«استانا» «سەلتيكپەن» ويىندا جەڭىستى قولدان بەردى (فوتو, ۆيدەو)

فوتو: ەرلان وماروۆ

استاناداعى «استانا-ارەنا قاجىمۇقان» سپورت كەشەنىندە ەۋروپا چەمپيوندار ليگاسى ءۇشىنشى ىرىكتەۋ راۋندىنىڭ ءبىرىنشى ماتچى وينالدى. وندا جەرگىلىكتى «استانا» مەن شوتلانديانىڭ «سەلتيك» كوماندالارى 1:1 ەسەبىمەن تەڭ ءتۇستى.

27 شىلدە, سارسەنبى. استانا.  «استانا-ارەنا قاجىمۇقان» سپورت كەشەنى. «استانا» (استانا, قازاقستان) - «سەلتيك» (گلازگو, شوتلانديا) 1:1 تورەشىلەر: پاولو سيلۆيو ماتستسولەني, دجانلۋكا كارولاتو, دجاكومو پاگانەسسي ء(بارى - يتاليا)  «استانا»: نەناد ەريچ, مارين انيچيچ, نەمانيا ماكسيموۆيچ, ازات نۇرعاليەۆ (سەرىكجان مۇجىقوۆ 62), يگور شيتوۆ, ابزال بەيسەبەكوۆ (اگيم يبرايمي 85), پاتريك تۆۋماسي, يۋري لوگۆينەنكو, جۋنيور كابانانگا, دميتري شومكو, روحەر كانياس. باس جاتتىقتىرۋشى: ستانيمير ستويلوۆ. «سەلتيك»: كرەيگ گوردون, ەفە ەمبروۋز, سكوتت براۋن, لي گريففيتس, مۋسسا دەمبەلە (نير بيتتون 62), ستيۋارت ارمسترونگ (دجەيمس فوررەست 72), ميكاەل لۋستيگ, پاتريك روبەرتس, ەفان و’كوننەلل, كالۋم ماكگرەگور (توماس روگيچ 77), كيران تيرني. باس جاتتىقتىرۋشى: برەندان رودجەرس. گولدار: يۋري لوگۆينەنكو 19, لي گريففيتس 78. ەسكەرتۋلەر: ازات نۇرعاليەۆ 28, اگيم يبرايمي 90+6 -  لي گريففيتس 76, سكوتت براۋن 90+6. قاقپاعا سوققى: 13 - 5; قاقپا اۋقىمىنا سوققى: 8 - 1; بۇرىشتاما: 8 - 2; دوپتى يەمدەنۋ: 47 % - 53 %.

