ءداستۇرلى تۇردە اتاپ ءوتىپ ءجۇرگەندىكتەن «ۋنيۆەرسيتەت ءبىتىرگەندەردىڭ جيىرما جىلدىعى, وتىز جىلدىعى» دەگەن قۇلاققا ءسىڭىستى بولىپ كەتكەن ءسوز بۇگىندە تاڭسىق بولماي, «كىمدەردىڭ كۋرسى ەكەن؟» دەپ قايىرا سۇراعاندا, ءبىردى-ەكىلى مىقتىسىنىڭ اتى اتالسا, سول كۋرستىڭ سالماعى سەزىلە قالاتىنداي بولۋشى ەدى. «ەسكى كازگۋ-دە جازۋشى دۋلات يسابەكوۆ ۋنيۆەرسيتەت بىتىرگەندەرىنىڭ ەلۋ جىلدىعىن جاساعالى جاتىر ەكەن» دەگەن حاباردى ەستىگەندە, ەلەڭدەپ قالعانىمىز راس. ءويتكەنى, بالەن جىلدى تويلايتىن بەلسەندىلەر ازىرگە ەلۋدى اتاپ وتۋگە كەلگەندە ەنجار تارتاتىنىن بىلەمىز. بالالىق شاعى قىرقىنشى جىلدارعا, ازاماتتىق قالىپتاسۋى الپىسىنشى جىلدارعا تۋرا كەلگەن جاس جىگىتتەر مەن قىزدار قازاق جەرىنىڭ الىس اۋىلدارىنان العاش قالاعا قاراي قادام باسقان كەزىندە جۇرەگىنە جالعىز-اق ارماندى قوندىرىپ كەلدى. ول – ءبىلىم الۋ. «قازىرگىدەي ءىلىمى جوق, ءبىلىمى از, اتى بار, زاتى جوق ۋنيۆەرسيتەتتەردىڭ» قاپتاپ تۇرعان كەزى ەمەس, قازاقتىڭ ماڭدايىنا باسقان جالعىز ۋنيۆەرسيتەتى – س.م.كيروۆ اتىنداعى كازگۋ-گە ءتۇسىپ, باعى جانعان سول بالالار بۇگىن, مىنە, جەتپىستىڭ مول ىشىندە ءجۇرىپ, جۇزدەسۋ ۇيىمداستىرىپ جاتىر. ءبارىنىڭ باسىن قوسىپ ۇيىمداستىرۋشى ءبىر-اق ادام, ول – دۋلات يسابەكوۆ. باسى ءازىلمەن باستالىپ, سوڭى شىندىققا ۇلاسقان كەزدەسۋدىڭ ستسەناريىن ءوزى جازىپ, رەجيسسۋراسىن م.اۋەزوۆ اتىنداعى دراما تەاتردىڭ رەجيسسەرى اۋباكىر راحيموۆكە تاپسىرىپ, ءار كۋرستاسىمەن حابارلاسىپ, اۋديتوريا دايىنداپ, ءوز اتىنان داستارقان جايعان دۋلات اعانىڭ ەڭبەگى راسىمەن دە ايرىقشا اتاپ وتۋگە تۇرارلىق.
ستۋدەنتتەرى تۇتاس دەمالىسقا كەتكەن جىم-جىرت عيماراتقا كىرگەن ەلۋ جىل بۇرىنعى تۇلەكتەر شۇرقىراسا تابىسىپ, امان-ساۋلىق سۇراسىپ, سان جىلدار ءبىرىن-ءبىرى كورمەگەن قۇرداستار كورىسىپ, كوزدەرىنە جاس الىسىپ جاتىر. سودان كەيىن قولتىقتاسا قاۋقىلداسىپ بۇرىن وزدەرى ساباق ءوتىپ جۇرگەن اۋديتوريادا باس قوسۋعا بەتتەدى. تاپ ستۋدەنت كەزدەرىندەگىدەي ءبارى پارتالارعا جايعاسا باستادى.
