ءتۇرلى برەند ونىمدەردىڭ ليۋكس نۇسقاسىن جاساۋمەن اينالىساتىن «Brikk» كومپانياسى جاقىندا دۇنيە جۇزىندەگى ەڭ قىمبات سمارتفونداردى ساتىلىمعا شىعارماق. iPhone 7 سمارتفونىن ءتۇرلى اسىل تاستارمەن بەزەندىرەتىن كومپانيا ونىڭ باعاسىن الدىن الا 1,3 ميلليون دوللارعا باعالاپ وتىر.
سمارتفون قىمبات مەتالدارمەن قاپتالىپ, گاۋھار تاستارمەن ارلەنەدى. زەرگەرلەر وعان 24 كارات سارى التىن, 1 كارات قىزعىلت التىن, 950 سىنامالى پلاتينا, سونداي-اق ءىرىلى-ۇساقتى 60 كاراتتىق گاۋھار تاستاردى پايدالانباق.
– باعاسى بۇدان الدەقايدا ارزانداۋ ءتۇرىن دە ساتىپ الۋعا بولادى. ونداي سمارتفونداردى قىزعىلت جانە سارى التىنمەن, گاۋھار تاستارمەن بەزەندىرەمىز. ارينە, الدىڭعىسىنا جەتپەيدى, ەسەسىنە قاراپايىم سمارتفونداردان كوپتەگەن ارتىقشىلىقتارى بار. باعاسى دا اسا قىمبات ەمەس – 5 مىڭ دوللار شاماسىندا, – دەيدى كومپانيا وكىلى.
«Brikk» كومپانياسى بۇعان دەيىن التىنمەن فوتواپپارات, قولساعات, بەلبەۋ سىندى برەند ونىمدەردىڭ ليۋكس نۇسقاسىن شىعارعان بولاتىن. «Apple» كومپانياسىنىڭ بۇرىنعى ونىمدەرىن دە ارلەگەن. الايدا, سمارتفونداردىڭ اراسىنداعى ەڭ باعالىسى iPhone 7 بولعالى تۇر. قىمبات قۇرىلعىنىڭ فوتوسى كومپانيانىڭ رەسمي سايتىندا كورسەتىلگەن. قازىردىڭ وزىندە ونى ساتىپ الۋعا تاپسىرىس بەرىپ جاتقاندار كوپ.
نۇرحان اسقار