كەشە ورتالىق كوممۋنيكاتسيالار قىزمەتىندە ءبىلىم جانە عىلىم مينيسترلىگى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى شولپان قيراباەۆانىڭ, مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى زەينەپ ماقسۇتوۆانىڭ جانە ماتەماتيكا ءپانى بويىنشا 57-حالىقارالىق وليمپيادانىڭ جەڭىمپازى, پاۆلودار قالاسىنداعى «جاس دارىن» مامانداندىرىلعان مەكتەبىنىڭ 9-سىنىپ وقۋشىسى مۇحاممەد-ءالي ءامىردىڭ قاتىسۋىمەن ءباسپاسوز ءماسليحاتى بولىپ ءوتتى.
بريفينگ «دارىن» رەسپۋبليكالىق عىلىمي-پراكتيكالىق ورتالىعىنىڭ قىزمەتىنە ارنالدى.
«1996 جىلى ەلباسى نۇرسۇلتان نازارباەۆتىڭ ەلىمىزدە ءبىلىم بەرۋ جۇيەسىن رەفورمالاۋ ماقساتىندا «دارىندى بالالارعا ارنالعان مەكتەپتەردى مەملەكەتتىك قولداۋ جانە دامىتۋ تۋرالى» جارلىققا قول قويعانى بەلگىلى. وسى قۇجاتتىڭ نەگىزىندە 1998 جىلى استانادا «دارىن» رەسپۋبليكالىق عىلىمي-پراكتيكالىق ورتالىعى ءوز جۇمىسىن باستادى. بۇگىنگى تاڭدا ورتالىقتىڭ اۋىز تولتىرىپ ايتارلىق جەتىستىكتەرى بارشىلىق. ىرگە تاسى قالانىپ, ءىسىن ءجۇرگىزە باستاعان كۇننەن بەرى حالىقارالىق وليمپيادالاردا, ءارتۇرلى دەڭگەيدەگى ءبىلىم بايگەلەرىندە الدىڭعى ورىنداردى الىپ ۇلگەردى. وتكەن جىلدىڭ وزىندە قازاقستاندىق وقۋشىلار حالىقارالىق جارىستاردان 1309 مەدالدى ولجالادى. ونىڭ ىشىندە 276 التىن, 384 كۇمىس, 629 قولا بار. «دارىن» ورتالىعىنىڭ 2016-2017 وقۋ جىلىنا ارنالعان جوسپارلارىندا ماتەماتيكا, فيزيكا, ينفورماتيكا پاندەرى بويىنشا حالىقارالىق جاۋتىكوۆ وليمپياداسىن وتكىزۋ كوزدەلگەن. وعان شامامەن 15 مەملەكەتتەن 50-گە جۋىق كوماندا كەلەدى دەپ كۇتىلۋدە», – دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى شولپان قيراباەۆا.
ءبىلىم جانە عىلىم مينيسترلىگىنىڭ مالىمەتى بويىنشا قازىرگى تاڭدا «دارىن» جەلىسىنە 124 مامانداندىرىلعان ءبىلىم بەرۋ ۇيىمى كىرەدى. بۇل مەكەمەلەردە ەڭبەك ەتەتىن 7 741 مۇعالىمنىڭ جارتىسىنان كوبى جوعارى ساناتتاعى ۇستازدار ەكەنىن ايتا كەتكەنىمىز ءجون.
جيىن بارىسىندا ماتەماتيكا بويىنشا گونكونگتە وتكەن 57-حالىقارالىق وليمپيادانىڭ جەڭىمپازى, مۇحامەد-ءالي ءامىر دە ءوزىنىڭ ويىن ورتاعا سالىپ, الەمدىك دودادان العان اسەرىمەن ءبولىستى. قورىتىندى بويىنشا قورجىنىمىزعا 5 مەدال تۇسكەن. ولاردىڭ ىشىندە, 1 التىن, 1 كۇمىس, 3 قولا جانە 1 قۇرمەت گراموتاسى بارىن ماقتانىشپەن ايتساق ارتىق بولماس. جارىسقا 100-دەن استام مەملەكەت وكىلدەرى قاتىسىپ, جالپى ەسەپتە ءبىزدىڭ كوماندا 28-ورىنعا تابان تىرەگەن. بۇنىڭ ءوزى ۇلكەن جەتىستىك. وسىدان-اق, «دارىن» ورتالىعىنىڭ جۇيەلى جۇمىس جۇرگىزىپ جاتقانىن كورۋگە بولادى.
راۋان قايدار, «ەگەمەن قازاقستان»