بۇرناعى كۇنى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ۇستازدارى وسى ءبىلىم ورداسىنىڭ تۇلەگى – ريو وليمپياداسىنىڭ چەمپيونى دانيار ەلەۋسىنوۆتى ۇلىقتاۋعا ارنالعان كەش وتكىزدى. وندا چەمپيوننىڭ ادامي قاسيەتتەرى مەن ستۋدەنت كەزىندەگى ساباق ۇلگەرىمى جان-جاقتى ءسوز بولدى.
بوكسشى دانيار ەلەۋسىنوۆ 2009-2013 جىلدار ارالىعىندا اتالعان وقۋ ورداسىنان قارجىگەر ماماندىعى بويىنشا ءبىلىم العان. ول وسى جىلدار ىشىندە وقۋ مەن بوكستى قاتار الا ءجۇرىپ, اينالاسىنداعى دوستارى مەن ۇستازدارىنا سىيلى بولدى, الەمدى مويىنداتقان مايتالمان بوكسشى بولىپ قالىپتاستى.
– دانيار وتە قاراپايىم, مادەنيەتتى بولاتىن. ول ستۋدەنت كەزىندە-اق قازاقستاننىڭ ىشكى چەمپيوناتى مەن حالىقارالىق جارىستارعا قاتىسىپ, جۇلدەلى ورىندار الىپ ءجۇردى. قازىر ەكىنىڭ ءبىرى ماقتانۋعا, تانىلۋ ارقىلى جۇلدىز بولۋعا ۇمتىلادى. بىراق, ءبىزدىڭ دانيار مۇلدە ونداي ەمەس. تانىمال بوكسشىمىن دەپ ماقتانبايدى. ءبىز ونىڭ كىشىپەيىل قاسيەتىن قۇرمەتتەيمىز. شىنىن ايتۋ كەرەك, مۇنداعى مۇعالىمدەر وعان كوپ كومەك كورسەتتى. ءاسىرەسە, جارىستارعا باراتىن كەزدە ساباقتان بوساتىپ, كەلگەن كەزدە وقۋ باعدارلاماسىن ارنايى ۇيرەتىپ ءجۇردى. قىسقاسىن ايتقاندا, دانيار ءبىزدىڭ تۇلەگىمىز بولعانىنا ماقتانامىز, – دەيدى ەكونوميكا فاكۋلتەتىنىڭ دەكانى ءاليا يسمايلوۆا.
شارا بارىسىندا دارابوز دانياردىڭ كەشەگى بوكسىن ۋنيۆەرسيتەتتىڭ ۇجىمى ۇيىمشىلدىقپەن بىرىگىپ تەلەەكراننان تاماشالاعانى ايتىلدى. تىلەۋىن تىلەپ, قولداۋ كورسەتكەن ۇستازدارى: «شاكىرتىمىزدىڭ وليمپيادا چەمپيونى بولاتىنىن سەزدىك, – دەيدى. – ويتكەنى, دانياردى وليمپياداعا كەتەرىنەن بۇرىن ۋنيۆەرسيتەتكە شاقىرىپ, ستۋدەنتتەرمەن كەزدەسۋ ۇيىمداستىرىپ, ساتتىلىك تىلەدىك. سوندا ول نىق سەنىممەن: «مەن قايتسەم دە قازاقتاننىڭ كوك تۋىن جەلبىرەتەمىن. چەمپيون بولامىن» دەپ ايتقان-دى. ءبىز دە ىشتەي ايتقانىڭ كەلسىن, دەگەنىڭە جەت دەدىك, – دەيدى قارجى كافەدراسىنىڭ مەڭگەرۋشىسى ءزامزاگۇل بايماعامبەتوۆا.
وسىلايشا, ريو وليمپياداسىنىڭ التى قۇرلىقتان جيىلعان بوكسشىلار باسەكەسىندە قارسىلاستارىن قوعاداي جاپىرعان دانيار جايلى قىزىقتى اڭگىمەنىڭ تيەگىن اعىتقان ۇستازدارى: «ستۋدەنت كەزىندە ول ءبىر رەت وقۋدان شىعۋعا وقتالىپ, ارىز جازعىسى كەلدى. الايدا, ءبىز ونىڭ بۇل ارەكەتىن قۇپتامادىق. سول كەزدە قارسىلىق تانىتپاعانىمىزدا, چەمپيون شاكىرتىمىز بار دەپ ايتپاس ەدىك», دەيدى. ورايى كەلگەندە, ءبىز دە ءوزى وقىعان قارا شاڭىراققا چەمپيون قاشان ات باسىن بۇرادى دەپ سۇرادىق. فاكۋلتەت دەكانىنىڭ ايتۋىنشا, دانياردىڭ ستۋدەنتتەرمەن كەزدەسۋى الداعى قىركۇيەك ايىندا ۇيىمداستىرىلماق.
تالعات رايىمبەك,
«ەگەمەن قازاقستان»