ەلىمىزدىڭ شەكاراشىلارى وتكەن تاۋلىك ىشىندە عانا جالپى سالماعى جارتى كيلوگرامداي بولاتىن ەسىرتكى زاتتارىن جاسىرىن وتكىزۋگە ارەكەتتەنگەندەردى ۇستادى.
ناقتىراق ايتقاندا, قازاقستان-قىرعىزستان شەكاراسىنىڭ بويىندا ورنالاسقان «قورداي-اۆتو» باقىلاۋ-وتكىزۋ بەكەتىنىڭ شەكاراشىلارى قىزمەتتىك يتتىڭ كومەگىمەن رەسەي فەدەراتسياسىنىڭ 30 جاستاعى ازاماتىن ۇستادى.
ول ازامات «ۆاز-2115» اۆتوكولىگىمەن قازاقستاننان قىرعىزستانعا بارا جاتىر ەكەن. ال سالماعى 15 گرامم تارتقان قاراسورا تۇقىمى اۆتوكولىكتىڭ جۇكسالعىشىنداعى قولسومكەسىنەن تابىلدى.
ءدال وسى كۇنى قاراساي شەكارا وتريادىنا قاراستى «ساتى» زاستاۆاسىنىڭ شەكاراشىلارى دا رايىمبەك اۋداندىق ىشكى ءىستەر ءبولىمىنىڭ قىزمەتكەرلەرىمەن بىرلەسە وتىرىپ, 39 جاستاعى تاعى ءبىر ازاماتتى ۇستادى. ول سالماعى 500 گرامم بولاتىن «گاشيشتى» دايىنداپ جاتقان جەرىنەن قولعا تۇسكەن ەكەن. بۇل تۋرالى ۇقك شق ءباسپاسوز قىزمەتى حابارلادى.