ۋىلداپ-شۋىلداپ وتىرعان كەزدە اۋديتورياعا ەڭ العاشقى مۇعالىمدەرى, بۇگىنگى اكادەميك مىرزاتاي جولداسبەكوۆ كەلىپ كىردى. قولىندا جۋرنالى بار. وتىرعاندار دۇركىرەي كوتەرىلىپ, ىزەت ءبىلدىردى. ءسوز مارجانىن نوسەرلەتكەندە تىڭداۋشىسىن سىلتىدەي تىندىرىپ, كەرەمەت اسەردە قالدىراتىن مىرزاتاي اعامىز ءدارىسىن باستادى: – ال بالالار, مەنىڭ ءوزىم دە وسى ۋنيۆەرسيتەتتى بىلتىر عانا ءبىتىردىم. مۇندا م.اۋەزوۆ باستاعان, بالادان دانا جاساۋدى مۇرات تۇتقان ناعىز ۇستازدار, قازاقتىڭ باعىنا بىتكەن عۇلامالار ساباق بەرەدى. سول كىسىلەردىڭ ساباعىن مۇقيات تىڭداپ, سانالارىڭا ءسىڭىرىپ, ەرتەڭ ۇلكەن ازامات بولىپ ءوسىپ شىعۋلارىڭا مەن شىن جۇرەگىممەن تىلەكتەسپىن. سەندەرگە ءسات ساپار تىلەيمىن, ءبىر-ءبىرلەرىڭدى قادىرلەپ جۇرىڭدەر. ءبىرىڭ ويدان, ءبىرىڭ قىردان, قازاقستاننىڭ تۇكپىر-تۇكپىرىنەن كەلدىڭدەر. ءىلىم ىزدەپ, عىلىم ءىزدەپ كەلدىڭدەر, ەلىمە, حالقىما ايانباي قىزمەت ەتەمىن دەپ كەلدىڭدەر. «ستۋدەنتتىك شاق ۇزاق, الدىمىزدا ءالى بەس جىل بار» دەپ, ۇزىن ارقان, كەڭ تۇساۋعا سالماڭدار. جينايتىن, الاتىن بىلىمدەرىڭدى الىپ قالىڭدار, ويتكەنى, ەرتەڭ الدى-ارتىڭا قاراۋعا مۇرشالارىڭ بولمايدى.
ستۋدەنت اتانعان سوڭ ۋنيۆەرسيتەت تارتىبىنە باعىنۋلارىڭا تۋرا كەلەدى. قازىر مەن سەندەردىڭ اتى-جوندەرىڭدى اتاپ, تۇگەندەيمىن, ادەپپەن ورىندارىڭنان تۇرىپ, وزدەرىڭدى تانىستىرىپ قويىڭدار, – دەدى دە, «اتشاباروۆ بازاربەك» دەپ ءتىزىم باسىنداعى العاشقى ستۋدەنتتەن باستاپ اتاي باستادى. ءار «ستۋدەنت» ءوز فاميلياسىن وقىعاندا «مەن» دەپ جاۋاپ بەرىپ جاتىر. قايتىس بولعانداردىڭ فاميلياسى وقىلعاندا «ستاروستا» ورنىنداعى دۋلات يسابەكوۆ «ول ماڭگىلىككە اتتانىپ كەتتى» دەپ جاۋاپ بەرىپ وتىردى. 38 ستۋدەنتتىڭ ون شاقتىسى كەلە الماعان, اۋديتوريادا وتىرعانى – ۇشتەن ءبىر بولىگى, ال 15-16-سى قايتىس بولعان. «ارامىزدا جوق ستۋدەنتتەردى ورنىمىزدان تۇرىپ, ءبىر مينۋت ەسكە الايىق», – دەدى ۇستاز.
