برازيليا بوز كىلەمىندەگى بەلدەسۋلەر قاراعاندىلىق بالۋان قىز ەلميرا سىزدىقوۆا ءۇشىن ءساتسىز باستالدى. 1/8 فينالدا ول رەسەيلىك مىقتى بالۋان, لوندون-2012 وليمپياداسىنىڭ چەمپيونى, 2015 جىلعى الەم چەمپيونى ناتاليا ۆوروبەۆادان 1:4 ەسەبىمەن ۇتىلىپ قالدى. الايدا, قارسىلاسى فينالعا شىعۋى ناتيجەسىندە جولى بولعان ەلميرا جۇبانىش بەلدەسۋىن وتكىزۋگە مۇمكىندىك الدى.
بالۋان قىز تاعدىردىڭ وزىنە توسىننان بەرگەن مۇمكىندىگىنە قوس قولداپ جابىستى. اۋەلى ول موڭعول سپورتشىسى وچيرباتىن ناسانبۋرمامەن بوز كىلەمگە شىقتى. اسا تارتىستى وتكەن كۇرەس 2:2 ەسەبىمەن تەڭ اياقتالدى. تورەشىلەر اقىلداسا كەلىپ, كىلەم ۇستىندە بەلسەندىلىگىمەن كوزگە تۇسكەن ءبىزدىڭ بالۋانعا ءبىر ۇپايدى ارتىق بەرىپ, جەڭىستى قولىنا ۇستاتتى. قارسى الدىنان جارق ەتىپ جۇلدىز جانعان ەلميرا كۇشىنە ءمىنىپ, قولا مەدال ءۇشىن بولعان بەلدەسۋدە مىسىر ەلىنىڭ قىزى ەناس موستافا يۋسسەف احمەدتى 7:4 ەسەبىمەن بەت قاراتپاي ۇتتى. ءسويتىپ, قاراعاندىنىڭ قايسار قىزى جەڭىس تۇعىرىنىڭ ءۇشىنشى ساتىسىنا كوتەرىلىپ, قازاق ەلىنىڭ جۇلدە قورجىنىنا 12-ءشى مەدالدى سالدى.
ەلميرا سولتۇستىك قازاقستان وبلىسىنىڭ تۋماسى بولسا دا قاراعاندى ونى «ءوزىمىزدىڭ قايسار قىز» دەپ ورىندى ماقتان ەتەدى. سەگىزىنشى سىنىپتا وقىپ جۇرگەنىندە اكەسى ەلميرانى قاراعاندىعا الىپ كەلىپ, ءاليا مولداعۇلوۆا اتىنداعى سپورتقا بەيىمدى, دارىندى بالالارعا ارنالعان وبلىستىق مامانداندىرىلعان مەكتەپ-ينتەرناتتىڭ كۇرەس بولىمىنە بەرگەن ەكەن. بۇل جەردە ۆلاديمير ستاروسەلسكي سىندى بىلىكتى باپكەردىڭ قاراۋىندا جاتتىقتى. ەڭ العاشقى ءىرى جارىسى – تاشكەنتتە وتكەن كادەتتەر اراسىنداعى ازيا چەمپيوناتىندا توپ جارعان ەلميرا جۇرتتىڭ نازارىن وزىنە بىردەن اۋدارتتى. سول كەزدىڭ وزىندە-اق ول بولاشاعىنان مول ءۇمىت كۇتتىرگەن بالۋاندار ساناتىنا قوسىلدى.
جالپى, ءوزىنىڭ 24 جاسىنا دەيىن ەلميرا سىزدىقوۆا كۇرەس الەمىندە تالاي بيىكتەردى باعىندىرىپ ۇلگەرگەن. 2012 جىلى جاسوسپىرىمدەر اراسىندا ازيانىڭ چەمپيونى اتاندى. ارادا ءبىر جىل وتكەندە گولدەن گران-پري – 2013 ءتۋرنيرىنىڭ كۇمىس جۇلدەگەرى اتاندى. 2014 جىلى ەرەسەكتەر اراسىندا ازيا چەمپيوناتىندا باق سىناپ, جۇلدەلى ءۇشىنشى ورىنعا تابان تىرەدى. سول جىلى موڭعوليادا وتكەن گران-پري جارىسىندا قارسىلاستارىنىڭ ءبارىن قيراتا جەڭىپ, التىن مەدالدى ۇتىپ الدى. ءبىر جىلدان كەيىن ازيا چەمپيوناتىندا كۇرەسىپ, تەك فينالدا عانا قارسىلاسىنا جول بەردى.
بيىلعى جىل ەلميرا ءۇشىن اسا تابىستى جىلداردىڭ ءبىرى بولدى. الدىمەن ول ي.يارىگيننىڭ ءجۇلدەسى ءۇشىن وتكەن گران-پري ءتۋرنيرىندە توپ جارسا, ودان كەيىن ازيا چەمپيوناتىندا تاعى دا كۇمىس ءجۇلدەگە قول سالدى. ال 18-20 ناۋرىزدا استانادا وتكەن ليتسەنزيالىق تۋرنيردە ءساتتى ونەر كورسەتكەن ەلميرا ريو-2016 وليمپياداسىنىڭ جولداماسىن جەڭىپ الدى.
جالپى, ەلميرا 69 كيلو سالماقتا ەلىمىز بويىنشا ءوزىنىڭ مىقتىلىعىن كىلەم ۇستىندە تالاي مارتە دالەلدەدى. مىسالى, ول تاراز قالاسىندا وتكەن قازاقستان چەمپيوناتىندا ءوز سالماعىنداعى 14 بالۋاننىڭ ىشىنەن ۇزدىك شىقتى.
– سپورتپەن بىرگە ءبىلىمدى دە قاتار الىپ ءجۇرگەن اقىلدى قىزداردىڭ ءبىرى. ول ە.بوكەتوۆ اتىنداعى قارمۋ-دىڭ دەنە تاربيەسى جانە سپورت فاكۋلتەتىن تامامداعان. قازىر قاراعاندى ەكونوميكالىق ۋنيۆەرسيتەتىندە ەكىنشى جوعارى ءبىلىم الۋ ءۇشىن وقىپ ءجۇر.
قايرات ءابىلدينوۆ,
«ەگەمەن قازاقستان»
قاراعاندى
سۋرەتتى تۇسىرگەن دانيار مايلىباەۆ