنان سوڭ ايماق باسشىسى الەك­­ساندرعا «Toyota Land Cruiser» اۆ­توكولىگىنىڭ كىلتىن, باپكەرىنە 5 ميلليو­ن تەڭگەنىڭ سەرتيفيكاتىن تاپسىردى. باتىر ۇلعا كورسەتىلگەن قوشەمەت مۇنىمەن بىتكەن جوق. وليمپيادا جۇلدەگەرىن قۇتتىقتاپ, نيەتتەرىن ءبىلدىرۋ ءۇشىن حالىق ورتالىق الاڭعا جينالدى. تولاعاي باستاعان توپ سوندا باردى. زور جەتىستىككە جەتكەن ۇلاندى حالىق الاقانىنا سالىپ قارسى الدى. وبلىس اكىمىنىڭ ورىنباسارى رۋسلان رۇستەموۆ باستاعان ازاماتتار سپورتشىنى تاعى دا جەڭى­سىمەن قۇتتىقتاپ, قولا جۇلدەنىڭ توكيو وليمپياداسىندا التىنعا اينالاتىنىنا سەنىم ءبىلدىردى. ەرجان بايتىلەس, «ەگەمەن قازاقستان» قىزىلوردا