شۆەيتساريالىق Omega كومپانياسى ريو-دە-جانەيروداعى وليمپيادا ويىندارىنىڭ اشىلۋ سالتاناتىنا وراي, Seamaster Diver 300M «Rio 2016» دەپ اتالاتىن جاڭا ساعاتتى كوپشىلىككە ۇسىندى.
ساعاتتىڭ تسيفەربلاتىندا ريوداعى اتاقتى كوپاكابانا جاعاجايىنىڭ قۇمدارىن ەسكە سالاتىن سۋرەت ءورنەكتەلگەن. وليمپيادانىڭ رەسمي لوگوتيپىندەگى 5 شىعىرشىقپەن بىردەي 5 ءتۇرلى ءتۇس تە كورىنىس تاپقان. ارتقى قاقپاعىندا «ريو-2016» لوگوتيپى بەينەلەنىپ, ىشكى ەلەمەنتتەرىنە قولا, كۇمىس جانە التىن پايدالانىلعان.
– ءبىزدىڭ ساعاتپەن سۋعا قورىقپاي تۇسە بەرۋگە بولادى. 300 مەتر تەرەڭدىككە دەيىن سۋ ءوتكىزبەيتىنىنە كەپىلدىك بەرەمىز, – دەيدى كومپانيا وكىلى. ونىڭ ايتۋىنشا, ساعاتتىڭ سىرتقى بولىكتەرىنىڭ بارلىعى توت باسپايتىن بولاتتان جاسالىپتى.
Omega كومپانياسى «ريو-2016» وليمپياداسىنىڭ رەسمي حرونومەتريسى ەكەنىن ايتا كەتۋ كەرەك. كومپانيا بۇعان دەيىن ءبىرنەشە جازعى جانە قىسقى وليمپيادا ويىندارىندا وسىنداي جاۋاپتى مىندەت اتقارعان.
نۇرتورە سامارحان