كەزدەسۋ ەكى جاقتىڭ ءبىر-بىرلەرىنە بارلاۋ جاساۋلارى ارقىلى اقىرىن قارقىنمەن باستالدى. بىراق وسى تۇستا قوناقتاردىڭ العاشقى مۇمكىندىك تۋعان ساتتەن العا ۇمتىلۋعا دايىن ەكەندەرى دە بايقالىپ قالدى. سول نيەتپەن ولار بىرتىندەپ ويىن تىزگىنىن ءوز قولدارىنا الا باستاعانداي بولىپ ەدى, الايدا, كوپ ۇزاماي استانالىقتار كەزدەسۋدىڭ مۇنداي اۋانمەن وربۋىنە وزدەرىنىڭ كەلىسە قويمايتىندىقتارىن تەز ءبىلدىرىپ, قارسى شابۋىلعا شىعا باستادى. وسى قارقىن بىرتە-بىرتە الاڭ يەلەرىنىڭ باسىمدىلىقتارىن قامتاماسىز ەتىپ, ولار الاڭ ۇستىندە جان-جاقتى ۇستەمدىك قۇرۋعا كوشتى. وسىدان باستاپ ولاردىڭ قارسى قاپتالعا جاساعان ءاربىر شابۋىلى قاۋىپتى بولا ءتۇستى. سول جورىقتاردىڭ پاتىندە مەيماندار ايىپ الاڭى ىشىندە جۋنيور كابانانگا ادەمى مۇمكىندىكتى پايدالانا المادى. ال قاۋىپتى دوپتى شوتلاندتاردىڭ قورعاۋشىسى قاقپا سىرتىنا قاراي تەۋىپ جىبەرىپ, جاعدايدى دۇرىستادى. وسى ءۇشىن پاتريك تۆۋماسي بەرگەن بۇرىشتاما دوبىن يۋري لوگۆينەنكو باسىمەن ۇرىپ, قاقپاعا كىرگىزىپ, توردى ءبىر سەرپىلتىپ تاستادى. استانالىقتار بۇدان كەيىن دە ەسەپتى ۇلعايتۋدىڭ بىرنەشە مۇمكىندىگىن پايدالانا المادى. ماسەلەن, ايىپ الاڭى ىشىندە قاقپاشىمەن قاراما-قارسى كەلگەن ازات نۇرعاليەۆتىڭ ۇرعان دوبىن گولكيپەر كرەيگ گوردون ارەڭ قايىرىپ, بۇرىشتاماعا قاراي جىبەردى. مۇنىڭ سوڭىنان ءبىزدىڭ جەرلەستەرىمىز تاعى بىرنەشە رەت بۇرىشتاما بەرۋ قۇقىعىنا يە بولدى. بىراق سولاردىڭ باسىم كوپشىلىگىندە تۆۋماسي دوپتى ءدال الدىڭعىداي ەتىپ قاقپا الاڭىنا قاراي جەتكىزىپ بەرە الماي, ولار قوناقتار قورعاۋشىلارىنىڭ وڭاي ولجالارىنا اينالىپ كەتىپ جاتتى. ەكىنشى تايمنىڭ باس جاعىندا استانالىقتار باسىم كورىنگەنىمەن, قوناقتار ويناي كەلە, ءبىرازدان كەيىن الاڭداعى جاعدايدى تەڭەستىرە الدى. سول مەزەتتەردە ولار باتىل شابۋىلعا دا شىعا باستادى. سولاردىڭ ءبىر ساتىندە گلازگولىقتار 78-مينۋتتا جاۋاپ دوپ سوعىپ, تارازى باسىن تەڭەستىرىپ تە كەتتى. الدىمەن ءبىزدىڭ قاقپا الاڭىنا سول قاپتالدان كىرگەن پاتريك روبەرتس ءتورت بىردەي ويىنشىمىزدى الداپ ءوتىپ, دوپتى ارتقا, الاڭ ورتاسىنا قاراي جونەلتتى. وعان جۇرتتىڭ بارىنەن بۇرىن جەتكەن لي گريففيتس توقتاتپاستان قاقپاعا قاراي تەپتى. ءوزىنىڭ سول ءبۇيىرى جاعىنان زۋ ەتە قالعان سول دوپقا نەناد ەريچ توسقاۋىل قويا المادى گول! ەسەپ وسىلاي تەڭەستى. بۇدان كەيىن «استانا» جايداق اتقا قونىپ, تاعى ءبىراز قارسىلاستار الاڭىنا قاراي جوڭكىلە ۇمتىلدى. سول مەزەتتەردە بىرنەشە رەت العا شىعۋدىڭ مۇمكىندىكتەرى بولدى. بىراق ءبىزدىڭ فۋتبولشىلار ودان ءتيىمدى ناتيجە شىعارا المادى. ماتچتىڭ سوڭعى سەكۋندتارىندا مارين انيچيچ ءدال سونداي كەرەمەت مۇمكىندىكتى بوسقا جىبەرىپ قويدى. ەندى «استانا» مەن «سەلتيك» اراسىنداعى قارىمتا ماتچ 3 تامىز كۇنى گلازگونىڭ «سەلتيك پارك» ستاديونىندا وتەدى. «استاناعا» كەلەسى كەزەڭگە ءوتۋ ءۇشىن قالايدا جەڭىسكە جەتۋ نەمەسە 2:2 جانە ودان دا ءىرى ەسەپتەرمەن تەڭ ويناۋ كەرەك. ال ويىن تاعى دا 1:1 بولىپ اياقتالسا, وندا نەگىزگى ماتچتان كەيىنگى ەكسترا-تايمعا كەزەك بەرىلەدى. مۇندا دا جەڭىمپاز انىقتالماسا, پەنالتيلەر سەرياسى بەلگىلەنەدى. وسى جۇپتىڭ جەڭىمپازى چەمپيوندار ليگاسىنىڭ توپتىق كەزەڭىنە ءوتۋ جولىندا كۇرەسەتىن بولادى. ۇتىلعان كوماندا ەۋروپا ليگاسىندا جارىس جولىن جالعاستىرادى. دامير قوجامقۇل https://youtu.be/nrU04TTcaYA