سۋ – تىرشىلىك كوزى. ەلىمىزدىڭ كەيبىر وڭىرلەرىندە سۋ رەسۋرستارىنىڭ تاپشىلىعى ەكونوميكانىڭ كەن يگەرۋ سالالارىن, سونىمەن قاتار, جەكە قالالاردى جانە ونەركاسىپتىك كەشەندەردى دامىتۋ ءۇشىن تابيعي الەۋەتتى تولىق ىسكە اسىرۋعا مۇمكىندىك بەرمەيدى. 2020 جىلعا دەيىنگى قازاقستان رەسپۋبليكاسىنىڭ سۋ سەكتورى مەن سۋ شارۋاشىلىعى ساياساتىن دامىتۋ تۇجىرىمداماسىندا سۋ رەسۋرستارىنىڭ تاپشىلىعى, جەربەتى جانە جەراستى سۋلارىنىڭ لاستانۋى, سۋ شىعىندارىنىڭ نورمادان تىس كوپ مولشەردە بولۋى, حالىقتى ساپالى اۋىز سۋمەن قامتاماسىز ەتۋ ماسەلەسىنىڭ شيەلەنىسۋى, مەملەكەتارالىق سۋ ءبولىسۋ ماسەلەلەرى اشىق ايتىلعان.
قازىرگى كەزدە اۋىل شارۋاشىلىعىن سۋمەن قامتۋ ءبىرشاما قىسقاردى, ياعني جۇيەلى سۋارىلاتىن القاپ كولەمى ەكى ەسە ازايدى. سۋ شارۋاشىلىعىنىڭ تۇراقتى دامۋىنا سۋ رەسۋرستارىن ينتەگرالدى پايدالانۋ, سۋارۋ جۇيەلەرىن كەشەندى قايتا قۇرۋ جانە سۋدى ۇنەمدەۋ تەحنولوگيالارى مەن سۋارۋدىڭ زاماناۋي تەحنيكاسىن ەندىرۋ جولىمەن قول جەتكىزۋگە بولادى. وسى ماسەلەلەردى ءتيىمدى شەشۋدىڭ جولى سۋ شارۋاشىلىعىن عىلىمي قامتاماسىز ەتۋ بولسا كەرەك. بۇل الەۋمەتتىك-ەكونوميكالىق تۇراقتىلىقتى جانە ەلىمىزدىڭ دامۋ باعىتىن ەلەۋلى دارەجەدە قامتاماسىز ەتۋگە مۇمكىندىك بەرەدى.
مىنە, تاراز قالاسىندا وتكەن «سۋ شارۋاشىلىعىن عىلىمي قامتاماسىز ەتۋ – تۇراقتى دامۋ فاكتورى» اتتى II حالىقارالىق عىلىمي-پراكتيكالىق كونفەرەنتسياسى سۋ شارۋاشىلىعىن تۇراقتى دامىتۋ مەن سۋ رەسۋرستارىن ءتيىمدى پايدالانۋ ماسەلەلەرىنە ارنالدى. جيىنعا رەسەي, ورتالىق ازيا جانە كاۆكاز مەملەكەتتەرىنىڭ سۋ شارۋاشىلىعى سالاسىنىڭ جەتەكشى عالىمدارى مەن ماماندارى قاتىسىپ, سۋارۋدىڭ يننوۆاتسيالىق تەحنولوگيالارىن پايدالانۋ, سۋ شارۋاشىلىعىنىڭ ەكونوميكاسى جانە ەكولوگياسى, اۋىل شارۋاشىلىعىن سۋمەن قامتۋ جانە جايىلىمداردى سۋلاندىرۋ بويىنشا ويلارىن ايتىپ, پىكىرلەرىمەن ءبولىستى.
ترانسشەكارالىق سۋ رەسۋرستارىن دامىتۋداعى جانە باسقارۋداعى ىنتىماقتاستىق كورشىلەس مەملەكەتتەردىڭ جالپى الەۋمەتتىك جانە ەكونوميكالىق تۇراقتى ءوسۋىنىڭ, قوعامدىق دەنساۋلىقتى ساقتاۋدىڭ, ازىق-ت ۇلىك جانە ەنەرگەتيكالىق قاۋىپسىزدىكتىڭ, قورشاعان ورتانى قورعاۋدىڭ, اپاتتاردىڭ الدىن الۋدىڭ, قالانىڭ جانە اۋىلدىڭ تۇراقتى دامۋىنىڭ, كليماتتىڭ وزگەرۋىنە بەيىمدەلۋىنىڭ نەگىزى بولىپ تابىلادى. سوندىقتان حالىقارالىق قۇقىق نورمالارىنا سايكەس, ترانسشەكارالىق جانە سەكتورارالىق ماندە سۋ رەسۋرستارىن بىرلەسىپ دامىتۋدى جانە باسقارۋدى كۇشەيتۋ قاجەت, دەيدى سۋ شارۋاشىلىعىنىڭ ماماندارى.
ءيا, شىنىندا سۋ رەسۋرستارى تاپشىلىعىنىڭ كۇشەيۋىنە جانە ەكولوگيالىق تۇتاستىقتى ساقتاپ قالۋ قاجەتتىگىنە بايلانىستى مەليوراتسيا مەن سۋ شارۋاشىلىعىن دامىتۋدا مەملەكەتتىك باسقارۋ جۇيەسىن جەتىلدىرۋ كەرەك. سونداي-اق, اۋىلشارۋاشىلىق داقىلدارىن ءارتاراپتاندىرۋ بارىسىندا جەربەتى جانە جەراستى سۋلارىن پايدالانۋ نەگىزىندە سۋدى ۇنەمدەۋ تەحنولوگيالارىنىڭ كەڭىنەن ەندىرىلۋى, شالعايداعى مال شارۋاشىلىعىن دامىتۋ ءۇشىن اۋىز سۋ, شايىندى سۋلاردى تازارتۋ, اۋىل شارۋاشىلىعىن سۋمەن قامتاماسىز ەتۋ جانە جايىلىمداردى سۋلاندىرۋ بويىنشا ناقتى شارالاردى قولعا الۋ ءۇشىن «مەليوراتسيا تۋرالى» جانە «گيدروتەحنيكالىق قۇرىلىمداردىڭ قاۋىپسىزدىگى تۋرالى» زاڭداردىڭ قابىلدانۋى قاجەت.
ورالحان ءداۋىت,
«ەگەمەن قازاقستان»
جامبىل وبلىسى