اۋديتوريادا بەكسۇلتان نۇرجەكە ۇلى, قادىربەك سەگىزباەۆ, قۋانىشباي قۇرمانعاليەۆ سەكىلدى ەلگە بەلگىلى قالامگەرلەر دە وتىر. بىراق, بۇل كۋرستان ەمەس, ءبىرى ءبىر كۋرس جوعارى, ءبىرى تومەن وقيتىن ستۋدەنتتەر. «ءبىز ساباقتان بوس بولعان سوڭ, ءدارىسىڭىزدى تىڭدايىق دەپ كەلدىك» دەيدى ولار. بۇرىنىراقتا وزدەرى قۇرمەت تۇتقان ۇستازداردىڭ دارىسىنە قاتىسىپ, «ءدارىستى كەرەمەت وقيدى ەكەن» دەسە, ءوز ساباعىنان سۇرانىپ كەلىپ تىڭدايتىن داعدى بار دەپ ەستيتىنبىز, سوندىقتان, بۇل ەسكى ادەتتىڭ ەش ايىبى بايقالمادى.
م.جولداسبەكوۆ: – بۇگىن بىزدە ەمتيحان عوي. «ءومىر ەمتيحانى!» قالاي, بالالار, بۇل كىسىلەردىڭ ساباققا قاتىسىپ وتىرۋىنا رۇقسات بەرەمىز بە؟
دۋلات يسابەكوۆ: – رۇقسات بەرەيىك. بىراق, شۋىلداماي تىنىش وتىرسىن. ەمتيحان تاپسىرعاندا كوپ سويلەمەي, قىسقا جاۋاپ بەرەتىن بولسىن!
م.جولداسبەكوۆ: – وندا بوس ورىنعا بارىپ جايعاسا بەرىڭدەر. بيلەتتەرىڭدى الا كەتىڭدەر.
كەڭەس وداعى كەزىندەگى جۇرەگى اتشا تۋلاپ, اياق-قولى قالتىراپ, جەتى اتا-باباسىنا دۇعا جاساپ بارىپ الاتىن تىلدەي بيلەتتەر ادەتتەگىدەي ادەبيەتتەن دە, ءتىلدەن دە, تاريحتان دا ەمەس, ءومىردىڭ ءوزىنەن الىنعان ساۋالدار ەكەن. «ءومىر ەمتيحانى»... اۋەلدە جاس ادام ومىرگە تاۋەلدى بولعىسى كەلمەي ءبىراز جۇلقىنىپ كورەدى. بىراق, ءبارىبىر باسىنا نوقتا كيىلەدى. تىرشىلىك ديىرمەنىنە تۇسكەن ادامداردىڭ تالقانعا اينالماي ءتىرى بولىپ, ءىرى بولىپ قالۋى ۇلكەن ەرلىككە پارا-پار دۇنيە. جىگىتتىڭ جىگىتشىلىگىن سىنعا سالار كۇن تۋعاندا تالايدىڭ تاقياسىن تەرىس كيگىزىپ, تابانىنا سالۋعا تىرىسقان ءومىردىڭ ساباعىنان كىم قانداي ءتالىم الىپ شىعادى؟ سول سىناقتارعا مويىماعان, سىنىنان سۇرىنبەي ءوتىپ, بۇگىنگى كەزدەسۋگە كەلىپ وتىرعان مىناۋ اقسامايلى جاندار قاتال ساۋالداردىڭ قاي-قايسىنا دا ءمۇدىرمەي جاۋاپ بەرەتىنى انىق ەدى. ويتكەنى, ءبارى دە ءومىردىڭ قايراعىنا ءتۇسىپ شىڭدالعان. ءبىرى – اگرونوم, ءبىرى – دارىگەر دەيتىن ەمەس, ءومىر بويى جازۋ-سىزۋ, ءتىل مەن ادەبيەتتىڭ ماڭايىندا كەلە جاتقان ءسوز ساردارلارى سۇراقتارىنا قامشى سالدىرماي جاۋاپ بەرەدى. «6-بيلەت. قازىرگى ءبىلىم مينيسترلىگىنىڭ ءۇش تىلدىلىك ساياساتىنا كوزقاراسىڭ قالاي؟ ونىڭ پايداسى مەن زيانىن قالاي ساراپتايسىڭ؟», «8-بيلەت. قازىرگى مەكتەپ وقۋلىقتارىنىڭ ساپاسى جايلى ءباسپاسوز بەتتەرىندە, ءتىپتى, پارلامەنتتە ءجيى ءسوز بولادى. ادەبيەت پەن تاريح ءپانىن وقىتۋدا قانداي كەمشىلىكتەر بار؟ ول تۋرالى ءوز ۇسىنىسىڭ قانداي؟», «11-بيلەت. قازاق جەرىن شەتەلدىكتەرگە ۇزاق مەرزىمگە جالعا بەرۋ مەن ساتۋ ساياساتىنا قالاي قارايسىڭ؟ ەل ىشىندە جۇرگەندە ول جايلى كوپشىلىكتىڭ پىكىرى قانداي بولدى؟», «18-بيلەت. قازىرگى الىپ وتىرعان زەينەتاقى مولشەرىڭ قانشا؟ سەن سوعان قاناعاتتاناسىڭ با؟ الدە, ول جونىندە جاڭا ۇسىنىسىڭ بار ما؟», «19-بيلەت. ەلىمىزدە بىرەۋ تىم باي, بىرەۋ تىم كەدەي. الەۋمەتتىك تەڭسىزدىكتىڭ تۇپكى سەبەبى نەدە دەپ ويلايسىڭ؟» دەگەن سياقتى 22 بيلەتكە جيناقتالعان ءومىر ساۋالدارىنا توسىلماستان تابان استىندا جاۋاپ بەرۋگە ءازىر ەكەنىن ارقايسىسى بايقاتىپ جاتىر. بيلەتتە قامتىلعان جەر ماسەلەسى دە, ءتىل ماسەلەسى دە, ءدىن ماسەلەسى, بارلىعى دا – تاعدىرلى ماسەلەلەر. وسىندايدا اقسەلەۋ سەيدىمبەكوۆ مىرزاتاي اعامىزدى قارا تۇتىپ كەلىپ: «مىرزەكە-اۋ, قۇدايعا داۋىسىم جەتپەيدى, بيلىككە ءسوزىم وتپەيدى, بىردەڭە دەسەڭىزشى» دەپ, بيلىككە ءبىر تابان جاقىن جۇرگەن جولداسى تىلەگىن ءتيىستى ادامدارعا جەتكىزسە دەگەن ويمەن ىشىنە جينالعان ويىن اقتارىپ كەتەتىن كورىنەدى.
ءومىر بويى قازاق راديوسىندا قىزمەت ىستەپ, ميلليونداردى تىرپ ەتكىزبەي تىڭداتىپ, «التىن داۋىستىڭ يەسى» اتانعان ساۋىق جاقانوۆا «ەگەر ءدال قازىر مەكتەپ بىتىرگەن بولساڭ قانداي ماماندىق تاڭدار ەدىڭ؟» دەگەن ساۋالعا ساندۋعاش ۇنىمەن جاۋاپ بەرىپ تۇر. «ادام بالاسى جاراتىلعان سوڭ ەرتە باستان تەك ءوزى عانا اتقارۋى ءتيىس مىندەتىنە بەيىمدەلەدى عوي دەيمىن. مەكتەپتە جۇرگەندە-اق ادەبيەتتى, ونەردى ءسۇيدىم. العاش قاراعاندىدا, كەيىن الماتىداعى №12 مەكتەپتە وقي ءجۇرىپ, مىقتى ادەبيەتشى مۇعالىمدەردىڭ ءتالىمىن الدىم. جالعىز قازاق مەكتەبى بولعاندىقتان, الماتىداعى مەكتەبىم بەلگىلى قالامگەرلەردى, ونەر ادامدارىن, زيالى قاۋىم وكىلدەرىن ءجيى كەزدەسۋگە شاقىراتىن. وسى كەزدەسۋلەردىڭ اسەرى مەنى ونەرگە جاقىنداتا ءتۇستى. ۋنيۆەرسيتەت بىتىرگەن سوڭ قازاق راديوسىنا كونكۋرس جاريالانىپ, ديكتورلىققا قابىلداندىم. ەگەر ماعان تاعى دا تاڭداۋ مۇمكىندىگى بەرىلسە, مەن ويلانباستان تاعى دا وسى ماماندىقتى قالار ەدىم. وزىممەن بىرگە وقىعان ازاماتتاردىڭ بارلىعىمەن ماقتانامىن».
