اقتاۋ حالىقارالىق تەڭىز ساۋدا پورتىنىڭ اۋماعىنداعى العاشقى اسكەري ايلاقتىڭ قۇرىلىسى اياقتالىپ كەلەدى. نىسان بيىلعى جىلدىڭ قازان ايىندا رەسمي تۇردە تاپسىرىلادى دەپ كۇتىلۋدە.
ايلاقتىڭ قۇرىلىسى اقپان ايىندا باستالعان بولاتىن. قازىرگى كەزدە گيدروتەحنيكالىق قۇرىلىستاعى جۇمىس قىزۋ ءجۇرىپ جاتىر. بۇل قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ تاريحىندا اسكەري ماقساتتاعى تۇڭعىش ايلاق بولايىن دەپ تۇر. قازىرگى ساتتە قازاقستاندىق اسكەري كەمەلەر اسكەري-تەڭىز بازاسىنان 140 شاقىرىم قاشىقتىقتاعى باۋتينو كەنتىندەگى جالعا الىنعان پيرستا ورنالاسقان. بۇل اقتاۋ قالاسىندا تۇراتىن اسكەري قىزمەتشىلەرگە بەلگىلى ءبىر قولايسىزدىق تۋعىزۋدا. وسىلايشا, جەكەمەنشىك تەڭىز پيرسىنىڭ بوي كوتەرۋى اسكەري-تەڭىز كۇشتەرى ءۇشىن ماڭىزدى وقيعا بولىپ تابىلادى.
ايلاقتىڭ قۇرىلىسىمەن اقتاۋ شاھارى پورتىنىڭ اۋماعىنداعى 1,2 گا جەر تەلىمىندە «اسكەري قۇرىلىس» اكتسيونەرلىك قوعامى اينالىسۋدا.
«اقتاۋ قالاسىنىڭ پورتىندا العاشقى اسكەري-تەڭىز كۇشتەرى كەمەلەرىنىڭ ورنالاسۋ پۋنكتىنىڭ سالىنۋى اسكەري-تەڭىز كۇشتەرىنە كاسپي تەڭىزىنىڭ قازاقستاندىق سەكتورىنداعى ىقتيمال قاۋىپ-قاتەرلەرگە ءتيىمدى جانە ۋاقتىلى دەن قويۋعا, كاسپي تەڭىزىنىڭ كەز كەلگەن اۋدانىنا كەمەلەردىڭ شىعۋىن جەدەل جۇزەگە اسىرۋعا جانە ماتەريالدىق-تەحنيكالىق قامتاماسىز ەتۋدىڭ بارلىق ءتۇرلەرىمەن قامتاماسىز ەتۋ مەن تاسىپ جەتكىزۋدى دەر كەزىندە ۇيىمداستىرۋعا, تەحنيكا مەن قارۋ-جاراقتىڭ موتوقورىن ۇنەمدەۋگە ءمۇمكىندىك بەرىپ, جانار-جاعارماي ماتەريالدارىنا جۇمسالاتىن شىعىندى ايتارلىقتاي قىسقارتادى», – دەدى ءوزىنىڭ سوزىندە قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ قولباسشىسى ۆيتسە-ادميرال جانداربەك جانزاقوۆ.
«ەگەمەن-اقپارات»