جانار-جاعارمايمەن جۇرەتىن كولىكتەردىڭ زامانى كەلمەسكە كەتەتىن كۇن جاقىنداعانى تۋرالى اڭگىمەلەر سوڭعى ۋاقىتتا ءجيى ايتىلىپ جۇرگەنى بەلگىلى. تاس جولداردا جۇيتكىگەن ەلەكتروموبيلدەردىڭ كوبەيە باستاعانى بۇل اڭگىمەنىڭ نەگىزسىز ەمەستىگىن اڭعارتا تۇسكەندەي ەدى. كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە باستى ماسەلە وسى تاقىرىپ توڭىرەگىندە ءوربىدى.
وسى بريفينگتە ايتىلعانداي, الداعى ۋاقىتتا ەلىمىزدەگى جانار-جاعارماي بەكەتتەرىندە ەلەكتروموبيلدەردى قۋاتتاندىرۋعا ارنالعا بلوكتار, سونىمەن قاتار كولىكتەرگە گاز قۇيۋعا ارنالعان ستانسالار ورناتىلماق. بۇل تۋرالى «قازاقستاننىڭ مۇناي وڭدەۋ زاۋىتى» جشس باسقارۋشى ديرەكتورى داۋلەت قاليحانوۆ ايتتى.
ول ءۇشىن الدىمەن 300 جانار-جاعارماي بەكەتى ءبىر ۇلكەن جەلىگە بىرىكتىرىلىپ, ءبىر نۇكتەدەن باسقارۋعا كوشەدى. ەلەكترموبيلدەرگە, سونداي-اق, گازبەن جۇرەتىن كولىكتەرگە وسى ستانسالاردا ءتيىستى قىزمەت كورسەتىلەتىن بولادى.
– قازىر ەلەكترموبيلدەرگە سۇرانىس ءوسىپ كەلە جاتىر, «تەسلا-نىڭ» تانىمالدىعى ارتتى. ءبىز زامان تالابىنا ساي جۇمىس ىستەۋىمىز كەرەك. سول ءۇشىن رەسپۋبليكالىق ماڭىزى بار تاس جولداردا جانار-جاعارماي بەكەتتەرىن ەلەكترموبيلدەردى قۋاتتاندىراتىن بلوكتارمەن, سونداي-اق, گاز ستانسالارىمەن جابدىقتايمىز. بۇل ەكونوميكالىق قانا ەمەس, الەۋمەتتىك ءمانى بار ماسەلە. سەبەبى, جوباعا جەرگىلىكتى كاسىپكەرلەردى, جەرگىلىكتى جۇمىس كۇشىن تارتامىز, – دەدى د.قاليحانوۆ.
«قموز» جشس باسقارۋشى ديرەكتورىنىڭ ورىنباسارى اماناي ماحمەتوۆتىڭ ايتۋىنشا, ەلەكترموبيلدەردى قۋاتتاندىراتىن بلوكتارمەن جابدىقتاۋ ماسەلەسى الدىن-الا جەتە زەرتتەلگەن.
– «تەسلا» اۆتوكولىكتەرىنىڭ قۋاتى 150-200 شاقىرىمعا دەيىن ءجۇرۋگە جەتەدى ەكەن. ونىمەن جۇرەتىن ادامدار قالادان قاشىق جەرگە شىقسا, كولىگىن قۋاتتاندىرا المايدى, قۋاتتاندىراتىن بلوكتار ەش جەردە جوق. ءبىز قۋاتتاندىرعىش بلوكتاردى ەلەكترموبيلدەر ەركىن جەتە الاتىن قاشىقتىقتارعا ورنالاستىرامىز, – دەگەن ا.ماحمەتوۆ ول بەكەتتەردىڭ ورنالاسقان جەرى تۋرالى كەيىنىرەك حابارلايتىندىقتارىن ايتتى.
سونىمەن قاتار, «قموز» جشس ءبىر جۇيەگە بىرىكتىرىلەتىن جانار-جاعارماي بەكەتتەرىنىڭ جۇمىس ساپاسىن تەكسەرەتىن جەدەل زەرتحانالار قۇرۋدى دا جوسپارلاپ وتىر. كومپانيا قولعا العان باستامالارىن جۇزەگە اسىرۋ ءۇشىن بەس جىل ىشىندە ءوز قارجىسىنان جانە ينۆەستورلاردىڭ ەسەبىنەن 50 ميلليون دوللارعا تارتا قاراجات قۇيادى.
ارنۇر اسقاروۆ,
«ەگەمەن قازاقستان»