«وسىنداي توي وتىراردا بۇرىن-سوڭدى بولماعان», دەپ اقىن سابىرحان اسانوۆ جىرلاعانداي, كۇنى كەشە وسىناۋ كيەلى وڭىردە ءان مەرەكەسى بولىپ ءوتتى. كەلتىرىپ وتىرعان ولەڭ جولدارى داڭقتى كومپوزيتور ءشامشى قالداياقوۆتىڭ اتاقتى ءانىنىڭ ماتىنىنەن الىنعان.
تۇتاس ءبىر ۇرپاقتى اسەم سازىمەن الديلەگەن, اۋەنىمەن تاربيەلەگەن شاكەڭ شىنىندا دا باقىتتى جان. ەلىمىزدىڭ ءانۇرانى بولىپ قابىلدانعان «مەنىڭ قازاقستانىم» انىنە بيىل 60 جىل تولسا, ونىڭ مەملەكەتتىك رامىزدەر قاتارىنا ەنگەنىنە 10 جىل بولدى. كومپوزيتوردىڭ كىندىك قانى تامعان ولكەسىندەگى توي وسىنداي مەرەيلى داتالارمەن تۇسپا-تۇس كەلگەندىكتەن, وتە جوعارى دەڭگەيدە ۇيىمداستىرىلدى.
اۋدان ورتالىعىنداعى مادەنيەت سارايىندا «مەنىڭ قازاقستانىم» ءان بايقاۋىنىڭ اقتىق سايىسى ءوتتى. وبلىستىق دەڭگەيدەگى ءىس-شارا سۋرەتشى ءادىلحان مالىك پەن ءبىر توپ شاكىرتتەرىنىڭ «ساعىنىش سازىن سامعاتقان – ءشامشى» اتتى سۋرەت كورمەسىمەن باستالىپ, ءان بايقاۋىمەن جالعاسىن تاپتى. شيرەك عاسىرعا جۋىق تاريحى بار كونكۋرس اۋدانىمىزدا العاش رەت ۇيىمداستىرىلىپ, وعان سايدىڭ تاسىنداي ىرىكتەلگەن 20 ۇمىتكەر قاتىسىپ, ءوز ونەرلەرىن ورتاعا سالدى.
«مەنىڭ قازاقستانىم» ءان فەستيۆالىنىڭ گالا-كونتسەرتى ش.قالداياقوۆ اۋىلىنداعى «الپامىس باتىر» سپورت كەشەنىندە جالعاسىن تاپتى. كەشكە ارنايى قاتىسقان وبلىس اكىمى بەيبىت اتامقۇلوۆ بارشا وڭتۇستىك جۇرتشىلىعىن ونەر مەرەكەسىمەن قۇتتىقتاپ, ءسوز سويلەدى.
– ءشامشى مۇراسىن بولاشاق ۇرپاققا جەتكىزۋ, اسەم اندەرىن ناسيحاتتاۋ بارىسىندا ءالى تالاي-تالاي شارۋالار جاساۋ – ءبىزدىڭ ازاماتتىق بورىشىمىز. ءشامشى قالداياقوۆ اتىنداعى «مەنىڭ قازاقستانىم» ءان بايقاۋى جىلدا شىمكەنت قالاسىندا ءوتىپ كەلگەن بولاتىن. سونداي-اق, كورنەكتى اقىنىمىز جۇمەكەن ناجىمەدەنوۆتىڭ سوزىنە جازىلعان «مەنىڭ قازاقستانىم» انىنە بيىل 60 جىل تولدى. وسىعان وراي, بايقاۋ بيىلعى جىلى ءشامشى اعامىزدىڭ تۋعان اۋىلىندا العاش رەت وتۋدە. كەلەسى جىلدان باستاپ اتالعان بايقاۋدى وبلىسىمىزدىڭ بارلىق اۋدان, قالالارىندا وتكىزۋ ۇردىسكە اينالاتىن بولادى. 2017 جىلى بۇل فەستيۆالدى سوزاق اۋدانىندا وتكىزۋدى ۇسىنامىن, – دەدى وبلىس باسشىسى.
سونداي-اق, ول ەلوردامىز استانا قالاسىندا دارا تالانت يەسىنە وڭتۇستىكتىڭ اتىنان ەڭسەلى ەسكەرتكىش ورناتىلاتىنىن, ءشامشىنىڭ تۋعان اۋىلىندا دا ەسكەرتكىشىن قويۋ جانە مۋزىكا مەكتەبىن اشۋ تۋرالى ويىمەن ءبولىستى.
قۇتتىقتاۋ سوزىنەن سوڭ ءوڭىر باسشىسى جۇزدەن جۇيرىك شىققان əن بايقاۋىنىڭ جەڭىمپازدارىن ماراپاتتادى. ءىىى ورىنعا تۇركىستان قالاسىنان كەلگەن «اسۋ» دۋەتى لايىقتى دەپ تانىلدى. وبلىس əكىمىنىڭ ارنايى جۇلدەسى ارىستىق جۇلدىز ادىلبەكوۆاعا بۇيىردى. جۇلدەلى ءىى ورىندى سوزاقتىق گۇلبانۋ شالاباەۆا يەلەنسە, بايقاۋعا شىمكەنت قالاسىنان سىنعا تۇسكەن تۇرعىنبەك بەكزات ءى ورىننان كورىندى. ال بايقاۋدىڭ باس جۇلدەسىنە كومپوزيتوردىڭ جەرلەسى, وتىرار اۋدانىنىڭ تۋماسى رۋسلان اقىنبەكوۆ يە بولدى.
بارشا كونكۋرسانتتارعا وبلىس اكىمىنىڭ ارنايى سىيلىعى تابىستالىپ, ەل تاۋەلسىزدىگىنىڭ 25 جىلدىعىنا وراي وتكىزىلگەن مادەني شارا وڭتۇستىك ونەرپازدارىنىڭ كونتسەرتتىك باعدارلاماسىنا ۇلاستى.
الماس اقىلبەك,
جۋرناليست
وڭتۇستىك قازاقستان وبلىسى