كەشە پارلامەنت سەناتىنىڭ توراعاسى قاسىم-جومارت توقاەۆتىڭ توراعالىعىمەن پالاتانىڭ كەزەكتى پلەنارلىق وتىرىسى بولدى. وندا بىرقاتار حالىقارالىق زاڭدىق قۇجاتتاردى راتيفيكاتسيالاۋعا ارنالعان زاڭ جوبالارى قارالدى.
الدىمەن دەپۋتاتتار جوعارعى سوت سۋدياسى قىزمەتىنە سايلاۋبەك ءابىلدا ۇلى جاكىشەۆتى سايلاۋ تۋرالى پرەزيدەنت ۇسىنىسىن قارادى. سۋديالىقتان ۇمىتكەرگە ءبىر عانا سۇراق قويىلدى, وعان دۇرىس جاۋاپ بەرىلدى. سوندىقتان دا دەپۋتاتتار ونىڭ كانديداتۋراسىن لايىق دەپ تاپتى.
«1968 جىلعى 8 قاراشادا ۆەنادا قول قويۋ ءۇشىن اشىلعان جول بەلگىلەرى مەن سيگنالدارى تۋرالى كونۆەنتسيانى تولىقتىراتىن ەۋروپالىق كەلىسىمدى راتيفيكاتسيالاۋ تۋرالى» جانە «1968 جىلعى 8 قاراشادا ۆەنادا قول قويۋ ءۇشىن اشىلعان جول بەلگىلەرى مەن سيگنالدارى تۋرالى كونۆەنتسيانى تولىقتىراتىن ەۋروپالىق كەلىسىمگە جول تاڭبالارى تۋرالى حاتتامانى راتيفيكاتسيالاۋ تۋرالى» زاڭ جوبالارى ءبىراۋىزدان قابىلداندى. كەلىسىم ماقساتى – جول ءجۇرىسى قاعيدالارىن ءبىر ىزگە ءتۇسىرۋ, جول ءجۇرىسى قاۋىپسىزدىگىنىڭ جوعارى دەڭگەيى مەن قورشاعان ورتانى قورعاۋدى قامتاماسىز ەتۋ.
اتالعان زاڭدىق قۇجاتتى بەكىتۋ جول ءجۇرىسىن ۇيىمداستىرۋ سالاسىنداعى تالاپتاردى حالىقارالىق ستاندارتتارعا سايكەستەندىرۋگە ىقپال ەتۋى ءتيىس. ال حاتتاما بولسا, جول تاڭبالارىنا قاتىستى قاعيدالاردى بىردەيلەندىرۋگە ءمۇمكىندىك بەرەدى. كەلتىرىلگەن مالىمەتتەرگە قاراعاندا, الەمدە جىل سايىن جول اپاتىنان 1 ميلليوننان استام ادام قازا تاپسا, 50 ميلليونى ءار ءتۇرلى دەڭگەيدەگى دەنە جاراقاتتارىن الادى ەكەن. ەلىمىزدە سوڭعى 10 جىلدا 122 مىڭ جول-كولىك وقيعاسى تىركەلگەنى, وندا 25 مىڭ ادامنىڭ ءومىرى قيىلعانى, تاعى 151 مىڭنان استامىنىڭ ءتۇرلى جاراقاتتار العاندىعى دا كولدەنەڭ تارتىلدى.
ەلىمىز بەن كورشىلەس قىرعىزستان ۇكىمەتتەرى اراسىنداعى استانا مەن بىشكەك قالالارىندا ەكى ەل ەلشىلىكتەرىنىڭ قاجەتتىلىكتەرى ءۇشىن عيماراتتار مەن جەر ۋچاسكەلەرىن ءوزارا وتەۋسىز پايدالانۋعا بەرۋگە قاتىستى كەلىسىمدى راتيفيكاتسيالاۋ تۋرالى زاڭ جوباسى ءبىراۋىزدان دەپۋتاتتار قولداۋىنا يە بولدى. زاڭ جوباسى بويىنشا قوسىمشا بايانداما جاساعان حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءمۇشەسى ومىربەك بايگەلدي ەندىگى جەردە ەلشىلىكتەرگە قاجەتتى جەر تەلىمدەرى مەن عيماراتتاردى ساتىپ العاننان گورى, ولاردى اۋىسۋ ارقىلى جۇزەگە اسىرسا, دەگەن ويىن ورتاعا سالدى.
كۇن تارتىبىندەگى سوڭعى ماسەلە بويىنشا اۋىل شارۋاشىلىعى مينيسترى اقىلبەك كۇرىشباەۆ قىسقاشا بايانداما جاساپ ءوتتى. زاڭ جوباسى «2009 جىلعى 11 جەلتوقسانداعى كەدەن وداعىنىڭ ۆەتەرينارلىق-سانيتارلىق شارالار ءجونىندەگى كەلىسىمىنە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» دەپ اتالادى. حاتتاما ماقساتى ۆەتەريناريالىق باقىلاۋعا جاتاتىن تاۋارلارمەن حالىقارالىق ساۋداداعى اكىمشىلىك كەدەرگىلەردى جويۋ, رۇقسات بەرۋ فۋنكتسيالارىن جەڭىلدەتۋ جانە تاعىسىن تاعىلار. وسى رەتتە باقىلاۋداعى تاۋارلاردى ءوندىرۋدى, قايتا وڭدەۋدى جانە ساقتاۋدى ءجۇزەگە اسىراتىن ۇيىمدار مەن تۇلعالارعا بىرلەسكەن تەكسەرىستەر جۇرگىزۋ مۇمكىندىگى بەرىلىپ وتىر. زاڭ جوباسى تولىقتاي قابىلداندى.
اسقار تۇراپباي ۇلى.