وتكەن اپتانىڭ سوڭعى كۇندەرىندە قىتايدىڭ بىرقاتار وڭىرلەرىندە سۋ تاسقىنى ءجۇردى. «جەنمين جيباو» پارتيالىق گازەتى جاريالاعان رەسمي مالىمەتتەرگە سۇيەنسەك, قىتايدىڭ ورتالىق, سولتۇستىك جانە سولتۇستىك-شىعىس اۋداندارىن باسقان سۋ تاسقىنىنان 150-دەن استام كىسى كوز جۇمىپ, ونداعان ادام ءىز-ءتۇزسىز جوعالعان. جۇزدەگەن مىڭ تۇرعىن قاۋىپسىز ايماققا كوشىرىلگەن.
مەملەكەتتىك «سينحۋا» اقپارات اگەنتتىگى تابيعي اپات سالدارىنان ەڭ كوپ زارداپ شەككەندەر سانى حەيبەي مەن حەنان پروۆينتسيالارىندا تىركەلگەنىن حابارلادى. ارنايى قىزمەت وكىلدەرى دەر كەزىندە دابىل قاعىپ, شۇعىل ىسكە كىرىسكەنىمەن, قازا تاپقاندار مەن جوعالعاندار سانى كوپ بولدى. ساراپشىلاردىڭ ايتۋىنشا, جاعدايدىڭ وسىنشالىقتى ۋشىعۋىنا قاتىستى قوعام اراسىندا پىكىر قايشىلىقتارى دا جوق ەمەس.
اتاپ ايتقاندا, «South China morning post» باسىلىمى كۇنى كەشە عانا حەيبەي پروۆينتسياسىنىڭ بىرنەشە قالاسىندا تۇرعىندار توتەنشە جاعداي ورىن الۋى مۇمكىن ەكەندىگىن ەسكەرتپەدى دەپ بيلىكتى كىنالاپ, ەرەۋىلگە شىققان.
ال قىتايدىڭ ازاماتتىق اكىمشىلىك مينيسترلىگى جانىنداعى تابيعي اپات زارداپتارىن جويۋ ءبولىمىنىڭ باسشىسى يان سياودۋن جۋرناليستەردىڭ ساۋالدارىنا جاۋاپ بەرە كەلە, بيلىكتىڭ شاراسىز كۇي كەشىپ, قول قۋسىرىپ وتىرماعاندىعىن مالىمدەگەن. سونداي-اق, ول ءوز كەزەگىندە جەرگىلىكتى تۇرعىنداردى سابىرعا شاقىرۋدا. ازاماتتاردى از ۋاقىت ىشىندە تۇسكەن جاۋىن-شاشىن مولشەرىنىڭ رەكوردتىق كورسەتكىشىنە تۇسىنىستىكپەن قاراپ, قارسى ارەكەتتە تاباندى ءارى جىگەرلى بولۋعا ۇندەدى. وعان قوسا, شەنەۋنىك كەيبىر جەرگىلىكتى ورگانداردا ورىن العان كەمشىلىكتەردى اشىق مويىنداپ, ولقىلىقتاردى تەز ارادا تۇزەۋگە ۋادە ەتتى.
ءۇش كۇن بۇرىن عانا قحر ورتالىق بيلىك ورگانى جوعارىدا اتالعان حەيبەي پروۆينتسياسىنىڭ زارداپ شەككەن ازاماتتارى ءۇشىن 250 ملن. يۋان (37,37 ملن. دوللار) قارجى بولگەن بولاتىن. ەلدىڭ اقپارات قۇرالدارىندا بۇل قاراجاتتىڭ ءبىرىنشى كەزەكتە تاسقىن سۋدان زارداپ شەككەندەرگە جانە ولاردى قاۋىپسىز جەرگە كوشىرىپ, ولاردىڭ العاشقى قاجەتتىلىكتەرىن وتەۋگە جۇمسالاتىندىعى ايتىلۋدا. سونىمەن قاتار, ب ۇلىنگەن ءۇي-جايلاردى قالپىنا كەلتىرۋ مەن قازا تاپقانداردىڭ اعايىن-تۋىستارىنا دا ماتەريالدىق كومەك قاراستىرىلاتىن بولادى دەپ كۇتىلۋدە.
جالپى, ماماندار قىتاي ايماقتارىندا جازدىڭ جاڭبىرلى ماۋسىمى اي سوڭىنا دەيىن تولاستاماۋى مۇمكىن دەپ بولجايدى. اسىرەسە, يانتسزى وزەنىنىڭ بويىنداعى ەلدى مەكەندەر ءۇشىن قاۋىپ كۇشتى. سۋ تاسقىنى جاعىنان بيىلدىڭ وزىندە ەكىنشى رەت ورىن الىپ جاتقان مۇنداي تابيعي اپاتقا جاۋىن-شاشىننىڭ شامادان تىس كوپ ءتۇسۋى سەبەپ. بۇعان دەيىن ماۋسىمنىڭ العاشقى جارتىسىندا قىتايدىڭ وڭتۇستىك جانە ورتالىق اۋداندارىندا سۋ تاسقىنى ءجۇرىپ, جۇزدەگەن ادام مەرت بولىپ, مىڭداعان تۇرعىن ۇدەرە كوشكەن بولاتىن. ول كەزدە گۋانسي, حۋنان, حۋبەي, سىچۋان مەن حەنان سەكىلدى پروۆينتسيالاردىڭ ونداعان مىڭ ءۇي-جايى قىزىل سۋدىڭ استىندا قالعان.
تابيعاتتىڭ توسىن مىنەزى ءتىپتى, قىتاي استاناسى پەكيندە قاتتى سەزىلىپ, توقتاۋسىز جاۋعان ءۇش كۇندىك جاۋىننان قالا كوشەلەرى سۋعا لىقا تولعان ەدى. سول كەزدە جىل باسىنان بەرى جاۋىن-شاشىن سالدارىنان كەلگەن اپات زارداپتارى ەسەپتەلگەن. 1 074-تەن استام ادام كوز جۇمىپ, 270 جان ءىز-ءتۇزسىز جوعالعان جانە ەكونوميكالىق شىعىن كولەمى 298 ملرد. يۋاندى (44 ملرد. دوللار) قۇراعان. توتەنشە جاعدايلاردى جويۋ جونىندەگى ءبولىم مەڭگەرۋشىسىنىڭ ورىنباسارى يان سياودۋن وسى جاعدايلاردى ەسكەرە كەلە, ورتالىق ۇكىمەت 1,67 ملرد. يۋان كولەمىندەگى قاراجاتتى مۇقتاج جاندارعا كومەك رەتىندە تاراتىپ بەرگەندىگىن ايتادى. ال ارنايى ماماندار بولسا, قىتاي تاريحىنىڭ سوڭعى جۇزجىلدىعىندا مۇنداي جاعداي تىركەلمەگەن دەيدى.
تولاسسىز جاۋعان جاۋىن سالدارىنان ورىن الىپ جاتقان قىتاي ەلىنىڭ قايعىسىنا بۇگىندە الەم جۇرتشىلىعى ورتاقتاسىپ, كوڭىل بىلدىرۋدە. مەملەكەت باسشىلارى دا كوڭىل ايتقان جەدەلحاتتار جولداۋدا. ولاردىڭ قاتارىندا قازاقستان پرەزيدەنتى نۇرسۇلتان نازارباەۆ تا بار.
رۋسلان يزيموۆ,
قىتايتانۋشى