«ەگەمەن قازاقستان» گازەتىنىڭ 2016 جىلعى 20 ساۋىردەگى سانىندا جارىق كورگەن «داۋرەن» شارۋا قوجالىعىنىڭ توراعاسى نەسىپكۇل كەزەڭباەۆانىڭ «سۋبسيديادان قاشانعى قاعىلامىن؟» اتتى ماقالاسىنا وراي, «جامبىل وبلىسى اكىمدىگىنىڭ اۋىل شارۋاشىلىعى باسقارماسى» كوممۋنالدىق مەملەكەتتىك مەكەمەسىنەن جاۋاپ حات كەلدى. وندا بىلاي دەپ تۇسىنىكتەمە بەرىلگەن:
«قازاقستان رەسپۋبليكاسى ۇكىمەتىنىڭ 2014 جىلعى 29 مامىرداعى №575 قاۋلىسىمەن بەكىتىلگەن ەرەجەنىڭ تارماقتارىنا سايكەس اۋىل شارۋاشىلىعى تاۋارىن وندىرۋشىلەر اۋداننىڭ جۇمىسشى ورگانى اۋدان اكىمدىگىنىڭ اۋىل شارۋاشىلىعى بولىمىنە ءوتىنىش بەرۋگە ءتيىستى. وتىنىشتە اعىمداعى جىلى ەگىلگەن اۋىل شارۋاشىلىعى داقىلدارىنىڭ بەلگىلەنگەن مەرزىمدە ەگىلگەنى تۋرالى مالىمەت كورسەتىلەدى. ءوتىنىش تۇسكەننەن كەيىن اۋدان اكىمىنىڭ شەشىمىمەن قۇرىلعان ۆەدومستۆوارالىق كوميسسيا (بۇدان ءارى – ۆاك) ەكى اپتا مەرزىمىندە بەلگىلەنگەن ەرەجە تالاپتارىنا سايكەس اۋىل شارۋاشىلىعى تاۋارىن وندىرۋشىلەرى ەككەن ەگىستىك الاڭدارىندا وسكىن بولۋىن تەكسەرىپ, قابىلداپ الۋ اكتىسىمەن قابىلداۋى قاجەت.
2015 جىلدىڭ 11 مامىرىندا «داۋرەن» شارۋا قوجالىعى مەركى اۋدانى اكىمدىگىنىڭ اۋىل شارۋاشىلىعى بولىمىنە «باسىم داقىلدار ءوندىرۋدى سۋبسيديالاۋ ارقىلى وسىمدىك شارۋاشىلىعى ءونىمىنىڭ شىعىمدىلىعى مەن ساپاسىن ارتتىرۋدى, جانار-جاعارماي ماتەريالدارىنىڭ جانە كوكتەمگى ەگىس پەن ەگىن جيناۋ جۇمىستارىن جۇرگىزۋ ءۇشىن قاجەتتى باسقا دا تاۋارلىق-ماتەريالدىق قۇندىلىقتاردىڭ قۇنىن جانە اۋىلشارۋاشىلىق داقىلدارىن قورعالعان توپىراقتا وڭدەپ ءوسىرۋ شىعىندارىن سۋبسيديالاۋ قاعيدالارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2014 جىلعى 29 مامىرداعى №575 قاۋلىسىمەن بەكىتىلگەن ەرەجەسىنە سايكەس 40 گەكتارعا مايلى داقىل (ماقسارى) سەپكەندىگى جونىندە مالىمەت بەرەدى.
بۇدان كەيىن اۋداندىق ۆاك-تىڭ قاتىسۋىمەن مالىمەت سارالانىپ №193 قابىلداۋ اكتىسى جاسالادى جانە اكت نەگىزىندە 2015 جىلدىڭ 14 شىلدەسىندە 40 گەكتار مايلى داقىلدى سۋبسيديالاۋ تۋرالى ءوتىنىم بەرىلەدى. وتىنىشكە سايكەس اۋداندىق ۆاك-تىڭ قابىلداۋ اكتىسىنىڭ شەشىمىمەن 40 گەكتار مايلى داقىلعا 200,0 مىڭ تەڭگە سۋبسيديا تولەنەدى.
ال «داۋرەن» شارۋا قوجالىعىنىڭ ءتورايىمى نەسىپكۇل كەزەڭباەۆانىڭ 2015 جىلى اۋداندىق ۆاك-قا بەرگەن وتىنىشىندە 61 گەكتار قانت قىزىلشاسى تۋرالى مالىمەت كورسەتىلمەگەندىكتەن, سۋبسيديا بەرىلمەگەنىن حابارلايمىز.
نۇرجان نۇرجىگىتوۆ, «جامبىل وبلىسى اكىمدىگىنىڭ اۋىل شارۋاشىلىعى باسقارماسى» كوممۋنالدىق مەملەكەتتىك مەكەمەسى باسشىسى