«بەكسۇلتاندى ءوزىنىڭ سۇيىكتى ماسەلەسىنىڭ اداسپاي تاپقانىن قاراشى» دەپ جاتىر بيلەتتەگى «قازاق حالقىنىڭ سانىن ءوسىرۋ ءۇشىن نە ىستەۋ كەرەك دەپ ويلايسىڭ؟ وعان ءوزىڭ قانداي ۇلەس قوستىڭ؟» دەگەن ساۋالدىڭ بەكسۇلتان نۇرجەكە ۇلىنىڭ قولىنا ءتۇسكەنىنە باس شايقاسا ك ۇلىسىپ. «قۇدايعا شۇكىر, اتا-بابالارىمىز اماناتتاپ كەتكەن جەردە ءومىر ءسۇرىپ جاتىرمىز. ۇشى-قيىرى جوق جەردىڭ تەڭ جارتىسىنان ايىرىلىپ قالعانىمىزدىڭ وزىندە دالامىز ءالى بايتاق. بىراق كەلەشەكتە بۇل جەرگە كىم يە بولىپ قالادى؟ ارينە, قازاق يە. ال قازاق يە بولۋى ءۇشىن ۇرپاق كەرەك. ۇرپاق يە بولۋى ءۇشىن سانا كەرەك. ادام بالاسى ءوز-وزىنەن كوبەيمەيدى. وعان ارنايى باعدارلاما, مەملەكەتتىڭ قامقورلىعى كەرەك. «كوپ ايەل الۋ كەرەك», «توقال الۋ كەرەك» دەپ جەلپىنىپ شىعاتىندار بار, ولار دا, ءبىر ايەلىن اسىراي الماي جۇرگەندەر دە بۇل ماسەلەنى شەشە المايدى. مەنىڭشە, وزگە حالىقتا جوق, قازاقتىڭ وزگەشە قاسيەتى بار, ول – بالاجاندىلىق. قازاق دۇنيە-ءمۇلكىن بالا ءۇشىن جيناپ, ءوزىن دە, ءومىرىن دە تەك بالاعا ارنايدى. بالاعا دەگەن مەيىرىمدى ونىڭ بويىنا تۋا سالىپ ەگۋ كەرەك. قىز بالاعا «سەن بولاشاق اناسىڭ. سەن دۇرىس كيىنىپ ءجۇر, تابانىڭنان سۋىق وتكىزبە, كەيىن بالا كوتەرە الماي قالاسىڭ, كوكەم» دەپ ۇيرەتۋ كەرەك. مۇنىڭ ەش سوكەتتىگى جوق. ويتكەنى, بۇل مەملەكەتتىك ءىس, مەملەكەتتىڭ بولاشاعىنىڭ ءىسى. ۇل بالانىڭ دا قۇلاعىنا قۇيا بەرۋ كەرەك. قازىر ەۋروپا بوسقىنداردى قابىلداپ جاتىر. مۇنىڭ دا ارعى جاعىندا ساياسات جاتىر دەپ ويلايمىن. باتىستا تۋ كورسەتكىشى ازايدى. بوسقىندار ارقىلى كەلەشەكتەگى ۇلتتىق ماسەلەسىن شەشۋدى كوزدەپ وتىر ما دەيمىن. بۇل شەشىلەتىن ماسەلە مە, شەشىلمەيتىن تۇيتكىل مە, ونى بولاشاق كورسەتەدى. قازاقستاندا ءبىر جىلدا 500 مىڭعا دەيىن جاساندى تۇسىك جاسالادى ەكەن. ەندەشە, ەكى جىلدا ءبىر ميلليون ادامىمىزدى جوعالتىپ وتىرمىز دەگەن ءسوز. نە ىستەۋ كەرەك؟ قازاقتىڭ ءوزىنىڭ زاڭى بار. 14, 16 جاسىندا اياعى اۋىر بولىپ قالعان بالالاردى زاڭمەن قورقىتقاندى قويىپ, نەكەلەسۋگە جاعداي جاساپ, ۇيلەندىرۋدى ويلاۋىمىز كەرەك. ابايسىزدا وت باسقان بالالاردى جازالاۋدى توقتاتۋ كەرەك. بۇل مەملەكەتكە كەلگەن ۇلەس, مەملەكەتتىڭ ماڭدايىنا بىتكەن ۇرپاق. ءبىز تەك سوندا عانا كوبەيەمىز».
