9 اقپان كۇنى قازاقستان پارلامەنتى سەناتىنىڭ توراعاسى قاسىم-جومارت توقاەۆ كانتوندار كەڭەسى حالىقارالىق قاتىناستار كوميتەتىنىڭ توراعاسى ويگەن داۆيد باستاعان شۆەيتساريا كونفەدەراتسياسىنىڭ پارلامەنتتىك دەلەگاتسياسىن قابىلدادى, دەپ حابارلادى اتالعان پالاتانىڭ ءباسپاسوز قىزمەتى.
ولار برەتتون-ۆۋد ينستيتۋتتارى – حالىقارالىق ۆاليۋتا قورى مەن دۇنيەجۇزىلىك بانكتەگى شۆەيتساريا توبىنا قازاقستاننىڭ قوسىلۋى تۇرعىسىندا ەكىجاقتى ىنتىماقتاستىق ماسەلەلەرىن تالقىلاۋ ءۇشىن قازاقستانعا جۇمىس بابىنداعى ساپارمەن كەلگەن بولاتىن.
كەزدەسۋ بارىسىندا تاراپتار ەكىجاقتى قاتىناستاردىڭ دامۋ دەڭگەيىن جوعارى باعالادى. «شۆەيتساريا قازاقستاننىڭ ەۋروپاداعى ماڭىزدى ءارى ەكونوميكالىق ءارىپتەسى بولىپ تابىلادى», – دەدى ق.توقاەۆ جانە ول ايماقتىق جانە حالىقارالىق كوپتەگەن ءماسەلەلەردىڭ شەشىلۋىندە ەكى ەل كوزقاراستارىنىڭ ۇقساستىعىن اتاپ ءوتتى.
توراعانىڭ پىكىرىنشە, قازاقستاندىق جانە شۆەيتساريالىق پارلامەنتشىلەر اراسىنداعى بايلانىستاردى بەلسەندىلەندىرۋ ءۇشىن پارلامەنتارالىق ءوزارا ءىس-قيمىل سالاسىندا جاقسى نەگىز جاسالعان. 2008 جىلعى قىركۇيەكتە شۆەيتساريا ۇلتتىق كەڭەسىنىڭ توراعاسى اندرە بۋنوننىڭ قازاقستانعا رەسمي ساپارى بولدى. ەكى ەل پارلامەنتشىلەرىنىڭ شتاب-پاتەرى جەنەۆادا ورنالاسقان پارلامەنتارالىق وداق, سونداي-اق ەقىۇ پارلامەنتتىك اسسامبلەياسى اياسىندا ءوزارا جۇيەلى ءىس-قيمىلى قالىپتاستى.
پارلامەنتشىلەر اتاپ وتكەندەي, ەكى ەلدىڭ زاڭ شىعارۋ ورگاندارىندا دوستىق توبىن قۇرۋ سىندارلى ۇنقاتىسۋدى دامىتۋ مەن زاڭ شىعارۋ ىسىندە تاجىريبە الماسۋعا, سونداي-اق وكىلەتتى بيلىك ينستيتۋتىن نىعايتۋعا ىقپال ەتەدى. و.داۆيد ورتالىق ازيا ايماعىنداعى ەكونوميكالىق جانە ساياسي دامۋداعى قازاقستاننىڭ ماڭىزدى ءرولىن اتاپ ءوتتى.
سول كۇنى شۆەيتساريا دەلەگاتسياسى سەناتتىڭ قارجى جانە بيۋدجەت, سونداي-اق ەكونوميكالىق جانە وڭىرلىك ساياسات كوميتەتىنىڭ مۇشەلەرىمەن كەزدەستى.