16-17 تامىز كۇندەرى وسكەمەن قالاسىندا قازاقستان رەسپۋبليكاسى مەن رەسەي فەدەراتسياسى ىشكى ىستەر مينيسترلىكتەرىنىڭ ەكىنشى بىرلەسكەن القا وتىرىسى ءوتتى. ونىڭ جۇمىسىنا ەكى مەملەكەتتىڭ ىشكى ىستەر مينيسترلەرى قالمۇحانبەت قاسىموۆ پەن ۆلاديمير كولوكولتسەۆ, ولاردىڭ ورىنباسارلارى, قىزمەتتەر مەن شەكارالاس ىشكى ىستەر ورگاندارىنىڭ باسشىلارى, سونىمەن بىرگە, شىعىس قازاقستان وبلىسى اكىمدىگىنىڭ وكىلدەرى قاتىستى.
دەلەگاتسيا باسشىلارى ەكىجاقتى ۆەدومستۆوارالىق قاتىناستاردىڭ دامۋ بارىسىنا جوعارى باعا بەرىپ, العاشقى ءبىرلەسكەن القا ءماجىلىسىنىڭ شەشىمدەرىن (استراحان ق., 2015 جىل) ىسكە اسىرۋداعى قادامدار, اسىرەسە, شەكارالاس ايماقتاردا قىلمىستى الدىن الا تەرگەۋدى جۇزەگە اسىرۋداعى ىنتىماقتاستىق جاندانعانىن ايتتى. ال ق.قاسىموۆ قىلمىسقا قارسى كۇرەس ماسەلەسىندەگى مينيسترلىكتەردىڭ ءوزارا ءىس-ارەكەتى جاڭا ساپالى دەڭگەيگە كوتەرىلگەنىن اتاپ كورسەتتى.
وتىرىس بارىسىندا ەكى مەملەكەتتىڭ ەكسترەميزمگە قارسى كۇرەستە بىرلەسە ارەكەت ەتۋ ءماسەلەلەرى تالقىلاندى. تەرروريستىك جانە ەكسترەميستىك قىلمىسقا قاتىسى بار ىزدەۋدە جۇرگەن ادامدار, تەرروريستىك جانە ەكسترەميستىك ۇيىمدار تۋرالى اقپارات الماسۋدى جانداندىرۋ جولدارى قاراستىرىلدى. سونداي-اق, كەزدەسۋدە جول قوزعالىسىن قامتاماسىز ەتۋ سالاسىنداعى ىشكى ىستەر ورگاندارىنىڭ ەكىجاقتى ىنتىماقتاستىعىنىڭ جاي-كۇيى مەن بولاشاعى ءسوز بولىپ, ونى جەتىلدىرۋ شارالارى پىسىقتالدى.
بۇدان بولەك, تاراپتار اۆتوكولىك قۇرالدارىن تىركەۋ جانە ەسەپتەن شىعارۋ, تىركەۋ جانە جۇرگىزۋشى كۋالىكتەرىن بەرۋ, سونىمەن قاتار, كولىك قۇرالدارى مەن ونى ۇرلاۋعا قاتىسى بار ادامداردى تابۋ ءۇشىن جەدەل ىزدەستىرۋ شارالارىن جۇرگىزۋ جونىندە ءوزارا ءىس-قيمىل جاساۋ تۋرالى جەدەل مالىمەت الماسۋدى جانداندىرۋدىڭ جولدارى حاقىندا پىكىر الماستى.
وتىرىس قورىتىندىسى بويىنشا دەلەگاتسيا باسشىلارى ەكسترەميزممەن كۇرەس جانە جول قاۋىپسىزدىگىن قامتاماسىز ەتۋ سالاسىنداعى ىنتىماقتاستىقتى ورىستەتۋگە باعىتتالعان شەشىمگە قول قويىپ, بىرلەسكەن القا وتىرىسىنىڭ الداعى جىلعا ارنالعان جۇمىس جوسپارىن بەكىتتى.
«ەگەمەن-اقپارات»