سىرتقى ىستەر ءمينيسترى ەرلان ىدىرىسوۆتىڭ ءتوراعالىعىمەن جانە ەلىمىزدىڭ قارجى مينيسترلىگى مەملەكەتتىك كىرىستەر كوميتەتىنىڭ توراعاسى داۋلەت ەرعوجيننىڭ قاتىسۋىمەن قازاقستاندا اككرەديتتەلگەن بارلىق ديپلوماتيالىق ميسسيا مەن حالىقارالىق ۇيىمدار وكىلدەرىنە ارنالعان بريفينگ ءوتتى.
«سىزدەر جازعى دەمالىستان كەيىن قىزمەتتەرىڭىزگە جاڭادان كىرىسىپ جاتىرسىزدار. الداعى ۋاقىتتا ءبىزدىڭ كوپجاقتى ءارى جەمىستى ارىپتەستىگىمىزدى دامىتۋعا ۇلەس قوساسىزدار دەگەن سەنىمدەمىز. ءبىز بولاشاقتا دا وسى يگى ءداستۇرىمىزدى ساقتاي وتىرىپ, سىزدەرمەن تۇراقتى تۇردە كەزدەسۋ وتكىزگىمىز كەلەدى. ماسەلەن, الداعى ۋاقىت ايتۋلى وقيعالارعا تولى بولماق. ەڭ باستى وقيعا – ول قازاقستان تاۋەلسىزدىگىنىڭ 25 جىلدىعى. دەمەك, بۇل جىل ەلىمىز ءۇشىن تاريحي ماڭىزى بار داتانى اتاپ وتۋگە ارنالماق», – دەگەن سىرتقى ساياسات ۆەدومستۆوسىنىڭ باسشىسى بيىلعى جىلعا جوسپارلانعان ماڭىزدى شارالارعا ەلىمىزدە تىركەلگەن شەتەلدىك ديپلوماتيالىق ميسسيا وكىلدەرى مىندەتتى تۇردە شاقىرىلاتىنىن جەتكىزدى.
سونداي-اق, مينيستر: «ءبىز 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ سايلانۋىنا وتە قۋانىشتىمىز. بۇل – قازاقستان ءۇشىن ۇلكەن جەتىستىك. وسى ورايدا سىزدەردىڭ قولداۋلارىڭىز بەن ىقپالداستىق جۇمىستارىڭىزعا العىسىمىزدى ايتامىز», – دەدى. ە. ىدىرىسوۆتىڭ ايتۋىنشا, قازاقستان بۇۇ قاۋىپسىزدىك كەڭەسىندەگى ءوزىنىڭ جاۋاپكەرشىلىككە تولى مىندەتىنە دايىندىق ۇستىندە. بۇل رەتتە, قازاقستاننىڭ اتالعان كەڭەستىڭ تۇراقتى ەمەس مۇشەسى بولۋىنا قاتىستى كەشەندى جوسپار دا ازىرلەنىپ جاتقان كورىنەدى.
سونىمەن قاتار, مينيستر ەلباسىنىڭ باستاماسى نەگىزىندە 29 تامىزدا الەمدىك دەڭگەيدە يادرولىق قارۋعا قارسى ءىس-قيمىلدىڭ حالىقارالىق كۇنى اتاپ وتىلەتىنىنە, بيىل دا بۇل اتاۋلى داتاعا بايلانىستى اۋقىمدى شارا ۇيىمداستىرىلاتىنىنا توقتالدى. «جاقىندا سەمەي يادرولىق پوليگونىنىڭ جابىلۋىنىڭ 25 جىلدىعىنا وراي, حالىقارالىق كونفەرەنتسيا ۇيىمداستىرىلماق. قازاقستاننىڭ يادرولىق قارۋسىزدانۋ جانە تاراتپاۋ ماسەلەسىندە كوشباسشى ەلگە اينالۋى ءۇشىن بارلىق قۇقىعى بار. سوندىقتان, 29 تامىز كۇنى وسى ماسەلەگە ارنالعان اۋقىمدى كونفەرەنتسيا وتەدى», – دەي كەلە, وعان ازيا, افريكا, ەۋروپا ەلدەرىنەن قۇرمەتتى قوناقتار مەن لاۋازىمدى تۇلعالاردىڭ ارنايى شاقىرىلىپ وتىرعانىن جەتكىزدى.