«جەلتوقسان وقيعاسى تاۋەلسىزدىگىمىزدىڭ باستاۋى عوي. ار, نامىسىمىزدى وياتتىق, جىگەرىمىزدى جانىدى. قاندى وقيعانىڭ ورتاسىندا ءبىز دە بولدىق. سوندا ءبىز قىرىقتىڭ ىشىندەگى قىلشىلداعان جىگىت ەدىك. قازاق راديوسىندا جۇمىس ىستەيمىز. كەڭەستىك يمپەريانىڭ كۇيرەۋى دە, وداقتاس رەسپۋبليكالاردىڭ تاۋەلسىزدىك الۋى دا بىزدەن باستالدى. بۇل باعا بەرەتىن وقيعا ەمەس, نامىسىمىزدى وياتقان ۇلى وقيعا» دەيدى جەلتوقسان تۋرالى سۇراعىنىڭ ءتۇيىنىن تارقاتقان «قازاق راديوسىنا» «بالا بولىپ كىرىپ, شال بولعاندا ءبىر-اق شىققان» قارت جۋرناليست تورەحان تاسبولاتوۆ.
«ءومىر ەمتيحانىندا» بەرىلگەن جاۋاپتىڭ ءبارى الپىس التىنشى جىلى بىتىرگەن تۇلەكتەردىڭ وسكەنىن, ورەسىن كورسەتتى. قوبالجۋدان گورى قايراتى باسىم, كوزقاراسى كەلىستى, ويى باتىل. جەتپىستەن اسقان ادامنىڭ ءومىر تۋرالى سۇراققا جاۋابى تولىمدى ءھام تۇشىمدى. ريزا بولعان ۇستازدارى دا شاكىرتتەرىنە بەستەن تومەن باعا قويعان جوق.
كەزدەسۋ سوڭىندا قاشان دا كومەيى اشىلىپ, كوسىلىپ سويلەيتىن دۋلات اعامىز: – ءبىز مۇنى نەگە ۇيىمداستىردىق؟ بۇل نەگە ويىما كەلدى؟ ءومىر دەگەن مىناۋ, بۇگىن – بار, ەرتەڭ جوق. بىزدەن كەيىنگىلەردىڭ تالايى كەتىپ قالدى. فيلولوگيا فاكۋلتەتىن بىتىرگەن ءبىز, كۋرستاستار, قايسىمىز بارمىز, كىم ءتىرى, كىم كەلمەستىڭ كەمەسىنە ءمىنىپ كەتتى. باردىڭ باسىن قوسىپ كورەيىكشى, بۇدان كەيىن ءبىز, مۇمكىن, كەزدەسپەيتىن دە شىعارمىز. جەر باسىپ جۇرگەنىمىز جينالايىق, قاۋىشايىق, تابىسايىق. ولگەندەرگە قۇران وقيىق, تىرىلەرگە سالاۋات ايتايىق. تيميريازەۆ كوشەسىنىڭ بويىنداعى بۇگىنگى قازۇۋ-دە وتكىزسەك پە دەپ ويلادىق. بىراق, ماعان وسى ەسكى عيمارات ىستىق. ءوزىم وسىندا دراماتۋرگيادان ساباق بەرەمىن. ءالى كۇنگە دەيىن ءدالىزدىڭ اناۋ بۇرىشىنان كۋرستاستارىم شۋ ەتىپ شىعا كەلەتىن سياقتى بولىپ تۇراتىنى بار. وسى جەرگە كەلگەن سايىن جاستىق شاعىم, وتكەنىم ەسىمە تۇسەدى. بىردە تاپ وسى اۋديتوريادا عابيدەن مۇستافين اعامىزبەن كەزدەسۋ بولعاندا: «مەن الپىستان استىم, بۇرىنعىداي سامساپ جەمىس سالماسام دا, اندا-ساندا ونشاقتى الما سالارمىن. وعان قاناعات تۇتىڭدار. بۇرىنعىداي بۇرقىراعان جەمىستى كۇتپەڭدەر» دەگەنى بار-تىن. ءبارىمىز دە قازىر عابيدەن اقساقال سياقتىمىز. شامامىزدىڭ كەلگەنىنشە بويىمىزداعى بارىمىزدى, ءنارىمىزدى بەردىك, ەندى بەرەتىنىمىز شاعىندالعان شاقتامىز.
