قازاقستان بوكس فەدەراتسياسى كەشە وتە ءبىر جاقسى ۇيعارىم جاسادى. ريو-دە-جانەيرو رينگىندە كۇمىس مەدال العان ۆاسيلي لەۆيتكە وليمپيالىق ويىنداردىڭ التىن جۇلدەگەرى ءۇشىن بەلگىلەنگەن 250 مىڭ دوللار مولشەرىندە سىياقى تولەنەتىن بولدى.
فەدەراتسيا مۇنى قازاقستاندىق بىلعارى قولعاپ شەبەرىنىڭ رەسەيلىك ەۆگەني تيششەنكومەن Rioسentro سپورت كەشەنىندە وتكىزگەن فينالدىق جەكپە-جەگىندەگى كەرەمەت ونەرىنىڭ لايىقتى باعالانۋ دەپ ءتۇسىندىردى. شىنىندا ۆاسيلي بۇل شايقاستا وتە جوعارى دەڭگەيدەن كورىندى. ۇرىس ءبىتىپ, تورەشىلەر جەڭىستى ءبىر اۋىزدان ونىڭ قارسىلاسىنا بەرىپ جىبەرگەندە, زال تولى كورەرمەن حابارلامانى ىسقىرىپ قارسى الدى. بۇل وقيعا كەيىن بۇكىل الەمدە ءوزىنىڭ جاڭعىرىعىن الىپ كەتتى.
«قازاقستان بوكس فەدەراتسياسى ۆاسيلي لەۆيتتى وليمپيالىق مەدال جەڭىپ الۋىمەن قۇتتىقتايدى. ونىڭ ريوداعى ۇرىستارى الەمنىڭ ءارتۇرلى ەلدەرىندەگى بەدەلدى بوكس ساراپشىلارىنىڭ, ەڭ باستىسى, قازاقستانداعى سياقتى, سىرت جاقتاردا دا قىزۋ قولداۋ كورسەتەتىن جانكۇيەرلەرىنىڭ ەڭ جوعارى باعالارىنا يە بولىپ, ۆاسيليدىڭ بۇعان شىنىندا لايىقتى ەكەنىن كورسەتىپ بەردى. ول قازاقستان بوكس فەدەراتسياسىنىڭ, جاتتىقتىرۋشىلار شتابىنىڭ جانە بۇكىل ەلدىڭ سەنىمىن اقتادى», – دەپ اتاپ ءوتىلگەن وسى جايىندا ءمالىم ەتىلگەن حابارلامادا.
«AIBA-نىڭ ەرەجەلەرىنە سايكەس, تورەشىلەر شەشىمىنە نارازىلىق بىلدىرىلمەيدى, ال ءبىز حالىقارالىق بوكس اسسوتسياتسياسىنىڭ مۇشەسى رەتىندە وسى ەرەجەنى ۇستانۋعا مىندەتتىمىز. قازاقستان بوكس فەدەراتسياسى تورەشىلەردىڭ شەشىمىن قۇرمەتتەيدى», – دەلىنگەن بۇدان ءارى.
«ۆاسيلي لەۆيت وليمپيادا رينگىنىڭ فينالدىق جەكپە-جەگىندە تاماشا ناتيجە, جەڭىسكە دەگەن وراسان زور جىگەر كورسەتتى. سوندىقتان قازاقستان بوكس فەدەراتسياسىنىڭ پرەزيدەنتى تيمۋر ق ۇلىباەۆتىڭ شەشىمى بويىنشا, وعان وليمپيادانىڭ كۇمىس مەدالىن جەڭىپ العانى ءۇشىن مەملەكەتتەن تولەنەتىن 150 مىڭ دوللارعا تاعى 100 مىڭ قوسىلىپ, وليمپيالىق «التىنعا» تەڭ سىياقى بەرىلەتىن بولدى», – دەپ جازادى فەدەراتسيانىڭ ءباسپاسوز قىزمەتى.
سۋرەتتى تۇسىرگەن دانيار مايلىباەۆ