سىرتقى ىستەر ءمينيسترى قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە بەيبىتشىلىكتى نىعايتۋ اياسىنداعى باستامالاردى بۇدان كەيىن دە ىلگەرىلەتە بەرەتىنىن, ول ءۇشىن سەرىكتەستەرمەن تىعىز ارىپتەستىك بايلانىس ورناتۋ جالعاساتىنىن ايتتى.
ەرلان ىدىرىسوۆ, سونداي-اق, قازاقستان تاۋەلسىزدىگىنىڭ 25 جىلدىعى قارساڭىندا اۋقىمدى شارالار اتقارىلاتىنى جانە ەلباسى نۇرسۇلتان نازارباەۆتىڭ شەتەلدەرگە جوسپارلانعان ساپارلارى تۋرالى ايتىپ بەردى. «قازاقستان پرەزيدەنتىنىڭ حالىقارالىق ساپارلارىنىڭ كەستەسى وتە تىعىز. ماسەلەن, مەملەكەت باسشىسىنىڭ پولشاعا, سەربياعا ساپارلارى جوسپارلانعان, سونىمەن قاتار, ءبىز قىركۇيەكتە قىتايداعى G20 سامميتىنە شاقىرىلدىق. بۇدان بولەك, ەلباسى كۇزدە جاپونياعا, كورەياعا ساپارلايدى, سونداي-اق, ازەربايجان مەن ارمەنياعا, ساۋد ارابياسى كورولدىگىنە جانە يوردانياعا بارادى. بۇدان باسقا دا ءىرى شارالار وتكىزىلەدى», – دەدى مينيستر بۇل تۋراسىندا.
ءوز سوزىندە ە.ىدىرىسوۆ مەملەكەت باسشىسى ن.نازارباەۆتىڭ الەمدەگى ەڭ ءىرى يادرولىق پوليگوندى جابۋ تۋرالى تاريحي جارلىعىنا 25 جىل تولۋى حالىقارالىق ماڭىزعا يە وقيعا ەكەنىنە, سوندىقتان, اتالعان مەرەيتوي اياسىندا 29 تامىز كۇنى استانادا ۇلكەن كونفەرەنتسيا ۇيىمداستىرىلاتىنىنا توقتالدى. ونىڭ ايتۋىنشا, ماڭىزدى جيىنعا انتيادرولىق قوزعالىستىڭ بەلدى وكىلدەرى, شەتەلدەردىڭ جانە حالىقارالىق ۇيىمداردىڭ جوعارى لاۋازىمدى وكىلدەرى قاتىسادى. ماسەلەن, دۇنيە جۇزىنەن كەلگەن 150-گە تارتا دەلەگات يادرولىق قارۋدان جانە ونىڭ سىناقتارىنان تولىقتاي باس تارتۋعا قول جەتكىزۋ ماسەلەلەرىن تالقى تارازىسىنا سالماق.
بريفينگ كەزىندە ۆەدومستۆو باسشىسى مەن مەملەكەتتىك كىرىستەر كوميتەتىنىڭ توراعاسى داۋلەت ەرعوجين قازاقستان رەسپۋبليكاسىنىڭ سالىق زاڭناماسىنا ەنگىزىلگەن تۇزەتۋلەرگە قاتىستى دا تۇسىنىكتەمە بەردى. ماسەلەن, د. ەرعوجيننىڭ ايتۋىنشا, بۇل تۇزەتۋلەر مەن وزگەرىستەردىڭ شەتەلدىك بيزنەسكە ەش قاتىسى بولمايدى ەكەن. ال بۇل تۋرالى ءوز ويىن بىلدىرگەن ە.ىدىرىسوۆ: «ەلىمىزدەگى شەتەلدىك بيزنەستىڭ تىنىس-تىرشىلىگى ءاردايىم قازاقستاننىڭ نازارىندا تۇرادى. ءبىز ولاردىڭ قىزمەت ەتۋىنە بارلىق جاعدايدى جاساۋعا ءازىرمىز. قارجى مينيسترلىگىنىڭ مەملەكەتتىك كىرىستەر كوميتەتى دە ديپلوماتيالىق كورپۋسپەن جانە شەتەلدىك بيزنەسپەن بەلسەندى جۇمىس اتقارۋعا دايىن», – دەدى.
ءلايلا ەدىلقىزى,
«ەگەمەن قازاقستان»