ساعىمباي دەگەن كۋرستاسىمىز بولدى. اشتان ءولدىم دەسەڭ دە, تاماق اپەرمەيتىن. ءبىر بولمەدە سەگىز بالا جاتامىز. «ساعان كەشە اۋىلدان اقشا كەلدى عوي. بىزگە ءبىر پولبورشش اپەرشى» دەيمىز. سوندا ساعىمباي: «جۇرسەڭدەر, ءجۇرىڭدەرشى. اپەرسەم, اپەرەيىن» دەدى عوي. اڭ-تاڭ بولساق تا, سابالاپ تۇرعان جاڭبىرعا قاراماي, شۇبىرىپ سوڭىنان ەردىك. اسحاناعا باردىق. ساتۋشى چەك ۇردى. سويتسەك, نە نان جوق, نە شاي جوق, تەك جارتى بورششتان الىپ, جارىلقاپ تاستاعانداي بىزگە شىكىرەيىپ شەكەسىنەن قاراپ تۇر. «ەي, مىناۋىڭ نە؟» دەيمىز جەپ قويارداي. «ەندى وزدەرىڭ ايتتىڭدار عوي پولبورشش اپەر دەپ» دەيدى. نە ايتساڭ دا تىكە تۇسىنەتىن ساعىمباي وسى مىنەزىنەن تانباي كەتتى. ءبىزدىڭ ارامىزدا «تسيركۋل» دەگەندى سيىركۇل دەگەن دە ستۋدەنتتەر بولدى. ۇزىلىستەن كەيىن ساباققا ەكى ۇرتى تومپاڭداپ, كەشىگىپ كىرەتىن جولداسىمىز «ستولوۆىيدى» «ستالاباي» دەپ كەتتى». «ستۋدەنتتىك فولكلوردى» مولدىرەتىپ تۇرىپ اڭگىمەلەگەندە, دۋلات اعانىڭ ءار ءساتتى ۇمىتپاي, جادىندا مىقتاپ ۇستاپ جۇرەتىن قاسيەتى قايران قالدىرادى. قالامگەردىڭ تاۋىپ ايتاتىن مايدا, ءزىلسىز كۇلدىرىپ, كوڭىل كوتەرەتىن ءازىلى, كەيدە جاقتىرماعانىن ۋىتتى يرونياسىمەن تۇيرەپ وتەتىن مىنەزى كەزدەسۋ اجارىن اشا ءتۇستى. كەزدەسۋدىڭ كەلەسى بولىمىندە قايتىس بولعان دوستاردىڭ ارۋاعىنا قۇران باعىشتالدى. بۇدان كەيىنگى اڭگىمە شاي ۇستىندە جالعاسىپ, ەستەلىكتەر ايتىلدى. ستۋدەنت كەزدەگى سۇيىكتى انشىلەرى نۇرعالي ءنۇسىپجانوۆ ءان شىرقاپ, كەزدەسۋ ءساتى ە.حاسانعاليەۆتىڭ «ارمانداستار, قۇرداستار» انىمەن اياقتالدى.
جارتى عاسىر ۋاقىتتى ورتاعا سالىپ كەزدەسكەن كۋرستاستاردىڭ عيبراتتى جۇزدەسۋى وزدەرىنىڭ ءىزىن باسقان كەيىنگىگە عاجاپ ۇلگى.
ايگۇل احانبايقىزى,
«ەگەمەن قازاقستان»
الماتى
سۋرەتتەر جازۋشى دۋلات يسابەكوۆتىڭ ارحيۆىنەن الىندى