بۇگىن ريو-دە-جانەيرودا ءوتىپ جاتقان وليمپيالىق ويىنداردا 69 كيلوعا دەيىنگى سالماق دارەجەسى بويىنشا مەدالدار بولىسىنە قاتىساتىن قازاقستاندىق اۋىر اتلەت جازيرا جاپپارقۇل باس جۇلدەگە ۇمىتكەرلەردىڭ ءبىرى بولىپ سانالىپ وتىر. ونىڭ بۇل ماقساتقا جەتە الۋى مۇمكىن بە؟ ەندى شەتەلدىك جانە ءوزىمىزدىڭ سپورت ساراپشىلارىنىڭ پىكىرلەرىنە سۇيەنىپ, ءوز ويلارىمىزدى تارقاتىپ, ايتىپ كورەيىك.
ءبىزدىڭ ساڭلاققا بۇل جولدا قىتايدىڭ سايىپقىرانى سيان يانمەي باستى باسەكەلەس بولاتىن ءتۇرى بار. جانە التىن مەدالدىڭ باستى ءفاۆوريتى رەتىندە دە سول اسپان استى ەلىنىڭ وكىلى اتالىپ وتىر. ەگەر جازيرا ونى جەڭىپ شىعاتىن بولسا, قىتايدىڭ وسى كۇندەرى داڭقتارى اسىپ, اسىقتارى الشىسىنان ءتۇسىپ تۇرعان اۋىر اتلەتتەرىنە ءبىر توسقاۋىل قويۋمەن بىرگە, قازاق جاستارى اراسىندا سپورتتىڭ وسى سالاسى بويىنشا وليمپيادانىڭ چەمپيونى اتانعان ءبىرىنشى وكىلى بولىپ شىعا كەلەر ەدى.
جاسىراتىنى جوق, وسىنىڭ الدىندا كورەيا سپورتشىسى رە ىن حي دوپينگ پايدالانعانى ءۇشىن ديسكۆاليفيكاتسياعا ۇشىراعاننان كەيىن جازيرانىڭ جولى اشىلىپ قالعانداي بولىپ كورىنگەن. قازاقستاندىق اتلەت الماتىدا وتكەن الەم چەمپيوناتىندا تاپ وسى قارسىلاسىنا ەسە جىبەرىپ, كۇمىس مەدالدى قاناعات تۇتقان بولاتىن. ال حيۋستوندا كورەي قىزى ءوزىنىڭ مۇمكىندىكتەرىن بارىنشا جارقىراتىپ كورسەتە قويعان جوق. شاماسى, بارلىق جۇلدەگەرلەردى باقىلاۋعا الاتىن دوپينگ-تەكسەرىستەن ساقتانسا كەرەك. الايدا, ول ءبارىبىر تىيىم سالىنعان پرەپاراتتاردى پايدالانعانى ءۇشىن قۇرىققا ءتۇسىپ قالدى. ونىمەن بىرگە رەسەيلىك ولگا افاناسەۆا دا وسىنداي قاھارعا ۇشىرادى.
وسىلايشا الەمنىڭ ەكى بىردەي مىقتىسى جازيرانىڭ باستى باسەكەلەستەرى ساپىنان شىعىپ كەتتى. بۇعان قوسا, رەسەي قۇراماسى بۇل وليمپياداعا قاتىسۋ قۇقىعىنان ايرىلدى. سوندىقتان جاپپارقۇل تۋرنيردە «التىن» ءۇشىن كۇرەسۋگە بەل بايلاپ وتىر. مۇندا ول ءبىر عانا قارسىلاسىنا – قىتايلىق سيان يانمەيگە قارسى ارەكەت جاساپ باعادى. قازىر الەمنىڭ ەكى دۇركىن چەمپيونى دەگەن اتاعى بار حانزۋ قىزى الەمدىك رەيتينگتە دە جوعارى تۇر. بۇعان قوسا, ول حيۋستوندا الدىنا جان سالماي, تارتىستى كۇرەسكە بارىنشا دايىن ەكەنىن بايقاتىپ تا قويدى. امەريكا جەرىندە يانمەي قوسسايىستا 263 كگ جيناسا, جاپپارقۇلدىڭ كورسەتكىشى 256 كگ-دان قايرىلدى. دەمەك, قىتايلىق تۇيعىن 7 ۇپاي العا كەتىپ قالدى. بىراق وندا جازيرانىڭ جاراقات العان قولىمەن جارىسقا قاتىسقانىن دا ۇمىتپاۋىمىز كەرەك. ولاي بولسا, ريو جەرىندە ەكى اتلەتتىڭ اراسىندا ناعىز كەسكەكتى كۇرەس ءوربۋى ءتيىس. مۇندا قازاقستاندىق اتلەتتىڭ جۇلدىزى جوعارى بولىپ شىعۋى دا عاجاپ ەمەس.
تۋرنيردە 69 كيلوعا دەيىنگى سالماقتا سىنعا تۇسەتىندەر اراسىنان سونداي-اق كولۋمبيالىق لەيدي ەسەنيا سوليس اربولەدانى اتاپ وتۋگە بولادى. ول الماتىدا وتكەن الەم چەمپيوناتىندا بەسىنشى ورىن العان بولاتىن. سول سياقتى ەگيپەتتىك سارا سامير ەلساەد موحامەد احمەد ەسىمىن دە ماماندار اتاپ قويادى. ول حيۋستوندا ءتورتىنشى بولعان ەكەن.
ەندى زىلتەمىرشى قىزداردىڭ ستارتتىق سالماقتارى تۋراسىندا ايتار بولساق, بۇلاردىڭ اراسىنداعى تاپسىرىسى ەڭ جوعارى بولىپ تۇرعانى - جازيرا جاپپارقۇل. ول جارىستى بارىنەن دە اۋىر سالماقپەن باستاعالى تۇر. وسىعان وراي ءبىزدىڭ قىزدىڭ مۇمكىندىگى دە جوعارى بولماق.
ويىنداردا ايەلدەردىڭ 69 كگ سالماقتاعى سايىسى 00:30 ساعاتتا باستالادى. ول «قازاقستان» تەلەارناسىنان تىكەلەي ەفيردە كورسەتىلەدى.
دامير قوجامقۇل